Abri la menu xef

La idea fundal de tenisEdita

 
Foto: Tenis en Wimbledon 2004

Tenis (engl. tennis) pote es juada a du modos:

1) individual (engl. single), lo es un contra un, o

2) duple (engl. double), lo es du contra du.

La testo seguente nara sur la tenis individual, ma la idea e la pratica es multe simil en ambos modos. Tenis es juada sur un campo de tenis (engl. tennis court), un area retangulo. La campo es divideda a du areas, un per ambos juores, con un rede (engl. net). La juores colpa un bal (engl. ball) con un raceta (engl. racket) per move la bal de la propre area a la area oposante. Afin no fali (engl. fault), la juor debe colpa la bal a tal modo, ce la bal - si volante libre - vola supra la rede e cade entre la linias indicante la area oposante. Pos un colpa susedosa par un juor, la otra juor debe colpa la bal a retro. La bal es normal colpada pos sua rebondi prima (engl. first bounce). La juor pote ance colpa la bal ja ante la rebondis. En esta caso on nomi la colpa un volea (engl. volley). Un colpa pos la rebondi du es un fali!

La strutur de la "batalia" en tenisEdita

  • Un max o encontra (engl. match) de tenis es composada de (a la min 2) partales o setes (engl. sets).
  • Un partal es composada de (a la min 6) juas (engl. games).
  • Un jua es composada de (a la min 4) puntos (engl. points).

Un jua e sua puntosEdita

En tota puntos de un jua, la mesma juor - nomida servor (engl. server) - comensa la punto par servi. Esta es: el lansa la bal a air e colpa lo dirijente lo ultra la rede a sur un area limitada de la campo, nomida caxa de servi (engl. service box). Alora la otra juor, la resetor (engl. receiver) va colpa la bal. En cada punto la servor ave du posibles de servi. Si la servi prima fali, el pote servi denova. Si ance la servi du fali, la resetor gania la punto par la fali duple (engl. double fault) de la servor. Un servi legal comensa normal un intercambia de colpas (engl. rally), cual continua asta cuando un de la juores

a) fa un colpa nonlegal, o

b) no pote an toca la bal colpada legal par la oposor.

En ambos casos la oposor gania la punto.

Un intercambia pote es longa - an plu ca 30 colpas. La otra estrema es un as (engl. ace), un servi tan bon ce la resetor no pote toca la bal

Per gania un jua la juor debe gania a la min cuatro puntos. A plu la difere - marjinal - debe es a la min du puntos. La puntos ganiada es indicada en un modo alga strana, seguente:

  • no punto: 0 (engl. love)
  • un punto: 15
  • du puntos: 30
  • tre puntos: 40

On indica prima la conta de la servor.

Per esemplo 40-30 dise ce la servor ave tre puntos e la resetor du puntos. En esta situa la servor nesesa gania mera la punto seguente afin gania la tota jua. On nomi la situa un punto de jua (engl. game point). Si la servor gania la jua, on dise ance ce el teni sua servi (engl. keeps his/hers serve).

Un otra esemplo: 15-40 dise ce la servor ave un punto e la resetor tre puntos. Si aora la resetor va gania un de la du puntos seguente, el va gania ance esta tota jua. Alora on dise ce la resetor ave du puntos de rompe (engl. break points), o du posibles a rompe la servi (engl. break the serve).

La situa 40-40, nomida egal (engl. deuce) es interesante. Afin oteni un marjinal de du puntos, on debe gania du puntos en segue. La juor ci gania la punto seguente, oteni la vantaje (engl. advantage). Alora el debe gania ance la punto seguente. Si no, la situa va es ancore egal, e la jua va continua de asi.

Pos un jua finida - ganiada par un de la juores - on comensa un jua nova. La juores cambia la roles de servor e resetor. (La servor de la punto prima de la tota max es desideda par lansa un mone.)

Un partal (o set)Edita

La situa en un partal es indicada con contas de la juas ganiada. Per esemplo 4-2 indica ce un juor ave 4 juas e la otra ave 2 juas. Per gania un partal la juor debe oteni a la min 6 juas con un marjinal de a la min du juas. Alora pe 6-3, 6-4 e 7-5 es situas posible per un partal finida.

En la situa 6-6 on no (jeneral) continua la partal a la modo normal. On fini la partal par un jua spesial, nomida un jua desidente o rompe-lia (engl. tie-break):

Afin gania un rompe-lia la juor debe gania a la min 7 puntos con un marjinal de a la min du puntos. Asi on no usa la scala "0, 15, 30, 40", ma indica la situa con contas de la puntos ganiada. Alora pe 7-3, 8-6 e an 13-11 es posible per un rompe-lia finida. Nota ce en un rompe-lia la servores alterna: la servor es cambiada pos la punto prima, alora sempre pos du plu puntos. Un partal finida par un rompe-lia es rejistrada 7-6 nondependente de la ateni en la rompe-lia.

Note ance ce on ave alga situas, do on no usa un rompe-lia. Vide "un max"!

Un punto de partal (engl, set point) es un situa, do un de la juores ave un posible a gania la partal par gania mera esta punto; per esemplo si la juor ci domina (engl. is leading) la partal con 5-3, oteni la situa 40-15 en la jua seguente.

Un max (o encontra)Edita

Normal, on jua per la plu bon de tre. Lo es: la vinsor es la juor ci gania du partales. Alora la atenis posible es 2-0 e 2-1.

Sola en la torneos la plu importante, la omes jua per la plu bon de sinco. Alora la atenis posible es 3-0, 3-1 e 3-2.

Lo es abituada rejistra la ateni de la max, de partal a partal, per esemplo:

6-4, 6-7, 7-5 (en un max per la plu bon de tre)

Asi, la numeros prima indica sempre la juas ganiada par la vinsor.

Un punto de max (engl. match point) es un situa, do un de la juores ave un posible a gania la tota max par gania mera esta punto; pe si la juor ci domina la partal desidente con 5-3, oteni la situa 40-15.

Nota: En alga torneos multe importante on no usa rompe-lia en la partal desidente, si la contas de partales es egal. En tal caso la partal desidente es continuada de 6-6 asta cuando la marjinal es du juas. Per esemplo la ateni de un max pote es 6-3, 5-7, 10-8.

On ave ance otra sistemes, rara usada. Per esemplo, en un situa egal on pote sustitua la tota partal desidente par un rompe-lia de max (engl. match tie-break), do on jua per oteni 10 puntos con un marjinal de du.

La campo de tenisEdita

 
La mesuras de la campo


Tenis es juada sur un campo, 23,77 metres (78 pedes) de longia. En la maxes individual la largia de la campo es 8,23 metres (27 pedes). En la maxes duple la largia de la campo es 10,97 metres (36 pedes). La lado la plu grande es divideda a du partes egal con la rede, 1,07 metres de altia a la palos de la rede e 91,4 sentimetres (tre pedes) de altia a la media.

On ave tre tipos xef de campos de tenis: campo con basa dur, campo sur erba, e campo sur arjila