Tiwi (lingua)

Tiwi es un lingua australian orijinal parlada par la popla tiwi a la isolas Tiwi, de cual on pote vide la costa de Australia norde. Lo es un de sirca 10% de linguas australian ancora aprendeda par enfantes. Tiwi tradisional, parlada par persones ci ave plu ca 50 anios (per 2005), es un lingua polisintesal. Ma esta complica gramatical ia es perdeda par la jeneras plu joven. Tiwi ave sirca 100 nomes cual pote es asorbeda en verbos, la plu de los diferente de la formas libre corespondente. Tiwi ia es regardada como un lingua isolida.

Fix:Tiwi Islanders flag.svg

La bandera de la popla tiwi

Fonolojia

	Labial	Alveolal	Retroflexe	Velal	Palatal
Esplodente	p [p]	t [t]	rt [ʈ]	j [t̠] ~ [t̪]	k [k]
Nasal	m [m]	n [n]	rn [ɳ]	ny [n̪]	ng [ŋ]
Roin		rr [r]	r [ɻ]
Ladal		l [l]	rl [ɭ]
Aprosimante	w [w]			y [j]	g [ɰ]

Plu, tiwi ave un aprosiminte velal, cual es noncomun per linguas australian. Ma tipal per linguas australian, on ave no fricantes. Tiwi permete grupos de consonantes en la loca media. Estra la usa posible de /ɻt/ per [ʈ], estas inclui otra grupos licuida-esplodente, como /mp/. Ma on ave poca razona per eleje entre un analise de /mp/ como un grupos e no un esplodente nasalida. On ave ance un esplodente glotal (ʔ), ma lo es usada per marca la fini de un frase.

Tiwi ave cuatro vocales:

	Fronte	Sentral	Dorsal
Cluida	i		u
Abrida		a	o

La frecuentia de la vocal abrida-retro /o/ es basa. Lo es neutrida con /a/ seguente /w/, e no aveni a la comensa o final. Ma duples minima esiste per mostra lo como un fonem distinguida:

/jilati/ cotel
/jiloti/ sempre

Cada vocal mostra un estende grande de alofones, e multe de cual suprapone con la alofones de otra vocales, e tre vocales (/i/, /a/ e /u/) redui a /ə/ en multe silabas nonasentuada. Tota vocales es corta, ma vocales longa aveni cuando liscantes media es reduida. Per esemplo:

/paɻuwu/ [paɻu:] (nom de loca)

Morfolojia

Tiwi es marcada par sua complicada morfolojia verbal. Lo es un lingua polisintesal con un usa grande de asorbe de nomes a un grado en cual tota elementos de un frase pote es espresada en un sola parola morfolojial e fonolojial, como en esta esemplo:

jinuatəməniŋilipaŋəmat̪at̪umaŋələpiaŋkin̪a
- El veni e fura mea miel savaje esta matina en cuando me ia es dorminte

Sirca 100 nomines pote es asorbeda en la verbo en tiwi, ma la formas asorbeda frecuente difere multe de la formas libre corespondente, o en sua corespondente la plu prosima semantical:

Forma asorbeda	Forma libre	Tradui
-maŋu-	kukuni	'acua fresca'
-ki-	yikwani	'foco'
-kəri-	yikara	'mano'

Osborne (1974) identifia 11 categorias gramatical cual pote es marcada en verbos. Los ia es listada a su usante sua terminolojia. Tota verbos debe es marcada per tempo, person, e cuantia. Sujetos e ojetos de person tre singular es ance obligada marcada per seso. Tota otra categorias a su no es obligada.

Person - ator o pasiente
Cuantia - singular o plural
Seso - mas o fema
Tempo - pasada, nonpasada, futur
Aspeta - durante, repetente, movente, inisiante, o espetante.
Modo - direta (nonmarcada), comanda, sujuntiva, compulsante, o noncompleta
Vose - refletante, resiproca, colieda, causante
Loca/dirije - a un distantia, de un distantia
Oro de dia - matina, sera
Posa - stante o paseante
Asentua - comandas (elejable)

Como multe linguas australian, tiwi no distingui entre nomes e ajetivos. Ambos cosas e cualias de acel cosas es en la clase nomin. Nomines en tiwi es marcada per mas, fema, e plural (sin seso distinguida).

Seso es asiniada per umanas e animales, ma asiniada a cosas nonvivente par la forma: Cosas magra, peti, e reta es asiniada a la seso mas, e cosas ronda, grande, e plen es asiniada a la seso fema. Donce, nomines en tiwi pote ave sesos diferente dependente de la contesto e refere. Erba, per esemplo, es mas cuando on refere a un folia de erba, ma fema cuando on refere a un area de erba.

Nomes mas es marcada par o -ni o -ti, e nomes fema es marcada par o -ŋa o -ka. Plu, multe nomines es esensal mas o fema e no es marcada. Ma, car nomines cual sinifia cualias sempre ave la sufisas de seso indicada cual acorda con sua ojeto, la seso de esta nomes pote es videda.

Nomines en tiwi pote es marcada per cuantia par o -wi o -pi. La sufisas pleni la mesma loca como la sufisas de seso, e donce, plurales no contrasta per seso. Alga nomines ave partal redupli de la talo cuando pluralida. La forma de la redupli es sempre Ca-. Done, muruntani (om blanca) e muruntaka (fem blanca) plurali a mamuruntawi (persones blanca).

La clase umana e la clase nonumana es indicada par un sufisa a numeros, ma no a la nom mesma:

	Umana	Nonumana mas	Nonumana fema
du	juraɻa	jiraɻa	jin̪t̪aɻa
tre	jurat̪ərima	jirat̪ərima	t̪at̪ərima

Tiwi moderna

De contata con europeanes, tiwi ia esperia cambias a sua strutur cual ia resulta en un varia moderna de la lingua cual es distinguida tipolojial de tiwi tradisional. Esta cambias ia afeta la morfolojia de verbos e la vocabulo de tiwi, resultante en un lingua cual es plu isolinte, comparada con sua asendente polisentesal.

Contata con engles ia resulta ance en un cuantia de otra varias de tiwi, como tiwi de enfantes e tiwi-engles, en cual persones tiwi ave niveles variosa de espertia. En 1993, tiwi tradisional ia es parlada sola par persones plu ca 55, con tiwi moderna parlada par tota asta 30 anios.

La cambia xef cual separa tiwi tradisional e moderna es la complica de la verbo. Tiwi tradisional es un lingua polisentese, en cuando tiwi moderna es isolante con alga infleta. La esemplos a su mostra la difere:

Tiwi tradisional:

(Nyirra) ampi-ni-watu-wujingi-ma-j-irrikirnigi-y-angurlimay-ami.
- (she) el.NPST-LOC-matina-CONT-con-CV-lampa-CV-pasea-MOV
- El (la sol) es brilia ala en la matina
- (leteral: El es paseante ala en la matina con un lampa)

Tiwi moderna:

Japinara jirra wokapat ampi-jiki-mi kutawu with layit.
- matina el pasea el.NPST-CONT-do a.ala con lampa

Referes

Osborne, C.R. 1974. The Tiwi language. Canberra: AIAS (Australian Institute of Aboriginal Studies)
Lee, Jennifer R. 1993. Tiwi Today: A study of language change in a contact situation Canberra: Pacific Linguistics (Series C – No. 96)