Viventes estrateran
Viventes estrateran es viventes cual no ia orijina de la Tera. Esta viventes ipotesal pote estende de viventes simple de un selula a viventes con sivilias multe plu avansada ca umanas. An si multe siensistes espeta ce viventes estrateran ta esiste en alga forma, on ancora no ave confirma. La egali de Drake divina sur la esiste posible de viventes intelijente en otra partes de la universo. La siensa de viventes estrateran en tota sua formas es nomida esobiolojia.
De la media de la sentenio 20, on ave un xerca continuante per sinias de viventes estrateran. La xerca inclui la indicas de esiste istorial e presente, e un xerca plu esata per viventes estrateran intelijente. La metodos inclui la analise de datos de telescopios e radios per deteta e envia siniales de comunica.
La conseta de viventes estrateran, spesial de viventes intelijente, ia ave un efeto cultural major, spesial en la obras de naras siensal. Tra la anios, naras siensal ia presenta ideas de siensa e ia influe la interesa e espetas publica sur la natur de intelijentia estrateran. Algas coraji nos a usa metodos forte per contata viventes intelijente, ma otras sujesta ce la dirije de atende a la Tera pote es perilosa.
Siensistes ipotese ce viventes en la forma de microbios es posible en la sistem solal e tra la universo. Esta ipotese es la resulta de considera la grandia enorme de la universo, e la leges coerente de la fisica de nosa parte de lo. Alga siensistes bon conoseda, como Carl Sagan e Stephen Hawking, e an Winston Churchill, ia sujesta ce lo es nonprobable ce viventes no esiste a alga loca estra la Tera.
Esta idea es derivada de la prinsipe de Copernico, cual dise ce la Tera no ave un rol unica en la universo, e la prinsipe de mediocria, cual dise ce viventes sur Tera no es vera spesial. La cimica de vive ia comensa cisa no longa pos la Buma grande, a 13,8 bilion anios ante aora, entrante a un epoca abitable cuando la universo ia ave sola 10–17 milion anios.
Viventes ia pote emerji autonom en multe locas tra la universo. O posible, viventes ia es formida min frecuente, e ia sperde alora – par meteoroides, per esemplo – entre planetas abitable en un prosede nomida "panspermia". En cualce caso, moleculas organica complicada ia pote es formida en la disco protoplanetal de granes de polvo sirca la Sol ante la formi de la Tera. Longo esta studias, esta prosede ia pote aveni estra la Tera sur alga planetas e lunas de la sistem solal, e sur planetas de otra stelas.
De la desenio de 1950, siensistes ia sujesta ce zonas abitable sirca alga stelas es la loca la plu probable per trova viventes. Multe descovres en esta zonas pos 2007 ia jenera estimas de frecuentias de planetas con composa simil a la Tera tan alta como multe biliones, an si (asta 2013) sola un cuantia peti de planetas ia es descovreda en esta zonas.
An tal, a 4 novembre 2013, astronomistes ia reporta, usante datos de la mision spasial Kepler, ce on pote ave tan multe como 40 bilion planetas de la grandia de la Tera orbitante en la zonas abitable de stelas simil a nosa Sol, e stelas roja nana en la Via Letin. La tal stela la plu prosima a nos pote es distante de nos par sola 12 anios de lus.