Skara Brae

Skara Brae es un vila neolitica construida de petra, locada a la Baia de Skaill a la costa ueste de Mainland, la isola la plu grande en la arcipelago Orkney en Scotland. Composada de oto casas grupida, lo ia es ocupada de sirca 3180 aec a sirca 2500 aec. Como la vila neolitica la plu completa en Europa, Skara Brae ia gania la state de loca de Erita de Mundo de UNESCO, un de la cuatro locas cual composa la "cor de Orkney neolitica". Plu vea ca Stonehenge e la Piramides Grande, lo ia es conoseda como la "Pompeii de Scotland" per sua conserva eselente. E la loca ia furni la esemplo la plu vea de un pulga de umanas (Pulex irritans) en Europa.

Descovre

En la inverno de 1850, un tempesta sever ia colpa Scotland, e cuasa dana vasta e plu ca 200 moris. En la Baia de Skaill, la tempesta ia estrae la tera de un colina grande conoseda como "Skerrabra". Cuando la tempesta ia vade, la sitadanes local ia trova la contorna de un vileta, composada de un cuantia de casas peti sin tetos. William Watt de Skaill, la laird local, ia comensa un escava amator de la vileta, ma pos cuatro casas ia es descovreda, la labora ia es abandonada en 1868. La loca ia resta nondisturbada asta 1913, cuando en un fini de semana, la loca ia es sacada par un grupo con palas ci prende un cuantia nonconoseda de fabricadas. En 1924, un otra tempresta ia scopi a via parte de un de la casas, e lo ia es determinada ce la loca debe es plu secur e investigada plu seria. La taxe ia es donada a profesor V. Gordon Childe de la Universia de Edinburgh ci ia viaja a Skara Brae per la ves prima en 1927.

La vive neolitica

La popla de Skara Brae ia es fabricores e usores de vasos ranurida, un stilo distinguida de seramica cual apare en Scotland norde no plu ante la fundi de la vileta. La casas ia usa la proteje de la tera par es partal sutera. Los ia es afondida en la montones de dejetas preesistente, cual furni la casas con stablia e ance atada como insula contra la clima sever de la invernos de Orkney. En promedia, cada casa ia mesura 40 metres cuadrida, con un sal cuadro grande conteninte un ximineria de petra usada per caldi e coce. Lo es estimada ce no plu ca sirca 50 persones ia abita Skara Brae a cualce tempo.

Lo no es clar cual materia la abitantes ia arde en sua ximinerias. Childe ia es serta ce la combustable ia es torba, ma un analise detaliosa sujeste ce la clima cual ta es bon per la developa de letos de torba no ia developa en esta parte de Orkney asta Skara Brae ia es abandonada. Otra combustables posible inclui lenio flotante e feces de animales. Lo es ance posible ce alges secida pote es usada.

La abitadas ia conteni un cuantia de pesos de petra usada como imobilias, incluinte armarios, comodas, sejas, e caxa per furnis. Cada abitada ia es entrada tra un entra basa con un porte de petra cual pote es cluida par un bara cual pote lisca en bucos taliada en la gamas de petra de la porte. Un sistem de drena ia es un parte de la desinia de la vila. Lo ia inclui un forma primitiva de vason en cada abitada.

Sete de la casas ia ave imobilias simil, con letos e comodas en la mesma locas en cada casa. La comoda sta contra la mur oposante la porte, e ia es la cosa prima videda par cualun ci entre la casa. Cada de esta casas ia ave la leto plu grande a la lado destra de la porte e la leto plu peti a la sinistra. Lloyd Laing ia nota ce esta ordinada acordada con la costum en la isolas asta la sentenio 20 ce la leto de la sposo ia es plu grande e lo de la sposa ia es plu peti. La descovre de perletas e vasos de pinta en alga de la letos plu peti suporta posible esta interpreta. Plu suporta pote veni de la reconose ce caxas de petra es a la sinistra de la porte, cual forsa la person entrante la casa per verje a la lado destra - la lado "mas" de la casa. A la fronte de cada leto es la truncas de colonas cual pote cisa suporta un baldacin de pelos, un otra lia e la stilo de vive de la isolas plu resente.

Un casa, nomida casa oto, no ave caxas de furnis o un comoda. Lo ia es divideda entre areas cual sembla selulas peti. Cuando esta casa ia es escavada, fratis de petra, oso, e corno ia es trovada. Lo es posible ce esta casa ia es usada per fabrica utiles simple como agos de osos o axas de petra de foco. La presentia de petras volcan danada par calda e cual pare es un duto de fuma suporta esta interpreta. Casa oto es distinguida en otra modos ance: Lo sta separada de la otras e no es ensircada par montones de dejetas, ma es supra tera e ave mures plu ca du metres de spesia. Lo ave un portico cual proteje la entra.

Economia

La popla de Skara Brae ia es xef pastorialistes ci eleva boves e oveas. Childe ia crede orijinal ce la abitantes no ia cultiva, ma escavas en 1972 ia trova granes de seme de un monton cual indica ce los ia cultiva orzo. Osos de pexes e concas es comun en la montones, indicante ce la abitantes ia come comedas de la mar. concas de lapas es comun, e pote es usada como tenta per pexes, mantenida en caxas de petra en la casas. La caxas ia es formida de pesos magra de petro con juntas selida curante con arjila per fa los secur contra acua.

La abandona

Orijinal, Childe ia crede ce la vila ia dati de sirca 500 aec. Esta interpreta ia es cresente dutada asta la escavas nova en 1972 a 1973 ia fini la debata Resultas de esaminas con radiocarbon otenida de samples colieda en esta escavas ia indica ce la ocupa de Skara Brae ia comensa sirca 3180 aec, con ocupa continuante per sirca 600 anios. Sirca 2500 aec, cuando la clima ia cambia e deveni multe plu fria e moiada, la vila pote es abandonada par sua abitantes. Alga teorias sujeste ce un tempesto grande ia resulta en un fini dramosa de la abitada.

Como en Pompeii, la abitantes pare es prendeda par surprise e ia fuji fretante, car multe de sua poseses cara, como la colaretas de dentes e oso, o broxes de ivor de morsa, ia es abandonada. La restas de pesos de carne bon ia es descovreda en alga de la letos, posible partes de la come final de la abitantes. Un fem ia es tan fretante ce sua colareta ia rompe cuando el presa tra la entra magra de sua casa, sperdente un rieta de perletas longo la pasaje a estra.

Ma otra spesialistes no acorda con esta interpreta. Lo pare ce la entera de la vileta ia es gradal e ce lo ia es ja abandonada. La razona no es conoseda.

La loca ia es plu distante de la mar ca lo es oji, e lo es posible ce Skara Brae ia es construida prosima a un lagon de acua fresca protejeda par dunas. An ce la construidas vidable dona un impresa de un intera organica, lo es serta ce un cuantia nonconoseda de plu strutures ia es ja perdeda a la erode de la mar ante la rediscovre de la loca e la proteje seguente par un paramar. Resta noncovreda es conoseda como esistente prosima a un monumento antica en areas aora covreda par campos, e otras, de datas nonserta, pote es videda erodente esta un borda de un presipe un distantia corta a la sude de la area encluida.

Ojetos fabricada

Un cuantia de bales siselida misteriosa ia es trovada a la loca, e algas es esibida en la museo. Ojetos simil ia es trovada tra tota Scotland norde. La ornas spiral sur alga de esta bales ia es liada per sua stilo a ojetos trovada en la Vale Boyne en Er. Simboles simil ia es trovada siselida en linteles de petra e colonas de letos. Esta simboles, a veses nomida "scrives runa", ia es sujetida a traduis controversal. Per esemplo, Castleden ia sujeste ce la "dupuntos" el ia trova entre simboles vertical e diagonal pote represente separas entre parolas.

Masas de ocer roja trovada asi e a otra locas neolitica ia es interpretada como evidente ce pinti de corpo ia es praticada. Nodulos de emitite con surfases multe briliada ia es ance trovada; la surfases briliante sujeste ce la nodulos ia es usada per fini la prepara de cuoro.

Otra ojetos ia escavada de la loca, fabricada de osos de animales, avias, pexes, e balena, ivor de balenas e morsas, e dentes de orcas, inclui agos, cotelas, perletas, axias, spadas, boles peti, e an spinos de ivor tan longa como 25 cm. Esta spinos es multe simil a esemplos trovada en tombas de pasaje en la Vale Boyne, un otra peso de evidente sujestente un lia entre la du cultures. Cotelas "skaill" ia es utiles comun usada en Skara Brae; estas es composada de flocos grande colpada de petras ronda de arenito. Esta tipo de cotelas ia es trovada tra tota Orkney e Shetland.

La escavas de 1972 ia ateni stratos cual ia resta plen de acua e ia conserva cosas cual, en otra situas, ta es destruida. Estas inclui un enrola torseda de erica, un de poca esemplos de corda neolitica, e un manico de lenio.

Locas relatada en Orkney

Un vila, plu peti, esiste a Rinyo sur Rousay. Nonusual, no tombas de la tipo de Maeshowe ia es trovada sur Rousay, e an ce on ave un cuanta grande de monumentos de rocas con salas en la stilo de Orkney-Cromarty, estas ia es construida par la popla de la cultur de vasos de Unstan.

Knap de Howar, sur la isola de Papa Westray de Orkney, es un cultiveria neolitica bon conservada. De sirca 3500 aec a 3100 aec, lo es simil en desinia como Skara Brae, ma de un periodo plu temprana, e es crededa como la construida restante stante la plu vea en Europa norde.

On ave ance un loca corente en construi a Links de Noltland sur Westray cual pare ave similes a Skara Brae.

La "Loca de Erita de Mundo"

"La cor de Orkney neolitica" ia es enscriveda como un loca de Erita Mundal en desembre 1999. Con Skara Brae, la loca inclui Maeshowe, la Anelo de Brodgar, la Rocas Stante de Stenness, e otra locas prosima. Lo es dirijeda par "Historic Scotland", de cual sua "declara de importa" comensa como esta:

___

La monumentos a la cor de Orkney neolitica e Skara Brae proclama la vinses de la spirito umana en edas temprana e locas isolida. Los ia es cuasi contempora con la mastabas de la periodo anticin de Egipte (dinastias un e du), la templos de brice de Sumer, e la sites prima de la cultur Harappa en India, e un sentenio o du plu temprana ca la eda de oro de Xina. Noncomun refinada per sua data temprana, e con evidentes survivente notable rica, esta locas sta como simboles vidable de la atenis de popla temprana distante de la sentros tradisional de sivilia.

___