Abri la menu xef
Partes de la stomaco. De alta: talia de cardia • funda • esofago • cardia • piloro • talia angulal • curva minor • corpo gastral • curva major • duodeno • canal piloral • sesion de piloro • entra piloral

La stomaco es un parte de la curso gastrointestinal. La rol de la stomaco no es la asorbe de nurintes, un taxe per la intestines. Sua rol es la rompe de moleculas grande de gras afin los pote es asorbeda plu fasil par la intestines. La nomes latina per la stomaco ia es ventriculus e gaster; multe parolas medical relatada a la stomaco usa "gastro-". La parola "stomaco" orijina como στόμαχος en elinica clasica.

La stomaco de umanas es un ambiente multe asidosa – con pH de 1,5–2 par causa de la secrete de asida idroclorica (HCl) – con enzimas dijestal peptidase como pepsin. En fato, la stomaco pote secrete 2 a 3 litres de jus gastral per dia. La HCl comensa la cataboli de protenas, per desenrola la molecula afin otra enzimas pote rompe la protenas asta aminoasidas. Esta prosede cambia un bal de comeda a un materia mol nomida cimo.

Anatomia de la stomaco umanaEdita

La stomaco es situada entre la esofago e la parte prima de la intestin magra (la duodeno). Lo es a la lado sinistra de la caveta adomenal, e sua fondo resta su la diaframa. Su la stomaco es la pancreas, e la omento grande pende de la curva grande de la stomaco.

Lo es divideda en cuatro partes, de cual cada ave selulas e funsionas diferente. La partes es:

  1. la area cardial, do la contenidas de la esofago vacui en la stomaco;
  2. la fondo, formida par la curva superior de la organo;
  3. la corpo, o area major e sentral;
  4. la piloro, la area plu inferior de la organo do la contenidas de la stomaco vacui en la intestino magra.

Du valvas de musculos lisa es situada a la entra e la sorti de la stomaco: la sfinter cardial (o sfinter esofagal) a la entra; e la sfinter piloral a la sorti.

La asida gastral es tan asidosa ce lo pote dana la surfas interior de la stomaco, creante un ulsera gastral. Plu resente, siensistes ia descovre ce ulseras de la stomaco es causada par un infeta de la bateria Helicobacter pilori. La Premio Nobel per medica de 2005 ia es donada a Barry J. Marshall e Robin Warren per esta descovre importante.

En umanas, la stomaco ave un volum de sirca 50 ml cuando lo es vacua. Pos un come, lo pote estende per conteni entre un e cuatro litres de comeda.