Táin Bó Cúailnge

Rea Maev [1]
Cú Chulainn [2]

Táin Bó Cúailnge (pronunsia eres: [t̪ˠaːnʲ boː ˈkuəlʲɲə], ~tain bo cualnia), o "La saisi de la boves de Cualnia", es un nara lejendal de la leteratur temprana de Er cual es frecuente videda como un epica, an si lo es scriveda xef en prosa en loca de poesia. Lo descrive un gera contra Ulaid par la rea de Connachta, Medb (~meu) e sua sposo Ailill, ci intende fura la bove mas fertil nomida Donn Cuailnge, e es oposada sola par la eroe de Ulaid, Cu Chulainn (eres: [kuːˈxʊlˠɪnʲ], ~cuhulin).

La Tain aveni tradisional en la sentenio prima en un eda precristian, e es la testo sentral de un grupo de naretas conoseda como la Sicle de Ulaid. Lo survive en tra varias scriveda en manoscritos de la sentenio 12 e plu tarda, la colie prima scriveda xef en eres vea, la colie du, e plu coerente, en eres media, e colie tre un varia en eres temprana moderna.

La prima colie comensa con Ailill e Medb asembla sua armada en Cruachan. La colie du ajunta un prefasa en cual Ailill e Medb compara sua ricas e trova ce la sola distinguinte entre los es la posese par Ailill de un bove Rinnbhennach, ci ia nase en la manada de Medb. Ma la bove ia es iritada par es poseseda par un fem e alora desideda per transfere se a la manada de Ailill. Medb deside ce el pote deveni egal a Ailill si el pote oteni la bove Donn Cuailnge de la Cualnias. El negosia susedosa con la posesor de la bove, Dáire mac Fiachna, per lua la bove per un anio. La negosia rompe par la desfida de Daire, e Medb asembla un armada per catura Donn Cuailnge.

La omes de Ulnaid es descapasida par un maladia - la ces noinden (maladia de nove dias, an si lo dura alga menses). Un otra nareta esplica esta como la maldise de la diva Macha, ci ia es coler par es forsada par Conchabar, la re de Ulnaid, per compete contra un caro cuando multe ensinta. La sola person ci es capas de defende Ulnaid es Cu Chulainn (con sola 17 anios), aidada par sua caror Laeg, e el comensa un gera de gerilia contra la armada avansante. El para la avansa par clama la dirije per combate singular a rios basa. El defeta un campion pos un otra en un nonprogresa cual dura menses. Ma el no es capas de preveni Medb de catura la bove.

Cu Chulainn es e aidada e impedida par figures supranatural. Ante un combate, la Morrigan visita el en la forma de un fem joven bela ci ofre sua ama a el, ma el rejeta la fem. La fem revela se alora e menasa el con interfere en sua combata seguente. Prima, el cambia a un angila ci tropeza la eroe, e alora a un lupo ci panica la manada tra la rio basa, e final a un fem vea, prende lete de un bove, con feris cual coresponde con la feris cual Cu Chulainn ia dona a el en sua formas animal. La fem ofre tre bevis de lete a el, e con cada bevi, el bondise la fem, e la bondises remedia la feris.

Pos un combate spesial difisil, el es visitada par un otra figur supranatural, Lugh, ci desembla se como la padre de Cu Chulainn. Lugh causa ce Cu Chulainn dormi per tre dias per usa sua artes de remedia sur el. En cuando Cu Chulainn dormi, la corpo de jovenes de Ulaid veni per aida el, ma tota es matada. Cuando Cu Chulainn velia, el esperia un riastrad o contorse de sua corpo, cual torse en sua pel e deveni un monstro nonreconosable ci conose no ami e no enemi. El ataca la campo de Cualnia e venja la corpo de jovenes ses veses.

Pos esta aveni strana, la segue de combates singular continua, an si a alga veses, Medb rompe la acorda par envia plu ca un om contra Cu Chulainn. Cuando Fergus, la padre tempora adotante, es enviada per combate el, Cu Chulainn dise ce el ta sede a Fergus, si Fergus ta sede a el cuando los encontra lunlotra denova. Final, el ave un combate multe difisil, fisical e emosial, de tre dias entre la eroe e sua frate par Fergus e sua ami la plu bon, Ferdiad. Cu Chulainn gania, matante Ferdiad con la lansa de lejendas, la Gae Bolg.

Ultima, la omes de Uliad comensa leva se, un par un a prima, alora en masa, e la batalia final comensa. A la comensa, Cu Chulainn no partisipa en cuando el recovre de sua feris. Fergus menasa Conchabar ma es prevenida de mata el par Cormac Cond Longas, la fio de Conchobar, e la fio tempora de Fergus, e en sua furia talia de culminas de tre colinas con sua spada. Final, Cu Chulainn entra la combata e fasa Fergus, ci respeta sua promete e sede a el, traente sua forsas de la campo. La otra alias de Cualnia panica e Medb es forsada a retira. Ma Medb pote trae Donn Cualnia a Cualnia, do la bove combate e mata Finnbhennach, ma el reseta feris matante, e vaga tra Er, creante nomes de locas ante reveni final a sua propre casa per mori de fatiga consumante.

La imaje de Cu Chulainn morinte, liada a un poso donce an en mori es pote fasa sua enemis stante, un posa cual ia es adotada par la republicistes eres de la sentenio 20 temprana, no veni de la Tain ma de un nara plu tarda. Ma lo ia es asorbeda en alga varias parlada de la Tain, en cual Cu Chulainn, como Don Cualnia, mori de feris resetada en sua duel final con Ferdiad.

ReferesEdita

  1. T. W. Rolleston, Myths & Legends of the Celtic Race, 1911; desinias par J. C. Leyendecker
  2. T. W. Rolleston, Myths & Legends of the Celtic Race, 1911; desinias par J. C. Leyendecker