Zipe
Un zipe es un aparato comun usada per lia la bordas de un abrida de stofa o otra materia flexable, como a un veste o un bolsa. Lo es usada en jacas e otra vestes, bagaje, benes per sporte, utiles per campa como tendas e sacos de dormi, etc. Zipes es otenable en multe grandias, formas, e colores diferente. La metodo es fundida sur dentes entretexente.
La parte funsional de un zipe es composada de du linias de dentes protendente, cual pote es fabricada per entretexe, liante la linias, con deses a sentos de dentes spesial formida de metal o plastica. Esta dentes pote es o individua o formida de un spiral continuante. La liscante es un canal con un forma Y cual entretexe o separa la linias de dentes oposante.
En 1891, Whitcomb Judson, ci ia inventa un ferovia pneumatica, ia introdui un "clave-teninte". La aparato ia es un forma plu complicada de un fisador per sapatos con oncianelo Con la suporta de comersior Lewis Walker, Judson ia presente la Universal Fastener Company per fabrica la aparato nova. Lo ia ave sua presenta publica a la Feria Mundal de Chicago de 1893, ma no reseta multe interesa comersial.
La Universal Fastener Company ia move a New Jersey en 1901, reorganizada como la Fastener Manufacturing and Machine Company. Gideon Sundback, un injenior eletrical svensce-american, ia es empleada per labora per la compania en 1906. Sua capasias tecnical superior (e sua sposi a Elvira Aronson, la fia de la manejor de la fabriceria) ia condui a la rol de desinior xef. Sundback ia labora a boni la fisador e en 1909 ia rejistra un patenta en Deutxland. La compania ia ave la patenta en la SUA.
La parola "zipe", de engles zip o zipper ia orijina de la B. F. Goodrich Company en 1923. La compania ia eleje usa la liador de Sundback per sua botas de cauxo e ia refere a lo como la zipper, e la nom sperde. La usas de la zipe en la anios temprana ia es xef per clui botas e poxes de tabaco. Zipes ia comensa es usada per vestes en 1925 par la compania Schott NYC sur jacas de cuoro.
En la desenio de 1930, un promove ia comensa per vestes per enfantes cual ave zipes. La promove ia loca zipes per promove autonomia en enfantes par coraji los per vesti se mesma. En 1937, desiniores franses de moda ia promove zipes en la pantalones de omes. Entra la multe virtuas listada par la jornal de moda Esquire ia es ce la zipe ta esclui "la posible de elimina desordina nonintendeda e embarasante.