Venezuela

República Bolivariana de Venezuela
Informa jeneral
Capital:	Caracas
Lingua ofisial:	Espaniol
Dirije
Governa:	Republica federal presidental
- Xef de stato:	Presidente Nicolás Maduro (disputada) Presidente Juan Guaidó (disputada)
- Xef de governa:	Vispresidente Delcy Rodríguez (disputada)
Otras
Area:	916 445 km²
Popla:	28 515 829
Densia:	31,1
PIB:	US$ 76.458 milion
Mone:	Bolivar
Zona de ora:	VST (UTC-4)
Numero de telefon:	+58
Interede:	.ve

Venezuela (ofisial la Republica Bolivarian de Venezuela) es un republica federal locada a la costa norde de America Sude. Lo es bordada par Colombia a la ueste, Brasil a la sude, Guiana a la este, la isolas nederlandes Aruba, Curaçao e Bonaire a la norde, e la isolas Trinidad e Tobago a la norde-este. Venezuela covre 916,445 cilometres cuadrida e ave plu ca 31 milion (31 568 179) abitores. La pais ave un biodiversia estrema alta e es la numero 7 en la lista de paises con la plu spesies. On trova abitadas de montania (la Andes en la ueste) asta foresta pluvosa (la Basin Amazon en la sude) tra planos estendosa. En ajunta, on ave la costa caribe en la sentro e la delta de la Rio Orinoco en la este.

La teritorio aora nomida Venezuela ia es colonida par Espania en 1522, resisteda par poplas nativa. En 1811, lo ia deveni un de la teritorios prima espaniol-american cual ia declara sua autonomia – cual no ia es securida asta 1821, cuando Venezuela ia es un departe de la republica federal de Gran Colombia. Lo ia gania autonomia plen como un pais separada en 1830. En la sentenio 19, lo ia sufri tumulta political e autocratia, restante rejional dominada par tiranos militar asta la media de la sentenio 20.

De 1957, la pais ia ave un serie de governas democrata. Xocas economial en la desenios de 1980 e 1990 ia gida a alga crises political, incluinte la tumultas matante "Caracazo" en 1989, du colpas de stato atentada en 1992, e la acusa de presidente Carlos Andrés Pérez per froda de mone publica en 1993. Un colasa de fida a la partitos esistente ia provoca la eleje en 1998 de Hugo Chávez, envolveda en colpas de stato presedente, e la inisia de la Revolui Bolivarian. La revolui ia comensa con un Asembla Composante en 1999, do on ia scrive un constitui nova de Venezuela, cual ia cambia la nom ofisial de la pais a "República Bolivariana de Venezuela".

Venezuela es un republica presidental federal, composada de 23 statos, la Distrito Capital (cual covre Caracas), e dependes federal (cual covre la isolas costal). La pais reclama ance tota teritorio guianan a ueste de la Rio Essequibo, un area de 159 500 cilometres cuadrida nomida Guayana Esequiba o la Zona en Reclama. Venezuela es entre la paises la plu urbanida en America Latina: la majoria vasta de venezuelanes abita en la sites de la norde, spesial en la capital (Caracas), cual es ance la site la plu grande de la pais.

On ia descovre petrolio en la temprana de la sentenio 20, e oji Venezuela ave la reservas de petrolio la plu grande conoseda de mundo. Lo es un de la esportores major de petrolio. En la pasada, lo ia es un esportor sudevelopante de benes cultival como cafe e cacau, ma petrolio ia domina rapida la esportas e la revenus governal. La suprabunda de petrolio en la desenio de 1980 ia provoca un crise esternal de deta e un crise economial durante. La infla ia culmina a 100% en 1996 e la taso de povria ia crese asta 66% en 1995; en 1998, la produi interna bruta per person ia diminui asta la mesma nivel como en 1963, min ca sua apico de 1978 par un tri.

Pos la recovre de la custa de petrolio en la temprana de la desenio de 2000, la governa venezuelan ia institui politicas popliste cual ia aumenta inisial la economia e ia grandi la spende sosial, tempora reduinte la nonegalia economial e la povria. An tal, plu tarda, esta politicas ia deveni nonsufisinte, e on culpa sua esedes – spesial un suporta unica estrema per combustables de fosil – per destabli denova la economia de la nasion. La resulta ia es un iperinfla, un depresa economial, un manca de benes fundal, e creses grave de povria, maladia, mori de enfantes, malnuri e crimin.

La lingua major es espaniol.