Abri la menu xef
Sitting Bull
Sitting Bull by D F Barry ca 1883 Dakota Territory.jpg

Informa personal

Nase: sirca 1831 en Grand River, Dakota Territory
Mori: 15 desembre 1890 en Standing Rock Indian Reservation, Grand River, South Dakota

Otra informas

Sitting Bull ("bison mas sentante"; sirca 1831 – 15 desembre 1890) ia nase en Teritorio Dakota. El ia es nomida Jumping Badger ("texon saltante"). Cuando el ia ave 14 anios, el ia acompania un grupo de gerores lacota ci ia prende du cavalos de un campo de gerores cro. Car el ia mostra coraje en la ataca, sua padre ia dona un festa de selebra a cual sua padre ia nomi el, per se mesma, Tȟatȟaŋka Iyotake (bison mas sentante). A la seremonio, sua padre ia dona a sua fio un pluma de agila per porta en sua capeles, un cavalo cual conveni a un geror, e un scermo de cuoro durida de bison, per marca la pasaje de sua fio a adultia como un geror lacota.

En setembre, Sitting Bull e sirca un sento hunkpapas (un sugrupo de la lacotas) ia ataca un grupo peti prosima a un loca cual es aora Marmarth, Dakota Norde. La hunkpapas ia continua ataca grupos de migrores e fortreses en la anios tarda de la desenio de 1860. Cuando en 1871 la Northern Pacific Railway ("Ferovia de la Pasifica Norde") ia esplora per un via tra la plano norde cual ta traversa la pais de la hunkpapas, los ia encontra un resiste forte par la lacotas.

Cuando la comandor militar american, George Custer, ia anunsia la trova de oro en la Black Hills ("colinas negra") de Dakota Norde, un "freta de oro" ia comensa. La tensas entre la lacotas e la blancas ci ia vole move a la Black Hills ia crese. En novembre 1875, la governa ia comanda ce tota grupos de lacotas debe move a la Great Sioux Reservation (la reserva grande lacota), an si los ia conose ce los va resiste. A 1 febrero 1876, la Departe de la Interna ia declara ce la grupos de lacotas ci abita estra la reserva es enemin.

La refusa par Sitting Bull de adota cualce depende de la governa SUA ia resulta ce, a veses, el e sua banda peti de gerores ia nesesa abita isolida sur la plano. Cuando americanes orijinal ia es menasada par la SUA, multe membros de grupos lacota e otra tribus, como la tsêhéstáno (xeien) norde, ia veni a la campa de Sitting Bull. Sua reputa per "medisin forte" (potia spirital) ia developa en cuando el ia continua evita la armada american.

Tra la dui prima de 1876, la campa de Sitting Bull ia continua crese con otras ci ia alia se con el per ave la securia de cuantia. Sua xefia ia atrae gerores e familias, e ia crea un vileta estendeda con popla estimada de plu ca 10 000. Custer ia descovre esta campa a 25 junio 1876. An si Sitting Bull no ia partisipa direta en la batalia, el ia ata como la xef spirital.

Sitting Bull ia ave un previde en cual el ia vide multe soldatos en la campa de la lacota, "tan densa como locustas", de ci cada ia es inversada, e sua seguores ia interprete esta como un previde de un vinse major en cual multe soldatos va es matada. A un semana ante la ataca, el ia fa la dansa de la sol, en cual el ia juna e sacrifia plu ca 100 pesos de carne de sua brasos.

A 25 junio 1876, sirca tre semanas plu tarda, la grupo avansada de la cavaloria sete de Custer ia ataca la xeienes e lacotas a sua campa a la rio Little Bighorn ("corno grande peti"), cual la lacotas ia nomi "rio de erba grasosa". La armada american no ia sabe ce la campa es tan grande. Plu ca 2000 gerores orijinal american ia parti de sua reservas per segue Sitting Bull. La soldatos, plu poca en cuantia, ia perde rapida sua locas e ia debe retira. La gerores ia comensa un contrataca contra la soldatos sur un cresta prosima, e ia elimina los.

La selebras de la lacotas no ia continua longa. La xoca e coleria de la publica american sur la defeta e mata de Custer e la sabe la governa sur la lacotas restante ia causa la asinia de miles de plu soldatos a la area. La militar ia xasa la lacotas tra la anio seguente, e ia forsa la sede de multe lacotas. En maio 1877, Sitting Bull ia gida sua grupo ultra la borda a Canada e ia resta escluida per cuatro anios, prosima a Monte Wood. Car la manadas de bison en Canada ia es plu peti, los ia esperia problemes en trova comedas sufisinte per sua popla, ci ia es faminte e multe fatigada.

Ultima, famia e despera ia forsa ce Sitting Bull e 186 de sua familia e seguores reveni a la SUA e sede se a la armada american a 19 julio 1881. La armada ia move Sitting Bull e sua grupo a Fortres Yates, a lado de la Ajenteria de Standing Rock ("roca stante"). Esta reserva monta la frontera presente entre Dakota Norde e Sude.

En 1884, Alvaren Allen, un promovor de spetaculos, ia demanda ce ajente James McLaughlin permete ce Sitting Bull turi partes de Canada e la SUA norde. En esta turi, Sitting Bull ia encontra Annie Oakley en Minnesota. El ia senti ce Annie Oakley posese un donada supranatural cual permete el a fusili multe esata con ambos manos. Per esta razona, el ia adota Oakley en 1884. El ia nomi Oakley "Little Sure Shot" ("fusilor serta peti"), un nom cual Oakley ia usa tra sua carera.

En 1885, Sitting Bull ia es permeteda a sorti de la reserva per vade con Buffalo Bill Cody, un otra promovor de spetaculos, en un turi. Sitting Bull ia resta con la spetaculo per cuatro menses ante reveni a la reserva. La popla ia vide el como un selebrada e un geror romantica. El ia gania un monton peti de mone par demanda un paia per sua foto e suscrive, e ia dona la plu a mendicores e povres sin casa.

En 1890, la ajente James McLaughlin ia teme ce Sitting Bull ia fuji la reserva. A 15 desembre, 39 polisiores ia ensirca sua casa, ia bate, e ia entra. La teninte Bull Head ia esplica a Sitting Bull ce el es arestada e ia gida el a estra. Un luta streta ia aveni, e en minutos, alga omes ia es mor. La lacotas ia mata pronto ses polisiores, e du plu ia mori corta pos la luta, incluinte teninte Bull Head. La polisiores ia mata Sitting Bull e sete de sua seguores e du cavalos.

La corpo de Sitting Bull ia es traeda a Fortres Yates, do lo ia es poneda en un cason funeral e enterada. Un monumento ia es instalada per marca sua loca de entera pos cuando sua corpo ia es traeda a Dakota Sude. En 1953, membros de la familia lacota ia desentera lo sua corpo crededa, e ia transporta lo per reentera prosima a Mobridge, Dakota Sude, sua loca de nase. Un monumento ia es erijeda ala per onora el.