"La sirculo majial", par J. W. Waterhouse
Un depinta sur un mur de la monceria de Rila en Balgaria
Un desinia par Goya de un fem acusada de sorsoria

Sorsoria es la pratica de capasias majial. La sinifia varia entre cultures e sosias, e donce pote es difisil per defini esata. Suposas intercultural sur la sinifia de la idea debe es aplicada cautia

Istorial e corente en la plu de cultures tradisional tra la mundo, la parola es comun asosiada con los ci usa metodos majial per causa dana a la inosente. En la eda moderna, spesial en la cultur popular en la ueste, la parola pote es plu comun usada per refere a praticas positiva, negativa, o neutra de paganisme moderna.

Crede en sorsoria es plu comun presente en sosias e grupos de ci sua strutur cultural inclui un vista majial de la mundo.

ConsetaEdita

La conseta de sorsoria e la crede en sua esiste ia permane tra istoria arcivida. Los ia es presente o sentral a tempos variosa e en formas multe diversa entre cultures e relijios tra la mundo, incluinte cultures primitiva e multe avansada, e continua ave un rol importante en multe cultures oji.

Istorial, la conseta dominante de sorsoria en la mundo ueste deriva de la leges contra sorsoria de la Atesta Vea de la Biblia, e ia entra la corente major cuando la crede en sorsoria ia gania la aproba de la Eglesa en la periodo moderna temprana. Lo proposa un desacorda fundal entre bonia e malia, con sorsoria videda como jeneral mal e comun asosiada con la Diablo e la adora de el. Esta ia culmina en moris, tortura, e la culpa de algas per mal fortuna, e multe anios de xasas, acusas, e mata de sorsores. La credes cristian en la presente es diversa e estende de crede forte (spesial par fundalistes) a noncrede. De la sentenio 20 media, sorsoria ia deveni la nom per un ramo de paganisme moderna.

En ajunta a cristiania en la ueste, otra sosias ave ance ideas sur sorsoria. Multe cultures continua ave praticas e credes cual pote es incluida en la conseta de sorsoria, con un diversia en sua formas, credes majial, rituos, e rol en sua sosias. En la eda de colonialisme, multe cultures ia es esposada a la mundo ueste moderna par colonialisme, comun presededa o acompaniada par ativia de misionores cristian. En esta cultures, credes relatada a sorsoria e majia ia es influeda par la consetas ueste de la eda. La persegue de sorsores suspetada aveni ancora en la eda moderna.

Suspeta sur medisin moderna cual resulta de credes ce maladias es la resultas de sorsoria continua ance en multe paises oji, cual ia causa multe resultas medical triste. VIU/sido e la virus ebola es du esemplos de epidemicas de infetas comun matante, de cual la trata es impedida par credes rejional en sorsoria. Otra maladias de cual la trata es impedida en esta modo inclui tuberculose, leprosia, epilesia, e ulsera de Buruli.

EncantasEdita

La cualia la plu conoseda de un sorsor es probable la capasia per encanta. Encanta sinifia la modo usada per reali un resulta majial. Un encanta pote es composada de un grupo de parolas, un formula o poesia, o un rituo, o un combina de estas. Encantas ia es tradisional fada par multe metodos, como par la enscrive de runas o otra simboles sur un ojeto per dona acel ojeto potias majial; par la arde o lia de un figur de sira o arjila de un person per afeta lo majial; par la resita de formulas; par la presenta de rituos; par la usa de erbas majial como joalas o en preparas; par regarda mirores, spadas, o otra refletante per divina; e multe otra metodos.

NecromansiaEdita

Necromansia es la pratica de apare la spiritos de la mor per divina o predise, e ia es ance usada per la revive la mor per otra intendes. La sorsor de Endor en la Biblia ia fada lo e es un de la praticas de sorsoria condenada par Aelfric de Eynsham: "Sorsores vade ancora a la crusas de vias e tombas pagan con sua majia deludente e clama a la diablo; e el veni a los en la forma de la om ci es enterada ala, como es leva de moria."

DemonolojiaEdita

En cristiania e islam, sorsoria ia deveni asosiada con eresia e renunsia e videda como mal. En la eda medieval tarda e moderna temprana, la temes sur sorsoria ia deveni multe forte, e a veses culmina en xasas grande de sorsores. La sentenio la plu sinifiante ia es sentenio 15, cual inclui un leva dramosa de teror, cual culmina en la publica de la Malleus Malericarum. deses o sentos de miles de persones ia es matada, e otras ia es prisonida, torturada, escluida, e privada de poseses e imobilas. La majoria de la acusada ia es femes, ma en alga rejiones la majoria ia es omes.

La Malleus Maleficarum (latina per la "martel de la sorsores") ia es un manual per xasa sorsores scriveda en 1486 par du monces deutx, Heinrich Kramer e Jacob Sprenger. Los ia es usada par catolicas e protestantes per alga sento anios, descrivente como un pote identifia un sorsor, cual causa ce un fema es plu probable un sorsor ca un om, como on proba e litiga un sorsor, e como on pote puni lo. La libro defini un sorsor como mal e tipal fema. La libro ia deveni un manual ance per cortes secular tra Europa de la Renase, ma no ia es usada par la Incuisisio, cual ia cauta an contra depende de la obra.

Sorsores "blanca"Edita

Tra la periodo moderna temprana, la terma "sorsor" no ia es sola negativa, ma pote ance indica persones astuta, pd sorsores blanca, sorsores bon, bondisentes, sajas, e simil. Majistes de la popla comun tra Europa ia es ambivalente videda par comunias, e es videda como tan capas de cura como feri. Esta bon sorsores ia es comun persones con sabe de erbas, curores, ma los ia es ance frecuente acusada de sorsoria e persegueda como lo.

Alga de la sorsores blanca ia vide se como reconsiliores entre la mundo comun e la mundo spirital, simil a xamanes de alga cultures de Sibir e otra rejiones. Los ia descrive sua contatas con fes e spiritos par sorti de sua corpos e viaja tra la rejiones de un "otra mundo".