Spetro eletromagnetal

La spetro eletromagnetal es la estende completa de radia eletromagnetal, organizada par frecuentia o longia de onda. La spetro es divideda a bandas separada, con nomes diferente per la ondas eletromagnetal en cada banda. De frecuentia basa a alta estas es: ondas de radio, microondas, infraroja, lus vidable, ultravioleta, raios X, e raios gama. La ondas eletromagnetal en cada de esta bandas ave cualias diferente, como la modo en cual los es produida, como los interata con materia, e sua aplicas pratical.

Un diagrama de la spetro eletromagnetal, mostrante cualias diversa tra la estende de frecuentias e longias de onda.

Ondas de radio, a la fini de frecuentia basa de la spetro, ave la enerjia de foton la plu basa e la longias de onda la plu longa - miles de cilometres, o plu. Los pote es emeteda e resetada par antenas, e pasa tra la atmosfera, folias, e la plu de materias de construi.

Raios gama, a la fini de frecuentia alta de la spetro, ave la enerjias de foton la plu alta e la longias de onda la plu corta - multe plu peti ca un nucleo atomal. Raios gama, raios X, e raios ultravioleta estrema es nomida radia ioninte car sua enerjia alta de foton es capas de ioni atomes, causante reatas cimical. Radia con longia de onda plu longa como lus vidable es nonioninte; la fotones no ave sufisinte enerjia per ioni atomes.

Tra la plu de la spetro eletromagnetal, spetroscopi pote es usada per separa ondas de frecuentias diferente, tal ce la intensia de la radia pote es mesurada como un funsiona de frecuentia o longia de onda. Spetroscopi es usada per studia la interatas de ondas eletromagnetal con materia.