Ximineria

Un ximineria es un strutur fabricada de brices, petras, o metal, desiniada per conteni un foco. Un foco es contenida en un caxa de foco o caveta, e un ximine o otra duto permete ce la emetes sorti. Istorial, los ia es usada per caldi un abitada, coce, e caldi acua per usas como lava la vestes. Oji, los es plu comun usada per la belia. Ma ximinerias pote es ancora usada per caldi un casa.

Cavetas antica per foco ia es a veses construida en la tera, en cavas, o en la sentro de un cabana o otra abitada. Sinias de focos fada par umanas esiste sur tota continentes. La nonvantaje de cavetas de foco en un abitada es ce focos produi fumas iritante o an venenosa en la abitada.

Cavetas ia evolui a ximinerias levada en abitadas, ma la elimina de fumas ia depende de fenetras abrida o bucos en la tetos. La salon grande de la eda medieval tipal ia ave un ximineria sentral, do un foco abrida ia arde con la fuma levante a un boca de venti en la teto. En la eda medieval, laminas ia es developada cual permete la boca de veni en la teto resta covreda per para pluve e neva de entra la ximine.

Ance en la eda medieval, baldacines de fuma ia es inventada per preveni fumas de sperde tra un sal par permete la fumas sorti tra un mur o teto. Los ia pote es poneda contra mures de petra, en loca de usa la media de la sala, cual permete ce salas plu peti es caldida.

Ximines ia es inventada en Europa norde en la sentenios 11 e 12, e repara un parte de la problem de fumas. Los pote dona un flue de aira per sorti la sala a estra. En esta modo, lo deveni posible ce on ave ximinerias en plu salas. Ma los ia es cara per construi e manteni, e donce no ia es usada jeneral estra la casas grande de la rica.

En 1678, Prinse Rupert, sobrino de Charles 1, ia leva la grilia de la ximineria, cual boni la flue de aira e sorti de fumas. En la sentenio 18, du developas importante en la istoria de ximinerias ia aveni: Benjamin Franklin ia developa un camera de conveta per la ximineria cual boni multe la efetosa de ximinerias e stufas. El ia ance boni la flue de aira par estrae aira de la sutera e estrae la fumas tra un area plu longa a la culmina. En la sentenio 18 plu tarda, Comte Rumford ia desinia un ximineria con un caxa basa e longa de foco. Esta ia boni multe la cuantia de caldia radiante estende en la sala. Esta desinia es la funda per ximinerias moderna.