Sur la vole libre

La conseta de vole libre no es tan popular resente. La susede clar de siensa, e la suposas materialiste, deterministe, e reduiste cual tipal acompania lo, ia fa ce vole libre pare de moda pasada, asosiada plu con teolojistes antica ca persones moderna. Ma la conseta no es posible iniorada.

On debe comensa par esplica cual vole libre es, e cual lo no es. Vole libre no es la mesma como libria de ata. Libria de ata refere a cosas cual preveni un ata voleda de deveni realida. Per esemplo, si on es prisonida sinifia ce on no es libre per vade a la site per bevi con tua amis. Si on es en un camison de restrinje, on no es libre per tricota un xarpe. Si on es paraliseda, on no es libre per move tua membros. Ma estas no es casos de vole libre. Vole libre sinifia ce on es libre per atenta evade de prison, tricota un sueter, o move tua membros. Con vole libre sinifia ance ce on es libre per no atenta esta atas.

Vole libre es ance no la mesma como libria political o sosial. An si on pote es esecutada per maldise la tirano de la momento, no sinifia ce on no es libre per atenta o an libre per fa lo (o libre per no atenta lo). Seguentes fisical, como esecuta, no es aplicable.

A la otra lado de la debate, on debe nota ce determinisme no es la mesma cosa como destina, predestina, o predeterminisme. Determinisme sinifia ce la situa a un momento es la resulta de la situa un momento a ante. Lo sinifia ce cada efeto ave sua causa, e cada causa ave sua efeto. Lo sinifia ce no cosa, an vole, es escluida. Ma lo no sinifia ce la futur es ja serta.

Vole libre es un caso de intende: La prosedes de persepi, pensa, e emosia en cual nos partisipa cuando nos fasa un eleje resulta en un intende per fa alga atas (o nonatas) spesifada. Per esemplo, si me ave ante me un tarte con pomas e un tarte con peras. Me regarda lo, me ensofla sua odores, me considera esperias pasada con estas, me senti bon sur ambos posibles, e alora me eleje la un o la otra. A acel momento, me intende come la un o la otra. Esce me es libre per come lo, o si me pote espeta puni sever per come lo, no es importante: me ia deside!

Nos debe regarda la razonas cual suporta vole libre, segueda par la respondes de un deterministe. Car la person ci suporta vole libre es presentante un declara, la carga de demostra es sur el.

Prima, on ave la razona de esperia. Me esperia alga cosa en me cual me comprende como la deside de elejes, e ce acel desides no es determinada par cualce cosa esta me mesma.

La deterministe ta responde ce tu es simple no consensa de la causas de tua desides, e tu ia nomi acel iniora "vole libre". On ave, sin duta, neurones conduinte sua siniales e cimicas volante ultra sinapses, etc, e tota esta ativia resulta en un modo deterministe en me eleje la tarte de pomas.

La volelibriste pote sujesta ce crede es un parte esensal de vole libre. Si tu ta pone me fasante la du tartes, sabente ce me tende eleje tartes de pomas, tu pote serta dise ce la resulta ia es determinada. Ma si me ta sabe ce tu ia es atentante demostra tua determinisme, me ta deside simple sur la tarte de pomas, e no tarte de cualce tipo.

La deterministe ta dise ce esta pico plu de sabe - ce me es atenta truci tu - ia repone tua fatores causal plu comun. En loca, tu es reatante, multe mecanical, a un menasa a tua credes.

Posible, dise la volelibriste. Ma tu debe aseta ce me pote e multe acaso a veses. Me pote subita lansa me de mea seja e clama "Tippecanoe e Tyler ance!" multe forte. Me defia tu per predise alga cosa como acel!

La deterministe ta responde ce nondeterminisme no es la mesma como vole libre. Si acel es la tota de vole libre, alora un rota de roleta es plu capas a lo ca tu.

Ma me es nonpredisable, dise la volelibrist.

La deterministe ta indica ce acel es sola un problem de pratica, no de filosofia. La realia ce me no pote indica la loca e rapida esata, per esemplo, de tota particulas en la universo, no sinifia ce tu no es determinada par los. En fato, an si acel ia es nonposible (como sujestada par la prinsipe de nonsertia de Heisenberg), lo sola sinifia ce me no pote predise, no ce tu ave vole libre!

La volelibriste pote indica ce, sin vole libre, moralia no ave cualce sinifia. Tota la cosas la plu bon de umanas - jenerosia, coraje, compati - ta ave no sinifia. Si nos es tan determinada como brices cadente, alora Adolph Hitler no pote es culpable per sua atas mal ca Madre Teresa pote es lodada per sua atas bon. Alora cual de nosa mundo?

Simple, dise la deterministe. Nos ta debe vive sin moralia. Multe persones es ja moral relativistes, o an moral nihilistes. Nosa sosias vade bon con leges e prosedes de judi e prisones, usante no plu ca tradision, egoisme de la majoria, resiprocia, e la lege de covre-sua-culo. Posible esta es tota cual moralia ia es sempre!

Un otra razona ce un volelibriste pote usa es ce nos ave un capasia unica per para e pensa sur un situa de eleje. Nos pote sorti de la curso de causa-e-efeto per un momento. Nos pausa ante la come de multe calorias per considera la beneficas de lo. Animales no fa esta: Si un leon fame ave un antilope ante el, el come. E nos pote pospone un deside per tan longa como nos gusta. An si la deside es determinada, la longia de nosa espeta no es determinada.

No? dise la deterministe. Cual ia causa tu per espeta esata un minuto ante deside? O cual ia causa tu per para sua pausa e comensa ata a esata acel momento? An tal, esce esta pausa no sola un caso de un sircuito corta de la prosede normal entre du fortias egal?

Jean-Paul Sartre, la filosofiste franses, ia presenta un razona interesante per vole libre. El ia dise ce nos pote iniora alga cosa real e nos pote finje alga cosa nonreal. Per esemplo, me pote imajina ce on no ave un tarte ante me - un imajina me nesesa comun en la servi de dieta. O me pote vide larvas de moscas en la tarte. Esta imajina es un cosa potiosa! Ma la deterministe ta dise ce imajina es no plu ca un plu macina neurolojial, esplicable par prinsipes deterministe.

On debe nota ce, an si la vole-libriste no ia gania cualce puntos en la debate asta aora, la deterministe ia pone se en un posa plu defendente. Alga de la "carga de demostra" es movente a la lado de la deterministe. Per esemplo, el ia dise ce imajina es alga cosa fisical. Esta es un declara ce nos no debe simple aseta: On pote defia ce el demostra la validia de sua declara.

Un otra funda posible per vole libre es crea. Me pote crea un posible nova. Me no nesesa resta con un eleje entre du tipos de tarte. Me pote lansa los en la sesto de dejeta e come un saco de ceso-fugus. O me pote crea un tarte nova. O me pote misca la du como un tarte bateta.

Natural, la deterministe, ci deveni alga iritante aora, ta dise ce crea es sola un parola nos usa per la avenis neuronal nonconsensa cual surprende an nos mesma - un acaso. Si algun ta paso sur tua tarte par acaso, nun ta nomi la gaxa sur sua sapato un crea nova.

(Serta, la deterministe declara aora ce crea es mecanical - alga cual el pote es defiada per defende.)

Posible on pote difere entre causas e razonas? Cuando me vade a la boteca per compra un amburger, esce lo mecanica de causa-e-efeto cual ia condui me ala? Esce la ronci en mea stomaco cual forsa me en mea auto, la vide de la boteca cual causa ce me turna mea volante? O posible me ia nota mea apetito e alora developa un projeta: Rexerca mea lista de delicatas, deside sur un amburger, gida mea auto intendente a la boteca, e demanda per un amburger? Esce me, en otra parolas, "puxada de pos" par causas, o esce me segue mea razonas?

En psicolojia, esta es nomida teleolojia (no esata la mesma en filosofia). En loca de reata a un stimula nos projeta un situa futur cual nos prende como un gol. La lia entre causa-e-efeto es nesesa. Ma on no ave cualce nesesadas en intendes. Los pote es atenida - o no.

Ma la deterministe ta responde con la mesma razonas cual el ia usa per imajina e crea: Tua persepis e pensas e emosias, tua esperias pasada, condui tu nonevitable a tua pensa de un gol e tua atas per ateni lo. Lo sola pare a tu ce tu es libre de nesesa.

Un plu atenta per vole libre: Posible, cuando nos developa de bebes a adultes, nos separa de la mundo. Nosa prosedes causal deveni cresente plu autonom de la prosedes causal estra nos, spesial en la mente. Un fesur developa cual permete ce nos es influeda par la situas a estra, ma no ce nos es determinada par los. Esta fesur es como un om a la riva oposante de un rio ci clama a tu, brandi sua mano, usa siniales, etc. Ma el pote fa esta cosas, e no afeta nos direta. Ma nos pote atende a el o interprete sua siniales e trata sua atas como informa per ajunta a tota la informa cual nos ia colie tra nosa vives, e usa acel informa per gida nosa desides - influeda, ma no causada.

La bebe comensa sua vive cuasi tan intima liada con sua mundo como en la utero. Par la fini de vive, alga de nos es nonpermeable a cual otras pensa de nos, pote leva supra cualce menasa o promete seduinte, pote iniora cuasi cualce urje o dole. En un grado, nos es ancora determinada - determinada par acel person developante cual nos es, determinada par se mesma. Ma no otra cosa en nosa situa presente, o an en nos pasada a alga momento en enfantia cuando la fesur ia es prima tota realida, es plu ca informa per usa en desides.

Serta. la deterministe pote responde a esta idea ance. Ma aora el es tan multe a la defende ca la volelibriste. Posible, la escutor nondesideda pote comensa condui ce la declara deterministe - "no cosa es libre!" es la declara plu estrema, min razonada.

Conclui

La debate entre vole libre e determinisme es, a un grado, un debate falsa. Ambos ia es reduida a "omes de palia", razonas fasil destruida, par suprasimpli. Per esemplo, vole libre no es la libre per iniora la leges de natur, e determinisme no sinifia ce tota es serta. Posible nos pote developa un conseta nova cual aseta la complica de la person e sua interata con la mundo. En loca de vole libre contra determinisme, nos pote adota la espresa usada par Albert Bandura: autodetermina.

Un adulte ave multe anios de esperias - la esperias de enfantia, la erita cultural, la libros lejeda, conversas con amis, pensas solitar - tota cual ia construi la person asi oji. Tota esta es sur la jeneticas unica e otra realias fisical de ci on es. La avenis cual on esperia aora es esperiada tra esta masa de unica, e respondes depende, no sola de la situa presente, ma de tota cual on es. Esta no es "vole libre" asoluta, ma lo es serta autodetermina.

Si nos posese esta libria (alga limitada), nos posese ance un culpablia (alga limitada) per nosa atas. Per la plu de adultes, on pote dise ce ci on es inclui la conseta moral fundal e un respeta razonante per la leges donada a nos par nosa jenitores e otras. Esta cosas es un parte ce cual nos es, e es otenable a nos cuando nos deside per ata en un modo o un otra. Nos es donce culpable si nos iniora esta consetas. En la tradisiones de lege, on debe determina si un person sabe vera la difere entre bon e mal, e si la person ave la maturia o la capasia mental per eleje bon en loca de mal.

En otra parolas, nos no debe es "supra" la mundo natural per ave un grado de libria "en" acel mundo.