Abri la menu xef
Schimpanse Zoo Leipzig.jpg

Ximpanze es la nom comun per la du spesies esistente en la jenero Pan. La Rio Congo es la borda entre la abitas natural de la du spesies:

  • La ximpanze comun (Pan troglodite) - Africa ueste e sentral
  • La bonobo (Pan panisco) - la forestas de la Republica Democrata de la Congo

Ximpanzes es membros de la familia Hominide, con gorilas, orangutanes, e umanas. Ximpanzes ia diverje de la umanas sirca ses milion anios en la pasada, e es la spesies esistente cual es la plu prosima a umanas. La du spesies Pan ia diverje sola sirca un milion anios en la pasada.

La mas de la ximpanze comun es asta 1.7 metres en altia cuando stante, e ave asta 70 cilogrames de pesa. La fema es alga plu peti. La brasos de la ximpanze comun es longa: cuando estendeda, los es 1.5 veses de la altia e plu longa ce se gamas. La bonobo es plu peti e plu magra ca la ximpanze comun, ma el ave membros plu longa. Ambos spesies usa sua brasos longa e forte per asende arbores. Sur la tera, ximpanzes pasea normal sur tota cuatro membros e usa la nocas de sua manos tensada per suporta. La pedes de la ximpanze es plu bon per pasea ca los de la orangutan car la plantas de la pedes es plu larga e la ditos plu corta. Ambos spesies pote pasea sur sua du gamas cuando portante ojetos con sua brasos e manos. La bonobo pasea sur du gamas plu frecuente ca la ximpanze comun.

La pelo de ximpanzes es brun oscur. La fas, ditos, palmas, e plantas es sin capeles. La ximpanze no ave un coda. La pel esposada de la fas, manos, e pedes pote es entre rosa e negra en ambos spesies, ma es jeneral plu pal en jovenes. Ximpanzes ave un fronte protende e un nas plata. La mandibula protende, ma la labios es estendeda sola cuando la ximpanze mua.

La serebro de la ximpanze es sirca dui lo de la umana.