Adomen

La adomen (nomida min formal la ventre) es la parte de la corpo cual conteni la organos de dijesta e reprodui. Lo es entre la torax (peto) e la pelvis en umanas e otra vertebratos.

Organos xef en la adomen.

Strutur

Contenidas

La adomen conteni la plu de la organos tubin de la curso de dijesta, e ance alga organos solida. Organos adomenal cavetin inclui la stomaco, la intestin magra e la colon con sua apendis afisada. Organos como la figato, sua vesica bilal afisada, e la pancreas funsiona en asosia prosima con la curso de dijesta e comunica con lo par dutos. La spleno, renes e glandes suprarenal es ance en la adomen, ance con multe dutos sangual cual inclui la aorta e la vena cava inferior. Anatomistes pote considera la vesica urinal, la utero, la trompas de utero e la ovarios como o organos adomenal o organos pelvisal. La adomen ance conteni un membrana estendosa nomida la peritoneo. Un plia de peritoneo pote covre completa alga organos, en cuando lo pote covre sola un lado de organos cual reposa normal plu prosima a la mur adomenal. Anatomistes nomida la tarda tipo de organos retroperitoneal.

Organos adomenal pote es spesialida alta en alga animales. Per esemplo, la stomaco de remasticantes (un suordina de mamales) es divideda a en cuatro cambras: la rumen, la reticulum, la omasum and la abomasum. En vertebratos, la adomen es la caveta grande cual es ensircada par la musculos adomenal, ventral e ladal, e dorsal par la colona vertebral. Costelas basa ance pote ensirca mures ventral e ladal. La caveta adomenal es un parte de la caveta pelvisal. Lo es afisada a la caveta toraxal par la diaframa. Strutures como la aorta, la vena cava inferior e la esofago pasa tra la diaframa. La cavetas adomenal e pelvisal es foreda par un membrana serosa cual es nomida la peritoneo partal. Esta membrana es continuante con la peritoneo viseral cual fore la organos.