Universalisme Unitarian

La calix flamante, un simbol asosiada con UU
Un depinta de Tremont Strada en Boston en 1843, con un vista de la Egleseta de la Re, la congrega prima de UU en la SUA

Universalisme Unitarian (comun cortida a UU) es un relijio libral marcada par un "xerca libre e encargante per veria e sinifia". UUistes declara no crede, ma en loca es unida par sua xerca compartida per crese spirital, gidada par un tradision vivente e dinamical. Corente, esta tradisiones es resomada par la Ses Fontes e Sete Prinsipes de Universalisme Unitarian. Esta documentos es "vivente", pd sempre abri per revisita e reconstrui. Congregas de UU inclui multe ateistes, agnosticas, teistes, e panteistes entre sua membros, e on ave eglesas, fraterias, congregas, e sosias tra America Norde, e otras tra la mundo. La radises de UU es de cristiania libral, spesial unitarianisme e universalisme, e UUistes dise ce de esta tradisiones veni un regarda profonda per libria de inteleto e ama incluinte. Congregas e membros xerca inspira e deriva comprende de tota relijios de la mundo.

La unitarianes de England Nova ia evolui de la cristiania congregaliste de la pilgrimes, cual ia es orijinal fundida sur la leje leteral de la biblia. Alga de la credores temprana ia rejeta la idea de la trinia de padre, fio, e spirito santa. En loca, los ia declara la idea de un Dio unica. Plu, los ia rejeta la prinsipe de peca orijinal, movente a via de la calvinisme de la congregalistes.

La universalistes de England Nova, derivada de la congregalistes, ia rejeta la asentua sur la idea ce sola un cuantia peti de persones elejeda ta es salvada de condena par Dio. En loca, la universalistes ia declara ce tota persones va es ultima reconsiliada con Dio. La universalistes ia rejeta la "condena a la focos de enferno" de la predicores evanjelial cual ia es atentante revive la cristiania de la pilgrimes.

La Asosia de Universalisme Unitarian (AUU) ia es formida en 1961 par la consolida de la Asosia American Unitarian, instituida en 1825, e la Eglesa Universal de America, instituida en 1793. La Consilio Unitarian de Canada (CUC) ia deveni un corpo autonom en 2002, e la AUU e CUC es du de 17 membros de la Consilio Internasional de Unitarianes e Universalistes.

Istorial, formas variosa de nontrinialisme ia apare en cristiania. La parola pote refere a cualce crede sur la natur de Jesus Cristo cual afirma ce Dio es singular e rejeta la prinsipe de la trinia como lo suportada par la bispos de la Consilio Prima de Nisea en 325, e es suportada aora par la plu de cristianes. En la Reformi Protestante, nontrinialisme ia es plu comun ca oji. Un mediciste espaniol, Michael Servetus, ia studia la biblia e conclui ce la conseta de la trinia no pote es trovada. Sua libros Sur la eras de la trinia e Christianismi Restitutio ia causa multe tumulta, e el ia es ultima arestada, condenada de eresia, e ardeda a la pira en Genev en 1553.

La parola "unitarian" ia es introduida par Henry Hedworth, ci ia aplica lo a la instruis de Laelio Sozzini e la frates polsce, comun nominada sosinianes. Eglesas ia es instituida formal en Transilvania e Polsca en la dui du de la sentenio 16. Ala, la prinsipes prima de libria relijiosa en Europa ia es instituida su la judi de Joan Sigismund, re de Magiar e prinse de Transilvania, la sola monarca unitarian. La eglesa temprana ia rejeta no sola la trinia, ma ance la preesiste de Cristo, predestina, e peca orijinal de Augustino de Hipon, e la idea de espia par sustitui de Anselm de Canterbury e Joan Calvin. On ia ave alga formas diferente de universalia, ma ultima la idea sentral ia es ce Jesus ia es un om, ma un om con un relata unica con la Dio.

La universalistes crede ance ce los ave un istoria longa, comensante con Origen e Gregorio de Nisa, an si espertas moderna duta ce esta "padres de la eglesa" ia ensenia la idea de salva universal. La prinsipe a la cor de universalisme es ce, par Cristo, cada spirito umana va es salvada. Promovores american temprana como Elhanan Winchester, Hosea Ballou, e John Murray ia ensenia ce tota va ateni salva, a veses pos un periodo cual sembla la idea de purgatorio en cristiania catolica. La prinsipe de condena per eternia no es posible con un Dio amante.

Adotada en 1960, la Prinsipes, Intendes, e Fundas pote es trovada en la regulas de la AUU:

Nos, la membro-congregas de la Asosia Unitarian Universaliste, acorda formal per afirma e promove:
La inerente valua e dinia de cada person;
Justia, ecualia, e compati en relatas umana;
Aseta de lunlotra e coraji a crese spirital en nosa congregas;
Un xerca libre e encargante per veria e sinifia;
La direto de consiensa e la usa de la prosedes democrata en nosa congregas e en sosia jeneral;
La gol de comunia mundal con pas, libria, e justia per tota;
Respeta per la rede intradependente de tota esiste de cual nos es un parte.