Telanjectasia

Telanjectasias es dutos sangual dilatada prosima a la surfas de la pel o membranas mucosa, con un diametre entre 0.5 e 1.0 milimetre.

Telanjectasias, comun nomida "venos aranian"

Esta dutos dilatada pote developa a cualce loca sur la corpo, ma es plu comun videda sur la fas sirca la nas, jenas, e mento. La dutos pote ance developa sur la gamas, an si, cuando los aveni sur la gamas, los ave comun un funda de reflue venal. Cuando sur la gamas, los es trovada spesial sur la coxa alta, su la jeno, e sirca la talo.

Multe pasientes ci sufri con telanjectasia xerca la aida de medicistes ci spesiali en maladias de la venos o vasculal periferial. Esta medicistes es nomida sirurjistes vasculal o flebolojistes. Plu resente, radiolojistes interveninte ia comensa trata problemes venal.

Alga telanjectasias es la resulta de nonormalias de developa cual pote imita prosima la condui de neoplasmas vasculal nonosiva. Los pote es composada de agregas de arterietas, capilares, o venetas. Car telanjectasias es lesiones vasculal, los blanci cuando probada con diascopia.

Telanjectasia es un parte de la varia de scleroderma limitada, cual inclui ance calsinose, fenomena de Raynaud, disturba de peristalsia esofagal, sclerodatilia, e telanjectasia (comun cortida como CREST).