Sistem metral

La sistem metral es un sistem de unias de mesura internasional e universal fundida supra leges fisical e conta desimal. Aora la sistem es la plu usada en la mundo.

La sistem metral es la funda de alga sistemes de unias siensal, incluinte la Sistem internasional.

Istoria e razona

La sistem ia es developada en Frans en sentenio 18 per solve la problem de tro multe sistemes de unias contradisente ja esistente en la pais e en Europa, e sua nonfasilia per conta.

En cuando la unias ja esistente ia ave multe complicada relatas entre los, la idea de la sistem metral ia es sur sempre usa la numero 10 e sua potias e leges fundal de fisica per lia los.

Per esemplo, un de unias de tempo ja ia es universal per tota la umania: la dia. E un dia pote es divideda a 10 oras desimal, e cada ora pote es divideda a 100 minutos desimal, e cada minuto pote es divideda a 100 secondos desimal. Ma la unias de tempo ja ia es universal per tota la paises de Europa, e la unias de tempo introduida par reformidores ia fali permane en usa comun.

Otra unia ance ia es natural e comun conoseda: la angulo direta. La reformidores ia proposa divide lo a 100 grados desimal, e cada grado a 100 minutos desimal. Ma la sistem de unias de angulo ance ja ia es universal per tota Europa, e la proposa ance ia fali.

Per naviga maral la lia de unias de angulo e de longia es importante, car en mapas creada seguente la projeta de Mercator lo es fasil mesura distantias en unias de angulo de arco en surfas de la planeta entre du locas. On ia deside ce la arco de un minuto desimal angulal ta es un unia nova de longia, cilometre, e un mili de lo es un metre.

La jeometria primitiva lia unias de longia con unias de area e unias de volum. Car la plu licuidas cual persones comun trata es la acua e sua disolves, la densia de acua pote es usada per lia unias de volum con unias de masa. Lo ia es desideda ce volum de un cubo de grandia de un metre ta ave masa de 1000 cilogrames, e cada cilogram es divideda a 1000 grames.

La unias de la sistem metral ia es adotada en Frans en la anios 1790 pos la Revolui Franses, en junta con otra proposas razonal: la calendario de la Revolui Franses, e franc franses divideda a 100 sentimes como unia de mone.

Orijinal, la cilogram e metre ia es legal definida par sua prototipos fisical, corpos fada de un alia platino-iridio, ma presente los ave definis fisical reproduida.

Durante la sentenio 19 la sistem metral ia es adotada en la plu paises de Europa, e a presente lo domina en tota la mundo, con eseta de la SUA do unias tradisional ancora es comun usada.

Prefisas multiplinte e dividente

La sistem metral adota un sistem de prefisas por unias derivada mostrante la relata cuantial de esta unias con la unia xef.

Cuantia	Prefisa	Simbol
10²⁴ = 1 000 000 000 000 000 000 000 000	iota	Y
10²¹ = 1 000 000 000 000 000 000 000	zeta	Z
10¹⁸ = 1 000 000 000 000 000 000	exa	E
10¹⁵ = 1 000 000 000 000 000	peta	P
10¹² = 1 000 000 000 000	tera	T
10⁹ = 1 000 000 000	giga	G
10⁶ = 1 000 000	mega	M
10³ = 1 000	cilo	k
10² = 100	ecto	h
10¹ = 10	deca	da
10^-1 = 0.1	desi	d
10^-2 = 0.01	senti	c
10^-3 = 0.001	mili	m
10^-6 = 0.000 001	micro	μ
10^-9 = 0.000 000 001	nano	n
10^-12 = 0.000 000 000 001	pico	p
10^-15 = 0.000 000 000 000 001	femto	f
10^-18 = 0.000 000 000 000 000 001	ato	a
10^-21 = 0.000 000 000 000 000 000 001	zepto	z
10^-24 = 0.000 000 000 000 000 000 000 001	iocto	y

Per esemplo: un cilometre (km) es 1000 metres, un sentimetre (cm) es 1/100 metre, un milimetre (mm) es 1/1000 metre etc.

En la pasada ia ave un prefisa miria per 10⁴ (simbol my), ma aora lo no es usada.

Unias metral

La unias fundal

Metre (simbol m), la unia de longia.
Gram (simbol g), la unia de masa.

La unia de tempo secondo (simbol s) no es seria un unia metral, ma es usada con los e per deriva otra unias metral como si lo es un unia fundal.

La temperatur tipal es mesurada en grados de Celsius (simbol ℃), e un unia plu coreta fisical es celvin (simbol K), fundida en lo. Esta unias ance es usada con unias metral.

Unias derivada con propre nomes

Alga unias mecanical ave sua propre nomes tradisional o creada per evita nomes tro complicada.

Unia	Simbol	Valua	Unia de	Notas
Angstrom	Å	10^-10 m	Longia	Unia per fisica atomal
Are	a	100 m²	Area	Unia per area de tera
Bar	bar	10⁵ kg/(m·s²)	Presa	Simil a la presa de la atmosfera normal
Baria	B	1 g/(cm·s²)	Presa	Unia de la Sistem de SGS
Dina	dyn	1 g·cm/s²	Forsa	Unia de la Sistem de SGS
Ectare	ha	10 000 m²	Area	Unia per area de tera
Erg	erg	1 g·cm²/s²	Enerjia	Unia de la Sistem de SGS
Gal	gal	1 cm/s²	Aselera	Unia de la Sistem de SGS
Herze	Hz	1 s^-1	Frecuentia
Jul	J	1 kg·m²/s²	Enerjia	Unia de la Sistem de SGS
Litre	l, ltr	0.001 m³	Volum
Micron	µ	10^-6 m³	Longia
Neuton	N	1 kg·m/s²	Forsa	Unia de la Sistem internasional
Pascal	Pa	1 kg/(m·s²)	Presa	Unia de la Sistem internasional
Ton	t	1000 kg	Masa
Vate	W	1 kg·m²/s³	Potia	Unia de la Sistem internasional

Unias con nondesimal lia con unias metral

Unia	Simbol	Valua	Unia de	Notas
Atmosfera	atm	101325 Pa	Presa	Presa de la atmosfera normal
Carato	ct	0.2 g	Masa	Unia per metales e petras valuosa
Cavalo	hp	75 kgf·m/s	Potia	Potia de un cavalo promedia
Dia	d	86 400 s	Tempo	Unia natural, un jira de la Tera sirca de se
Minuto	min	60 s	Tempo
Ora	h	3 600 s	Tempo
Noda	kn	1852 m/s	Rapidia	Unia maral, la rapidia de un milia maral per ora
Milia maral	nm	1852 m	Longia	Unia maral, la longia de un minuto angulal supra surfas de la Tera

Unias con defini fisical nonormal

Unia	Simbol	Valua	Unia de	Notas
Caloria	cal	4.1868 J	Enerjia	Enerjia nesesada per caldi un gram de acua a un grado de Celsius
Gram-forsa	gf	0,00980665 N	Forsa	Pesa de un corpo con masa de un gram
Milimetre de mercurio	mm Hg	101325/760 Pa	Presa	Presa de colona de mercurio con altia de un milimetre