Sif

En la mitolojia norsce, Sif es un diva asosiada con la tera. Sif es notada en la Edda Poesial, colieda en la sentenio 13 de fontes tradisional plu temprana, e la Edda Prosal, scriveda en la sentenio 13 par Snorri Sturluson, e en la poesia de la skaldes (poesistes norsce temprana). En ambos Eddas, Sif es la sposa de Tor, la dio de tona e tempestas. El es conoseda per sua capeles oro.

Loki taliante la capeles de Sif

En la Edda Poesial, Sif es descriveda como la madre de la diva Þrúðr ("Trud", un valkyria) con Thor como la padre, e de Ullr (un dio asosiada con arcores) con un padre no nomida. La Edda Prosal ance reconta ce Loki, la dio ci es asosiada con turba e malia, ia sisori la capeles de Sif, e ce Thor ia forsa ce Loki causa la crea de un peruca de oro per Sif.

Alga mitolojistes ia proposa ce la capeles oro de Sif ia representa campos de trigo oro, e ce Sif pote es asosiada con fertilia, familia, e sposi. Lo pote es ance asosiada con la rowan, un arbor de la spesie sorbo. Sua nom es relatada a la parola engles sib (conaseda) e la parola deutx sibbe (tribu, familia), e ia sinifia familia, sposi, e relata par sposi. El ia es ance nomida godmor (bon madre) en partes de Sveria.