Sindrom de la manca de atende e iperativia
La sindrom de la manca de atende e iperativia (SMAI, o ADHD en engles) es un maladia mental neurodevelopal. Lo es marcada par problemes de atende, ativia suprapasante, o difisilia de controla condui no normal per la eda de la person. Tecnical, la sintomes apare ante 12 anios, es presenta per plu ca 6 menses, e causa problems en a min du ambientes (pd scola, casa de familia, e ativias de recrea). En enfantes, problemes con atende pote resulta en problems en scola. Plu, on ave un asosia con otra problemes mental e con malusa de drogas o alcol. An ce lo causa descapasia, spesial en sosia moderne, multe enfantes con la sindrom ave bon atende per taxes cual los trova interesante.
An si lo es la maladia mental la plu studiada e diagnoseda en enfantes e adolesentes, la causa esata no es conoseda en la plu de casos. Lo afeta sirca 5-7% de enfantes cuando diagnoseda par la criterias de la DSM-4. Tra 2015, on ia estima ce lo afeta sirca 51.1 milion persones global. Frecuentias es simil entre nasiones e depende la plu de como lo es diagnoseda. Lo es diagnoseda sirca tre veses plu comun en xicos ca xicas, an si la problem es comun no notada en xicas car sua sintomes difere de los de xicos. Sirca 30-50% de persones diagnoseda en enfantia continua con sintomes en adultia, e entra 2-5% de adultas ave la problem. En adultes, un ajita interna pote aveni en loca de iperativia. La maladia es difisil distinguida de otra problemes, e ance difisil distinguida de niveles de ativia alta cual es ancora en la estende normal de enfantes.
La recomendas per maneja la sintomes varia par nasion, ma comun envolve alga combina de consela, cambias de stilo de vive, e medisines. En Britan, los recomenda medisines sola como un trata prima per enfantes ci ave sintomes sever o per los ci no boni con consela. Per adultes, medisines es la trata prima. En la SUA e Canada, e medisines stimulante e terapia de condui es recomendada simultan, estra per enfantes prescola. Trata con stimulantes es efetosa per asta 14 menses, ma sua efetosia per un periodo plu longa no es clar. Adultes developa comun capasias de maneja cual permete ce sua controla sua sintomes.
La leteratur medical ia descrive sintomes simil a los de esta sindrom de la sentenio 19. Diagnose, trata, e descrive ia es controversal de la desenio de 1970. La controversas ia envolve psicolojistes, psiciatristes, dotores medical, instruores, politicistes, parentes, e la medias, spesial sur la causas e la usa de stimulantes. La plu de furnores de aida medical aseta SMAI como un maladia vera en enfantes e adultes, e la debata en la comunia siensal sentri xef sur como lo es diagnoseda e tratada.