Strutures fundal de linguas
On ave modos diversa per descrive linguas. La prima clasi los longo sua strutures gramatical fundal:
- Linguas isolinte (acc analisal). Estas usa parolas cual no varia, ma los ave regulas sever de ordina de parolas per manteni clar la sinifias gramatical de la parolas. Incluida en esta categoria es xines, indonesian, pijines e creoles. Engles es un lingua infletante (vide a su), ma lo es movente a la isolintes. Linguas isolinte es jeneral fasil aprendeda par adultes, ma no tan fasil par enfantes.
- Linguas aglutinante (acc sintesal). Esta linguas ajunta prefisas e sufisas multe coerente a la parolas major per espresa sinifias gramatical. Estas inclui suomi, turces, nion (japanes), tamil, etc. Los es multe clar e lojical e fasil aprendeda par enfantes.
- Linguas infletante (acc fusal). Estas usa prefisas e sufisas, ma ance cambia parolas en otra modos per espresa sinifias gramatical. Los usa declinas de nomes (pe, en engles, "man", "men", "man's", e "men's") e conjugas de verbos (pe, en engles, "sing", "sings", "sang", e "sung"). Los inclui la plu de linguas indoeuropean e afroasian. E los es difisil aprendeda par enfantes e adultes, car los inclui tipal multe noncoerentes.
- Linguas combinante (acc polisintesal). Esta categoria tende a la usa de parolas complicada cual porta tota la informa cual, en otra linguas, nesesa multe parolas. Los inclui euscara, multe linguas de la americanes orijinal, e klingon. Estas es tipal multe difisil per aprende si on no comensa a nase. La euscaras broma ce los es imune contra la diablo car el no pote aprende la lingua!
Un otra modo de clasi linguas es fundida sur la ordina de parolas en la lingua:
- SOV (sujeto-ojeto-verbo) es prefereda par la cuantia la plu grande de linguas. Los inclui la linguas indoeuropean de Barat (pe hindi e bangla), la linguas dravidian de Barat sude, haiaren (armenian), magiar, turces e sua relatadas, hangugo (corean), nion (japanes), miama (burman), euscara, e la plu de la linguas de la australianes orijinal. Cuasi tota linguas SOV usa posposadas, con la eseta notable de farsi. La plu ave la ajetivo ante la nom. Esetas inclui miama, euscara, e la linguas de la australianes orijinal, en cual la ajetivo segue la nom.
- SVO (sujeto-verbo-ojeto) es la grupo du en grandia, ma lo ave la cuantia la plu grande de parlores. Estas es divideda entre linguas cual usa preposadas e los cual usa posposadas. Entre los cual usa preposadas es la linguas romanica, xcip (albanian), elinica, la linguas bantu, la linguas de Asia sude-este, incluinte cmer, viet, tai, e melaiu, e la linguas germanica. La plu de estas ave la ajetivo seguente la nom ("un enfant terrible"), estra la linguas germanica, cual ave la ajetivo ante la nom ("ein schreckliches Kind").
Entre los cual usa posposadas es xines, suomi e esti, multe linguas nonbantu de africa como mandinca, e guarani, un lingua de la americanes orijinal de America Sude. La tre primas ave sua ajetivos ante la nom, e la otras ave la ajetivos pos la nom. Alga linguistes opina ce xines es deveninte un lingua de SOV.
- Alora on ave la linguas de VSO (verbo-sujeto-ojeto). En eres, per esemplo, on dise "cheannaich mi blobhsa" – "compra me un camisa" en loca de "me compra un camisa". Esta linguas usa sola preposadas. An si los composa un grupo peti, los inclui la plu de linguas semita como ivri e arabi, la linguas celta como eres, gailica, cimri, e bresonica, la linguas polinesian, e alga linguas de la americanes orijinal como cuaciutla (de Canada ueste) e nauatla (de Mexico sentral). La plu de linguas de VSO pone la ajetivo pos la nom, estra la du linguas american.
Sola un cuantia peti de linguas pone la sujeto pos la ojeto. Alga linguas de la americanes orijinal de la norde-ueste de la SUA e Canada usa VOS. Ma alga usa preposadas e ajetivos ante nomes, e alga usa posposadas e ajetivos pos nomes.
On ave ance linguas cual usa plu ca un de esta sistemes. La plu notables es tagalog e engles. Ance, alga linguas infletante, como rusce e latina, permete ordinas variosa de parolas.