Andes
La Andes es la cadena de montes continental la plu longa en la mundo. Los formi un montania continuante longo la borda ueste de America Sude. La cadena ave un longia de sirca 7000 km, un largia de sirca 200 a 700 km (lo es la plu larga entre la latitudes 18°S e 20°S), e un altia promedia de sirca 4000 m. La Andes estende de norde a sude tra sete paises de America Sude: Venezuela, Colombia, Ecuador, Peru, Bolivia, Arjentina e Txile.
A longo, la Andes es divideda en alga cadenas plu peti, separada par depresas interveninte. La Andes es la loca de alga planos alta – de cual alga conteni sites major como Quito, Bogotá, Arequipa, Medellín, Sucre, Mérida e La Paz. La Altiplano ("plano alta") es la numero du de la plu altas de mundo, pos sola la plano bod. On grupi la cadenas plu peti en tre divides major longo sua clima: tropical, seca e pluvosa.
La monte la plu alta estra Asia, Monte Aconcagua en Arjentina, asende a altia de sirca 6961 m supra la nivel de mar. La apico de Chimborazo en la Andes ecuadoran es plu distante de la sentro de la Tera ca cualce otra loca a la surfas de la Tera, par causa de la bulto ecuatoral cual resulta de la jira de la Tera. La volcanes la plu alta es en la Andes, incluinte Ojos del Salado a la frontera Txile–Arjentina, cual asende a 6893 m.
La Andes es ance un parte de la Cordiliera American, un serie cual continuante de cadenas de montes cual formi la "spina dorsal" ueste de America Norde, America Sentral, America Sude e Antartica.
Etimolojia edita
La nom "Andes" veni cisa de la nom cetxua per un de la cuatro areas de la Impero Inca, la anti ("culmine alta"). Un otra teoria es ce la parola veni de castilian, do anden sinifia "teraza" – la incas ia construi terazas en la montania.