Abri la menu xef

Wilhelm Wundt e William James


Wilhelm Wundt e William James es videda como la padres de psicolojia par la plu de istoristes de psicolojia, e ance como la fundores de la du "scolas" grande prima de la campo. An si los ia es omes multe diferente, on ave alga paraleles. Sua vives es supraponeda: Wundt ia nase en 1832 e ia mori en 1920, e James ia nase des anios plu tarda e ia mori des anios plu temprana; Ambos ave alegas como ia fundi la laboreria psicolojial prima en 1875; E ambos no ia nomi sua scola. On va vide ce los ave otra cosas comun ance, personal e filosofial.

Lo es serta posible ce no pensores de sua influe ia aveni a pos.

Wilhelm WundtEdita

 
Wundt

Wilhelm Wundt ia nase en la vileta Neckerau en Baden, Deutxland a 16 agosto 1832. La fio de un pastor luteran, el ia es un xico solitar e studiante. El ia coabita e ia es educada par la aidor de sua padre, la parocior de la eglesa. El ia es enviada a un scola abitada cuando el ave 13 anios, e la universia con 19 anios.

El ia studia medica a Tubingen, Heidelberg, e Berlin, an con ce el ia es plu interesada en la aspeta siensal ca en un carera en medica. En 1857, el ia es asinia la rol de "dozent" (instruor) a Heidelberg, do el ia presenta psicolojia. De 1858 a 1864 el ia servi ance como un aidor a Helmholtz, un fisiolojiste famosa, e ia studia la stimula neurolojial e cimical de musculos.

En 1864, el ia deveni un profesor aidante a Heidelberg. Tre anios plu tarda, el ia comensa un curso cual el ia nomi psicolojia fisiolojial, cual ia foca sur la borda entre fisiolojia e psicolojia, pd la sensas e reatas - un interesa inspirada par la obras de Ernst Weber e Gustav Fechner. Sua notas de lesones ta ultima deveni sua obra major, la "Prinsipes de psicolojia fisiolojial" (Grundzüge der physiologischen Psychologie), cual ta es publica en 1873 e 1874.

Como Fechner e multe otras a la periodo, Wundt ia aseta la idea de Spinoza de paralelisme psicofisical: Tota avenis fisical ave un lado mental, e tota avenis mental ave un lado fisical. E el crede, como Fechner, ce la disponablia de stimulas e respondes mesurable pote resulta en abri avenis psicolojial a alga cosa simil a metodolojia esperimental, en un modo cual filosofistes plu temprana, como Kant, ia crede nonposible.

La metodo cual Wundt ia developa es un tipo de introspeta esperimental: La rexercor debe oserva multe atendente un aveni simple - un cual pote es mesurada per cualia, intensia, o dura - e rejistra sua respondes a varias de esta avenis. (Nota ce, en filosofia deutx alora, sensas ia es videda como avenis psicolojial, e donce interna a la mente, an si la sensa es de alga cosa esterna la mente. Alora, nos pote posible nomi la introspeta de Wundt como oserva!)

Wundt ia continua per deveni la xef de "psicolojia induida" a Zurich en 1874, e alora deveni profesor de filosofia a Leipzig en 1875. Ala el ta abita e labora per la 45 anios seguente.

En 1875, un sala ia es dedicada per demostras de cual nos nomi aora sensa e persepi. Esta es la mesma anio en cual William James ta institui un laboreria simil a Harvard. Nos pote selebra acel anio como la funda de psicolojia esperimental.

En 1875, Wundt ia aida sua studiante graduada prima a rexerca psicolojial vera - un otra petra de milia. En 1881, el ia inisia la "Jornal de Studias Filosofiste". En 1883, el ia comensa la curso prima titulida psicolojia esperimental. E en 1894, sua laboras ia es recompensada con la institui ofisial de un "Institui per Psicolojia Esperimental" a Leipzig - la prima en la mundo.

Wundt ia es conoseda par tota como un rexercor cuieta e un rexercor metodolojial ci labora forte, e un presentor de lesones multe bon. La normas de alora ia es diferente de los de aora: El ia parla per oras con un vose cuieta, sin notas o aparatos audiovideo, e sin pausa per demandas. Sua studiantes ia ama el, ma nos ta, sin duta, critica el per no es sufisinte divertinte!

Lo es interesante per nota ce en esta periodo multe ocupada, el ia publica cuatro libros en filosofia! Recorda ce, en esta periodo, psicolojia no ia es videda como separada de filosofia. Vera, Wundt ia rejeta la idea cuando algun ia sujesta lo a el.

La studias cual ia es conduida par Wundt e sua studiantes - aora multe - ia es xef sur sensa e persepi, e de los, la plu ia es sur vide. En ajunta, on ave multe studias sur tempo de reata, atende, emosias, e asosias. En tota, el ia supravide 186 teses dotoral, la plu en psicolojia.

Entre sua studiante plu reconoseda ia es Oswald Külpe e Hugo Munsterberg (ci ia es invitada per ensenia a Harvard par James), la conduistes rusce Vladimir Behterev e Ivan Pavlov, e studiantes american como G. Stanley Hall ("padre" de psicolojia de developa en la SUA), James McKeen Cattell, Lightner Witmer (fundor de la clinica psicolojial prima e la SUA, a la Universia de Pennsylvania), e la interpretor xef de Wundt per la mundo engles, E. B. Titchener. Nonfortunosa, Titchener es spesial culpable per malinterprete Wundt.

Plu tarda en sua carera, Wundt ia deveni interesada en psicolojia sosial o cultural. Contra cual multe sabe, Wundt no ia pensa ce la studia esperimental de sensas ia es la tota de psicolojia! Vera, el ia crede ce lo ia es sola la surfas, e ce la plu de psicolojia no es capas de usa metodos esperimental.

En loca, el ia pensa ce nos debe prosimi psicolojia cultural tra la produidas lo produi - mitolojia, per esemplo, praticas e rituos cultural, leteratur e arte... El ia scrive un obra de des volumes nomida "Volkerpsychologie" (psicolojia etnical), cual ia es publica entre 1900 e 1920 e ia inclui la idea de pasos de developa cultural, de la primitiva a la eda de totemes, tra la eda de eroes e dio, a la eda de umania moderna.

En 1920, el ia scrive "Erlebtes e Erkanntes" (esperias e reconoses), sua autobiografia. Un tempo corta a pos, a 31 agosto 1920, el ia mori.

William JamesEdita

 
William James

William James ia nase en New York City a 11 janero 1842. Sua padre ia es un om rica ci ia spende sua tempo ospita la inteletos de la eda e discute la misticisme relijiosa de Swedenbdorg. Esta ambiente merveliosa per un xico joven e briliante ia es debeda a sua ava, un migrante de Er con un capasia per investi en proprias. William ia es pronto acompaniada par un frate plu joven, Henry James, ci ta deveni un de la novelistes grande american. Tota la enfantes James ia es enviada a scolas abitada european e ia viaja tra tota la capitales grande de Europa.

Con 19 anios, pos un periodo como un studiante de arte, James ia atende Harvard per cimica, cual el cambia pronto a medica. El no ia es vera interesada en un carera en medica, ma el ia vole studia la siensa cual acompaniada lo.

En 1865, el ia prende un vantaje de un oportunia grande per viaja la basin de la Rio Amazona con la biolojiste Louis Agassiz, per colie esemplos de spesies nova descovreda. En ala, el ia comensa sufri de un varia de problemes con sua sania. En 1867, el ia vade a Deutxland per studia fisiolojia su Helmholtz e otras. El ia deveni amis con alga psicolojistes temprana e notable, incluinte Carl Stumpf. A la otra lado, el no ave multe respeta per Herbert Spencer, Wilhelm Wundt,G. E. Muller, e otras.

En Deutxland, el ia comensa sufri de depresa seria, acompaniada par ideas de suiside. Plu, el ia developa dole de la dorso, insonia, e dispepsia. En 1869, el reveni a la SUA per completi sua diploma de dotor de medica, ma el ia continua sufri de depresa. El ia es lejente un libro par un filosofiste franses nomida Charles Renouvier, cual ia convinse el de la potia de vole libre. El ia deside per aplica esta idea a sua propre problemes, e ia pare boni.

De 1871 tra 1872, James ia es un membro de la "Metaphysical Club", un asosia de graduadas de Harvard ci ia congrega en Boston per discute la avenis de la dia. Encluida en la asosia ia es la filosofiste Charles Peirce, Oliver Wendell Holmes, e Chauncey Wright. Wright ia introdui la idea de combina la idea de Alexander Bain de credes como tendes per condui, con la conseta de survive de la conveninte: Ideas debe compete con lunlotra, e la plu bon ta dura. Esta es simil a un idea plu resente de "memes".

 
Charles Peirce

Peirce, a la otra lado, ia prende la idea de Kant ce nos pote nunca vera sabe la veria - cual tota nosa credes es sola "posibles" - e ia cambia lo a la funda per praticalisme. Esta es multe simil a la filosofia de "como si" (en deutx "als ob", engles "as if") de Hans Vaihinger (1852-1933) cual tan influeda Alfred Adler e George Kelly plu tarda.

En 1872, James ia es asiniada la posto de instruor de fisiolojia a Harvard. En 1875, el ia presenta sua curso prima en psicolojia (o "psicolojia fisiolojial") e ia institui un laboreria de demostra, la mesma anio en cual Wundt ta institui la sua a Leipzig. En 1876, el ia deveni un profesor aidante de fisiolojia.

En 1878, el ia sposi Alice Gibbons, un ensenior de Boston. El ia cura per James e sua depresa diminui. An con sua natur delicata, el e Alice ia maneja eleva sinco enfantes.

En la mesma anio, el ia contrata con la publicor Holt per scrive un testo de psicolojia. El intende completa lo en du anios - ma el ia nesesa 12.

En 1880, sua titulo ia cambia a profesor asosiada de filosofia, cual es, en acel dias, psicolojia ia parteni vera. En 1885, el ia deveni un profesor plen de filosofia.

An con sua batalias con depresa, el ia es bon amada par sua studiante e conoseda per sua sensa bon de umor. An sua testo ta ave alga grado de lejera cual on no trova comun en testa. El ia pare joia ensenia. A la otra lado, e no gusta rexerca, no rexerca multe, e ia dise ce laborerias ia es un malspende de recursos.

En 1889, sua titulo ia cambia ancora, a profesor de psicolojia! La anio seguente, sua libro ia es final publicida, en du volumes, como "La prinsipes de psicolojia". En 1892, el ia produi un varia plu corta, "La curso plu corta", cual studiantes ta nomi per la 50 anios seguente, como la "Jimmy" (un nometa en engles per "James"). Ambos estas ia es obras mestral de prosa e multe popular entre studiante de psicolojia e lejores casual ance.

An con sua odia de rexerca, el ia recolie la mone per un laboreria nova e estendeda a Harvard, ma ia organiza pronto per emplea un studiante de Wundt, Hugo Munsterberg, como la dirijor. James no ia supravide multe graduadas, ma alga ia deveni multe susedosa.

James ia comparti sempre la interesa par sua padre en misticisme e an fenomenos psicica. Esta ia redui sua prestijia entre siensistes dogmosa en la comunia de psicolojistes. Ma esta ia causa ce otras ama el plu. En 1897, el ia publici "La vole per crede", e en 1902 "La varias de esperia relijiosa".

James ia es nunca tota comfortable con sua rol como un psicolojiste, e ia prefere pensa de se mesma como un filosofiste. El es, en fato, considerada la filosofiste la plu grande de America, en ajunta a sua rol como la "padre" de psicolojia american.

El ia es influeda profonda par la filosofiste Charles Sanders Peirce, ci ia funda la filosofia de praticalisme. Praticalisme dise ce ideas no pote es tota demostrada como vera o falsa. En loca, nos debe xerca como usosa un idea es - como pratical, como produosa. James ia nomi el la "cash value" (valua en mone) de un idea. James ia populari praticalisme en libros como "Pragmatisme" en 1907 e "La sinifia de veria" en 1909. En 1909, el ia ance scrive "Un universo pluraliste", cual ia es parte praticalisme e parte un espresa de sua propre credes, cual ia es no tan diferente ca la panteisme de Spinoza.

El ia jubila de ensenia en 1907 car sua cor no es tan sana como en la pasada, no pos un ataca peti en 1898 cuando trepante en New York norde. El ia encontra Freud cuando Freud ia veni per visita a Boston en 1909, e ia es multe impresada. La anio seguente, el ia vade a Europa per sua sania e per visita sua frate Henry, ma el ia reveni pronto a sua propre casa en New Hampshire. Du dias plu tarda, a 26 agosto 1910, el ia mori en la abrasa de sua sposa Alice.

Alga de sua libros ia es publicida pos mori, incluinte "Alga problemes en filosofia" en 1911, e la "Esajos en empiricalisme radisal" en 1912. La studiantes la plu famosa de James inclui John Dewey, la filosofiste comun nomida la padre de educa moderna american, Edward Thorndike, de ci sua esperimentas con gatos ia abri la porte per la conduistes, e Mary Calkins.

Mary Whiton Calkins (1863-1930) ia es un de la studiantes fema prima de psicolojia, e la fundor de la program de psicolojia a Wellesley. El ia studia su James e Munsterberg a Harvard, ma no ia es donada la diploma dotoral cual el ia merita - car el ia es un fem. Plu tarda, el deveni la presidente fema prima de la Asosia de Psicolojia American e la Asosia de Filosofia American. Pos sua mori, studiantes ia demanda ce Harvard dona la diploma a el pos mori. La universia ia refusa denova.

Struturalisme o VoluntismeEdita

Wundt es joiante un revive de popularia, su la nom "struturalisme" - an si el ia prefere "voluntisme". Plu ca 100 anios pos sua laboras, nos ia ateni el final. Vera, el ia es malrepresentada seria par la studiantes american con sua deutx povre, e spesial par Titchener, un studiante engles cual ia es propulsada par sua ego grande. Wundt ia reconose esta, e ia atenta avisa persones de la problem. Ma Boring - la istoriste de psicolojia american xef per multe anios - sola aprende de Wundt par leje Titchener.

Un malcomprende conserna la titulo de un obra major: Psicolojia fisiolojial. Ma la parola "fisiolojial" ia sinifia orijinal "esperimental", pd usante la metodos de fisiolojia (ma no la metodos esperimental de la conduistes de la sentenio de 1900).

Wundt e sua studiantes ia usa un varia esperimental de introspeta - la oserva atendosa de persepis - e ia developa alga detalias spesifada per la metodo:

1. La oservor debe sabe cuando la esperia comensa e fini.
2. La oservor debe manteni un "atende tensada".
3. La fenomeno debe es capas de repete.
4. La fenomeno debe es capas de varia - cual es per dise, esperimenta.

Per esemplo, en la caso de sensas, lo ia es concluida ce on ave sete "cualias" de sensas: vide, oia, ole, proba (de sabor), toca, cinestesia, e organal. Alga de estas ave plu aspetas. Vide, per esemplo, ave tinje, satura, e valua. E cualias pote varia en intensia, dura, brilia, e (per vide e toca) estende.

La laborerias de Wundt ia es multe produosa, descrivente cosas como atende elejente, memoria de dura corta, etc - an incluinte la limitas famosa de memoria de dura corta a sirca sete "pesos" de informa, cual no ta es notada plu denova asta la desenio de 1970.

ConsensaEdita

Un de la cosas cual causa ce la obras de Wundt pare tan strana a psicolojistes american ia es cual el ia nomi la prinsipe de realia: El ia dise ce consensa es, en fato, un realia, e ce lo es la sujeto de studia de psicolojia. Es es, serta, vera - ma nos ia iniora lo per alga 80 anios en cuando conduisme ia rena la mundo academial en la SUA, Britan, e Rusia.

Prosedes mental es un ativia de la serebro, e no materia. Wundt ia asetada la metafisica de duple-aspetisme de Spinoza e ia spende multe labora en refuta reduisme. El ia crede ce consensa e sua ativias no conveni la modeles de siensa fisical, an si psicolojia emerji de biolojia, cimica, e fisica. Con acel emerji, consensa ia gania un capasia per sintese creosa - un otra conseta clavin de Wundt.

An si consensa opera "en" e "tra" la serebro fisical, sua ativias no pote es descriveda en termas de cimica o fisica. La color blu, la sona de un acorda de E minor, la sabor de salmon fumida, la sinifia de un frase... tota es avenis psicolojial e sujetal, con no esplicas fisical simple. Cuando deveni acel longia de un onda de lus, la ativia en la retina, la inisia de un neuron, etc, deveni "blu"?

Wundt ia ance premostra la psicolojistes de Gestalt en la rejeta de la asosisme de Locke e Hume: Strutures psicolojial es plu ca sola la soma de sua partes.

El e sua studiantes ia conclui ce consensa es composada de du partes: Prima on ave un consensa con un capasia grande, nomida la "Blickfeld" ("campo de vide"). E ance, on ave un consensa plu streta nomida "Apperception", cual nos pote tradui como atende elejente, cual es su la controla de vole e move en la Blickfeld. Esta idea de atende elejente ia deveni multe influente. Lo ia condui, entre otra cosas, a la teoria de scizofrenia de Kraepelin, cual vide lo como un rompe de la prosedes de atende.

PsicolinguisticaEdita

Un otra aspeta de la psicolojia de Wundt ia es sua psicolinguistica, cual prende la du prima libros de "Volkerpsychologie". Wundt ia sujesta ce la unia fundal de lingua es la frase - no la parola o la sona. El ia identifia la frase no sola con un segue de parolas e sonas, ma como un state mental spesial. Sonas, parolas, la regulas de gramatica, etc, tota ave sua sinifia sola en relata a la frase mental a su.

Wundt ia inventa la grafica arborin de sintatica con cual nos es tota familial en testos linguistica. Lingua comensa con la S (frase, de engles "sentence") a la culmina, e atende elejente separa la sujeto (foca o figur) e la predica (la fondo), etc, en contrasta con la conseta asosiste popular cual progresa de la basa a la alta, cual ia es proposada par la conduistes. Esta ideas de Wundt es aora la norma - an si nun recorda ce esta ia es la sua!

Regardante la lingua de enfantes, Wundt e sua seguores ia proposa ce lingua ave sua orijinas en sonas e jestis - un otra teoria cual es reveninte a popularia.

EmosiasEdita

Seguente Wundt, nos es prima viventes de emosias. Tota de nosa ativias mental inclui emosia. E emosia presede pensa! El ia es serta un romanticiste (en la sinifia filosofial).

El ia usa termas variosa: Sentis es cual es nomi la esperias fundal e corta. Umores ia es la varias plu longa. Emosia ia es la esperias plu complicada. E motivas ia es la varias plu presada cual impulsa condui.

Wundt no acorda con William James e la teoria James-Lange de emosias. James ia crede ce prima nos responde a un situa, e alora nos esperia la emosia. Wundt ia indica ce introspeta mostra clar ce la emosia veni prima, e sola alora la fisiolojia e condui segue.

El ia crede ce nos no pote ariva a un lista ordinada de emosias: Los misca e fusa con lunlotra tro multe. Ma nos pote determina alga dimensiones de cualias con cual nos pote descrive los, con tre dimensiones spesial

1. Plase e desplase
2. Inspira alta e inspira basa
3. Atende tensada (pd controlada) e atende destensada.

VoleEdita

Wundt ia crede ce atas de vole, eleje e deside es tan sinifiante per comprende psicolojia ce el ia nomida sua teoria "psicolojia voliste".

Vole es vera motiva, e ata voleda es condui motivada. Lo veni de un sintese creosa de otra cualias emosial. Studiante de psicolojia tipal oia de la esperimentas sur tempo de reata en studia la contribuis de Wundt. Wundt ia vide los como studias de volunta.

La rexerca en sua laborerias sur volunta ia influe la fenomenolojiste beljes Albert Michotte, ci alora influe psicolojistes como Fritz Heider, Kurt Lewin, e Leon Festinger, ci ta es multe influente en la spesiali nova nomida psicolojia sosial.

Vole e atas de vole pote estende de impulsas e atas automata e cuasi reflexe, a desides e atas complicada cual nesesa multe fortia. Multe atas controlada deveni automata tra tempo, cual alora libri nos per labora de vole an plu complicada. En fato, lo ia es la developa de pensa lojical cual Wundt ia vide como la forma de vole la plu alta cual umanas pote es capas. El ia es multe otimiste sur nosa potensia!

FunsionalismEdita

Funsionalisme como un psicolojia ia developa de praticalisme como un filosofia: Per trova la sinifia de un idea, tu debe regarda sua seguentes (vide do lo condui). Donce, veria es cual es usosa, pratical, pragmatica. Esta ia condui James e sua studiante a un asentua sur causa-e-efeto, predise e controla, oserva de la ambiente e la condui, plu ca la introspeta curante de la struturalistes.

Praticalisme ia fusa fasil con darwinisme: Per comprende un idea, demanda "per cual lo es bon?" Cual es sua funsiona en la organisme, cual es sua intende en un ecosistem, como lo ajunta a la posible de survive e reprodui de la animal?

Alga aspetas de funsionalisme ia es clar no plu ca "antistruturalisme", un refleta, posible, de la nonpasientia con detalias e povre comprende de la lingua deutx par James. Spesial, el ia senti ce la struturalistes ia iniora la intera e ia paia tro multe atende a la pesetas. La antistruturalisme de la funsionalistes plu tarda ia es fundida plu sur la maltradui de Wundt par Titchener ca sur la obras de Wundt propre.

EmosiaEdita

Un esemplo de pensa funsionaliste pote es trovada en la vista de emosias de James:

"Nosa modo natural de pensa sur esta emosias normal es ce la persepi mental de alga fato stimula la senti mental nomida emosia, e ce esta state de mente resulta en espresa corpal. Mea tese es, a contra, ce la cambias corpal segue direta de la persepi de la fato stimulante, e ce nosa senti de esta cambias cuando los aveni es la emosia. La sensa comun dise ce nos perde nosa fortuna, nos senti triste, e nos plora; nos encontra la urso, nos teme, e nos fuji; nos es insultada par un competor, nos deveni coler, e nos colpa. La ipotese asi cual debe es defendeda dise ce esta ordina de segues no es coreta, ce la un state mental no es pronto induida par la otra, ce la mostras corpal debe prima es poneda a entre, e ce la declara plu razonante es ce nos senti triste car nos plora, coler car nos colpa, temente car nos trema; e no ce nos plora, colpa, o trema car nos es triste, coler, o temente, como la caso aveni. Sin states corpal seguente la persepi, a sentis ta es de un forma pur conosal, pal, sin color, povre de caldia emosial. Nos ta alora vide la urso, e deside ce lo ta es la plu bon si nos fuji, reseta la insulta e deside ce lo ta es coreta si nos colpa; ma nos no ta vera senti teme o coler....

Per comensa, lejores de la Jornal no nesesa es rementeda ce la sistem de nervos de cada vivente es no plu ca un colie de tendes per ata en un modo spesifada cuando contatada par cualias spesifada de la ambiente. Como la adomen de la crabe eremita depende de la esiste de conca vacua de un busino a un loca a do lo pote es trovada, ance la neurones de ole depende de la esiste, a un lado, de la pedes de la servo o volpe, e a la otra lado, la tende per segue la trasas de los. La macina neuronal es sola un ifen entre ordinas de materia determinada estra la corpo, e impulsas de inibi o descarga en sua organos. Cuando un gal vide un ojeto oval e blanca sur la tera, el no pote departe de lo; el debe senta sur lo e reveni a lo, asta ultima, lo cambia a un masa peti de peluxeta movente e piante ta trae de sua macina un colie de atas tota nova. La ama de un om per un fem, o de un madre per sua bebe, nosa coleria a un serpente e nosa teme de presipes, tota pote es descriveda simil, como esemplos de la modo en cual pesos con formas spesifada de la mobilas de la mundo ta clama nonevitable la reatas mental e corpal multe spesifada, a ante e comun direta oposada la deside de nosa razona desidente consernante los. La laboras de Darwin e sua susedores sola comensa revela la parasitisme universal de cada vivente sur otra cosas spesial, e la modo en cual cada vivente trae la sinia de sua relatas spesial primida sur sua sistem de nervos en lo sur la sena....

Sibila per manteni coraje no es sola un espresa comun. A la otra lado, senti tra la dio en un posa depresada, suspira, e responde a cada cosa con un vose triste, e tua melancolia continua. On ave un prinsipe no plu valuable en educa moral ca esta, como tota ci ave alga esperias sabe: si nos vole concista tendes emosial nondesirada en nos mesma, nos debe asidua e, a la comensa con sangue fria, vade tra la moves esterna de acel tendes oposante cual nos prefere cultiva. La recompensa de persiste ta veni sin fali, en la pali de nosa mal umor o depresa, e la aveni de felisia e compatia real en sua loca. Lisi la fronte, brilia la oios, contrata la aspeta dorsal de la corpo en loca de la aspeta ventral, parla en un tonalia major, dona un loda amin, e tua cor ta debe es serta jelida si lo no ta gradal dejela!

En la paragraf prima, nota la idea oliste ce emosia no esiste sin la corpo. En paragraf du, el indica ce emosia ave un gol en evolui. E en paragraf tre, James asentua un aplica pratical de sua teoria.

AbituaEdita

De un perspetiva istorial, la asentua sur abitua par James es lo cual ia inisia la interesa de sua seguores, e ia pave la via per la developa de conduisme american. Denova, asi es James en sua propre parolas:

Cuando nos regarda tota vivente de un vista esterna, un de la cosas prima cual mostra se a nos es ce los es pacos de abituas. En animales savaje, la segue tipal de condui dial pare es un nesesa incluida a nase; en animales domada, e spesia en umanas, lo pare, a un estende grande, como la resulta de educa. La abituas a cual on ave un tende inata es nomida instintos; alga de los cual resulta de educa ta es, par la plu de persones, nomida atas de razona. En esta modo, lo pare ce abitua covre un parte grande de vive, e ce on ci studia la mostras ojetal de mente ta defini serta an a la comensa, esata cual sua limitas es....

...

No casa es plu fasil imajinada ce, cuando un corente ia traversa un via, lo ta traversa lo plu fasil un ves du. Ma cual ia causa ce lo traversa lo la ves prima? Per responde a esta demanda, nos nesesa sola reveni a nosa conseta jeneral de un sistem de nervos como un masa de materia de cual la partes, mantenida constante en states de tensa diferente, es tan constante tendente per egali sua states. La egali entre cualce du puntos aveni tra cualce via es la plu permeable a la momento. Ma, car un punto spesifada de la sistem pote parteni, real o potensial, a multe vias diferente, e car la rol de nuri es forsada par cambias acaso, blocos pote aveni, alga veses, cual causa ce corentes lansa tra linias nondesirada. Un tal linia nondesirada ta un un via nova creada, cual si traversada repetente, ta deveni la comensa de un arca de reflexe nova. Tota de esta es neblosa a la grado minima, e deveni no plu ca dise ce un via nova pote es formida par la tipo de acasos cual, en la materia de nervos, es probable per aveni. Ma, tan neblosa como lo es, lo es vera la parola final de nosa sabe sur esta caso....

Abitua es, donce, la rota de inertia enorme de sosia, sua ajente conservante la plu importante. Lo es sola cual manteni tota de nos en la bordas de proclamas de lege, e salva la enfantes de fortuna de la rebelas inviosa de la povre. Lo preveni sola la modos de vive la plu difisil e repulsante de deveni abandonada par los elevada per pasa sua vives ala. Lo manteni ce la pexor e la laborores a la tetos de barcos tra la inverno; lo teni la minor en sua oscuria, e cloi la campanior en sua cabana de troncos e sua cultiveria solitar tra tota menses de neva; lo proteje nos de invade par la nativas de la deserto e la zona jelada. Lo destina nos per luta la batalia de vive en la modo de nosa eleva o nosa desides temprana, e per atenta la plu bon nosa carera cual no conveni, car on ave no otra per cual nos es conveninte, e lo es tro tarda per recomensa. Lo manteni la stratos sosial diferente de misca. Con sola 25 anios tu pote vide la maneras de profesa comensa en la viajor joven de comersia, en la dotor joven, en la eglesor joven, en la avocato joven. Tu pote vide la linias pico de fendes corente tra la personalia, la trucos de pensa, la prejudis, la modos de la "fabriceria", de cual cada person pote ultima no evade ca la manga de sua jacon ta cade en un colie nova de plias. En alga caso, lo es plu bon ce el no evade. Lo es bon per la mundo ce, en la plu de nos, par 30 anios, la personalia es firma como jeso e va moli nunca denova.

ComparaEdita

Vera, struturalisme e funsionalisme ia es plu simil con lunlotra e diferente de psicolojia moderna popular, en ce ambos ia es volelibriste e antimaterialiste, e ambos ia conseta de la sujeto propre de psicolojia es la mente:

Wundt:

"Mente", "inteleto", "razona", "comprende", etc, es consetas... cual ia esiste ante la comensa de cualce psicolojia siensal. La fato ce la consensa naive ia indica sempre e a tota locas a esperia interna como un fonte spesial de sabe, pote, donce, es asetada per aora como atesta sufisinte per la direto de psicolojia como un siensa... "Mente" ta es conveninte la sujeto a cual nos atribui tota la fatos separada de oserva interna como predicas. La sujeto mesma es determinada intera e escluinte par sua predicas.

James:

On ave sola un materia o sustantia fundal en la mundo, la materia de cual tota cosa es composada, e... nos nomi acel materia "esperia pur".

Wundt e James ia es empricaliste, e ia vide sua psicolojias como esperimental. Nun ia gusta la sistemes razonaliste comun en la filosofia de sua eda - como la sistem grande developada par Hegel. Ma nun ia es en cualce modo simil a cual la plu de persones comprende como esperimentores oji, car nun de los ia es materialistes o reduistes.

Wundt sur materialisme:

Si nos pote vide cada rota en la macina fisical de cual sua opera la prosedes mental acompania, nos ta trova ancora no plu ca un cadena de moves, mostrante no trasa en cualce modo de sua sinifia per mente... (Tota) cual es valuada en nosa vive mental ancora resta a la lado psical.

Peirce, la ami e ensenior de James sur materialisme:

La crede materialiste pare a me tan repulsante a lojica siensal como lo es per sensa comun; car lo nesesa ce nos suposa ce un tipo spesifada de macina ta senti, cual es un ipotese asoluta no reduable a razona - un normalia ultima nonesplicable; en ce la sola justi posible de cualce teoria es ce lo debe fa cosas clar e razonable.

E Mary Calkins, la studiante de James, sur sua ideas de introspeta:

De introspeta, el deriva la materias per psicolojia. "Oserva introspetante", el atesta clar, "es de cual nos debe depende prima e xef e sempre...."

Regardante la diferes de influe istorial entre Wundt e James: Wundt ia foca sur la introspeta de consensa, e James ia foca sur condui en ambiente. Esta foca ta deveni la funda per un conduisme ce James no ta reconose. Lo ta es cuasi un sentenio asta rexerca psicolojial ta reveni de un visita estendeda en la mundo de metodos materialiste, reduiste, cuantial, fisiolojial, conduiste a alga cosa la du omes ta reconose como psicolojia.

FontesEdita

Blumenthal, Arthur L. (2001) A Wundt Primer: The Operating Characteristics of Consciousness. Capitol cuatro en Reiber, Robert W. e Robinson, David K. Wilhelm Wundt in History: The Making of a Scientific Psychology. Kluwer Academic Publishing.

James, William (1890). The Principles of Psychology. Presentada en Classics in the History of Psychology, an internet resource developed by Christopher D. Green of York University, Toronto, Ontario. Disponable a http://psychclassics.yorku.ca/James/Principles/prin4.htm

Calkins, Mary W. Autobiography of Mary Whiton Calkins, en Murchison, Carl. (Ed.) (1930). History of Psychology in Autobiography (Vol. 1, pp. 31-61). Worcester, MA: Clark University Press. [sitante James, Principles of Psychology, Vol. I, pp. 225 ff.]