Tasonomia de Lineo

La tasonomia de Lineo, o clasi biolojial, es un metodo par cual biolojistes clasi organismes par tipos biolojial, como jenero o spesie. La orijina de clasi biolojial es en la laboras de Carolus Linnaeus (o Carol Lineo), ci ia clasi spesies longo sua cualias fisical. Esta clasis ia es revisada pos la laboras de Charles Darwin per segue la prinsipe de desende comun. La analise de ADN ia causa revisas plu resente, e va continua probable.

On ave oto niveles major: domina, rena, filo (o divide), clase, ordina, familia, jenero, e spesie. La jenero plu la spesie descrive jeneral un clasi de viventes cual pote reprodui con lunlotra.

Sufisas

Grado	Plantas	Algas	Fungos	Baterias	Animales
Divide/Filo	-phyta / -fita		-mycota / -micota
Sudivide/Sufilo	-phytina / -fitina		-mycotina / micotina
Clase	-opsida / -opsida	-phyceae / -fisea	-mycetes / -miseta	-ia / -ia
Suclase	-idae / -ida	-phycidae / -fisida	-mycetidae / -misetida	-idae / -ida
Supraordina	-anae / -ana
Ordina	-ales / -ala
Suordina	-ineae / -inea
Infraordina	-aria / -aria
Suprafamilia	-acea / -asea				-oidea / -oideo
Epifamilia					-oidae / -oido
Familia	-aceae / -asea				-idae / -ido
Sufamilia	-oideae / -oidea				-inae / -ino
Infrafamilia					-odd / -odo
Tribu	-eae / -ea				-ini / -inio
Sutribu	-inae / -ina				-ina / -ino
Infratribu					-ad / -ado

Nota ce, per la animales, la finis de la nomes de categorias alta no es coerente.

Jenero e spesies

Un vivente es normal indicada par du nomes – la jenero e la spesie – o par tre nomes – jenero, spesie, e suspesie. La jenero es normal un nom e comensa con un letera major. La spesie (e suspesie) pote es un nom, un ajetivo, o an la nom propre de la siensiste ci ia descovre o clasi orijinal la vivente, e lo comensa con un letera minor. Per esemplo:

• Equus hemionus > Ecuo hemiono > asino asian
• Equus africanus > Ecuo africano > asino african
• Equus zebra > Ecuo zebra > zebra de montanias
• Equus ferus caballus > Ecuo fero cabalo > cavalo domada
• Equus quagga burchellii > Ecuo cuaga burchelli > zebra de Burchell
  • (nota como la spele de la nom propre - Burchell - no es cambiada, estra la ajunta -i)

Respele

Esta sistem es internasional asetada par biolojistes, en la forma latina, usante la 26 leteras de la alfabeta roman completa, e sin la usa de sinietas. Multe linguas ave un sistem paralel cual usa sua propre spele e pronunsia. La sistem paralel per elefen segue esta regulas: [nota: elinica/latina > elefen]

• consonantes:
  • ch > c
  • ph > f
  • rh > r
  • th > t
  • c pronunsiada s > s
  • g pronunsiada j > j
  • k > c
  • q > c
  • x es retenida e pronunsiada como x en lfn, no como cs
• vocales e semivocales:
  • ae > e
  • ei > e
  • oe > e
  • ou > o
  • w > u
  • y > i

La finis de la nomes siensal per animales (a supra) es tipal cambiada a -o, con la plural en -os. Alga finis comun:

• -ato < -ata
• -formes, -formia > -formo
• -idea > -ideo
• -idae > -ido
• -inae > -ino
• -ii, -ia > -io
• -morpha, -morphia > -morfo
• -ptera > -tero

Finis de nomes de spesies o jeneras segue esta regulas:

• -us, -um, -u, -os, -on > -o
• -a, -as > -a
• -e, -es > -e
• Nomes cual fini con "-is", "-ix", o "-ex" no cambia
• Un caso spesial: -zon (< -zoa), adotada de la singular -zoon en elinica

La finis de la nomes siensal de grados alta de plantas, etc, es jeneral cambiada a -a, con la plural en -as. Alga finis comun:

• -phyta > -fita
• -idae > -ida
• -acea > -asea
• -doneae > -donea
• -ales > -ala

Finis per spesies e jenera de plantas, bateria, etc, segue la mesma regulas como animales.