Espania

pais de Europa
Rena de Espania
Reino de España
Informa jeneral
Capital: Madrid
Lingua ofisial: castilian, catalan. euscara,
galego, ositan, aragones,
asturian
Dirije
Governa: Monarcia parlamental
- Xef de stato: Felipe 6
- Xef de governa: Pedro Sánchez
Otras
Area: 505,990 km²
Popla: 46,815,916
Densia: 92
PIB: $1.566 triliones
Mone: euro
Zona de ora: UTC+1
Numero de telefon: +34
Interede: .es

Espania (España en espaniol), ance nomida Rena de Espania, (Reino de España) es un pais autonom e membro de la Uni European, constituida en un stato sosial e democrata de cual sua forma de governa es la monarcia parlamental. Sua teritorio es organizada en des-sete comunias autonom e du sites autonom, en ajunta a sincodes provinses. Sua capital es la site Madrid.

Esta pais es situada en Europa Ueste e en Africa Norde. En Europa lo ocupa la plu de la penisola iberian (conoseda como Espania penisolal) e la arcipelago de la isolas Baleare (en la Mar Mediteraneo ueste); en Africa es la sites Ceuta e Melilla, la isolas Canaria (en la Mar Atlantica norde-este), la Isolas Txafarina (Mar Mediteraneo), la Roca de Vélez de Gomera (Mar Mediteraneo), la Isolas Alhucema (golfo de la Isolas Alhucema) e la Isola de Alboran (Mar de Alboran). La munisipa de Llivia en la Pirineos constitui un enclave ensircada par Frans. Un serie de isolas e isoletas completi la colie a lado de la costas penisolal.

La area es sirca 504 782 cilometres cuadrida, e la pais es la numero cuatro de la plu grandes de la continente, pos Rusia, Ucraina e Frans. Con un altia media de 650 metres, lo es un de la paises la plu montaniosa de Europa. La cuantia de abitores, en la anio 2015, ia es sirca 46 439 864 persones. La teritorio penisolal ave fronteras con Frans e Andora en la norde, con Portugal en la ueste e con Jibraltar en la sude. En sua teritorios african Espania ave fronteras con Maroco. Lo divide con Frans la domina de la isola de la Fasianes en la boca de la rio Bidasoa.

Seguente la constitui espaniol, castilian o espaniol es la lingua ofisial de la stato, e tota la espanioles ave la debe de conose lo e la direto de usa lo. En 2006, lo ia es la lingua madral de la 89% de la espanioles. Otra linguas, ance espaniol, como catalan, galego e euscara es reconoseda como coofisial en diversa comunias autonom, seguente la Leges de Autonomia.

Istoria edita

Preistoria edita

La teritorio espaniol corente conteni du de la locas la plu importante per la preistoria european e mundal: la Montes de Atapuerca (do on ia trova la spesie Homo antecessor e la serie la plu completa de osos de Homo heidelbergensis) e la cava de Altamira (do a la ves prima on ia identifia la arte paleolitica).

La situa spesial de la penisola iberian como "ueste estrema" de la mundo mediteranean ia determina la ariva de influes cultural diversa de la Mediteraneo este – spesial la relata con la neolitica e la Eda de la Metales (cultiva, seramica) – un prosede cual ia culmina con la colonias istorial de la milenio prima aec. Par sua loca favorente la comunica, sua posibles per cultiva e sua ricia de minerales, la areas este e sude ia es los cual ia developa plu (Tartesos, iberianes). Lo ia ave contata con Europa Sentral (celtas).

Eda antica edita

 
La Dama de Eltxe, un esemplo de arte iberian.

La data la plu antica de un aveni istorial en Espania es la fundi lejendal de la colonia fenisia de Gadir (la Gades roman, cual es oji Cadiz), cual, seguente fontes roman (Tito Livio), ia aveni a 80 anios pos la Gera de Troia, ante lo de Roma mesma. Esta situa lo a 1104 aec e conforma con la referes la plu antica a la fundi de un site en Europa ueste. La refere cual Herodoto ia colie de contatas elinica con la rena de Argantonio es situada en la anio 630 aec. La atestas arceolojial de fundas fenisia (Ebusus, Sexi, Malaka) permete parla de un monopolio fenisia de la vias comersial sirca la Streta de Jibraltar (incluinte la Mar Atlantica, como la via de la stanio), cual ia limita la coloni elinica a la norde de la Mediteraneo (Emporion).

La colonias fenisia ia es controlada par Cartago de la sentenio 6 aec, un periodo en cual ance Tartesos ia desapare. Ja en la sentenio 3 aec, la vinse de Roma en la Gera Punica Prima ia stimula la interesa de Cartago per la penisola iberian, e par lo un colonia teritorial vera de Espania ia apare, creante un impero punica con sentro en Qart Hadasht (Cartagena), dirijeda par la familia Barca.

Un interveni roman ia aveni en la Gera Punica Du (218 AEC) cual ia comensa un concista gradal roman de "Hispania" (la nom par cual Espania ia es conoseda par la romanos), no completida asta cuasi 200 anos plu tarda. La defeta punica ia permete un concista rapida de la este e sude, cual ia es la area la plu rica e con un nivel de developa economial, sosial e cultural plu armoniosa con la sivilia roman. Multe plu difisil ia es la concista de la poplas de la Plano Alta, plu povre, cual ia esije un fronti a un tipo de gera diferente de la gera clasica (gerilias gidada par Viriato — asasinada en 139 aec; resistes estrema como lo de Numansia – vinseda en la 133 aec).

En la sentenio seguente, la provinses roman de Hispania – convertida a fontes de ricia per ofisiores e comersiores roman, de materias cru, de mersenarios – ia es entre la senas xef de la geras interna roman, con la presentia de Sertorio, Pompeio e Julio Cesar. La pasi (pax romana) ia es la intende declarada par Augusto Cesar, ci ia atenta reali un securia defininte par concista la cantabrianes e la asturianes (29–19 aec), an si sua romanis no ia reali.

En la resta de la teritorio, la romani de Hispania ia es tan profonda ce alga familias roman ia oteni un dinia imperal (Traiano, Adriano e Teodosio) e espanioles ia es entre la plu importantes de la inteletosas roman (la filosofiste Lusio Aneo Seneca, la poesistes Lucano, Quintiliano e Marsial o la jeografiste Pomponio Mela), an si, como Tito Livio ia scrive en tempo de Augusto, "an si lo ia es la provinse importante prima cual la romanes ia invade, lo ia es la ultima cual ia es completa dominada e lo ia resiste asta nosa epoca", atribuinte esta a la natur de la teritorio e a la carater de sua abitores.

La similia de la modo de vive roman, longa e custosa, ia ofre un diversia grande, variante de un grado avansada en Betica (Andalusia moderna) a un grado noncompleta e surfasal de la norde penisolal.

Eda medieval edita

 
Estoria de España par Alfonso 10 la Saja

En la anio 409 un grupo de poplas germanica ia invade la penisola iberian. En la anio 416, la visigotos, un popla ance germanica ma multe plu romanida, ia invade con la intende de restora la autoria imperal. Ma en realia los ia crea un rena visigoto con capital xef en Toulouse e plu tarda en Toledo, pos es vinseda en la batalia de Bouilé (507). Leovigildo ia crea un monarcia visigoto potiosa con la defetas de la xvabeses en la nord-ueste, e otra poplas en la norde, e la bizantianes en la sude-este (provinse de Spania, con sentro en Carthago Spartaria, oji Cartagena), cual no ia es completida asta la rena de Suintila en la anio 625.

San Isidoro de Sevilla en sua Historia Gothorum loda ce esta re "ia es la prima ci posese la monarcia de la arena de tota Espania cual ensirca la mar, un cualia donada a nun de sua presedores". La natur elejable de la monarcia visigoto ia determina un nonstablia grande political marcada par rebelas continuante e asasinas. La uni relijial ia aveni cuando Recaredo ia converti a catolicisme, proibinte la arianisme cual asta alora ia distingui la visigotos, impedinte sua uni con la clases de dirijores espaniol-roman. La Consilios de Toledo ia converti se a un organo en cual, reunida en asembla, la re, la nobiles xef, e la bispos ia vota sur temas political e relijial. La Liber Iudiciorum publicida par Recesvinto (654) como lege comun per espanioles-romanes e visigotos ia es vasta difusada a pos.

En la anio 689 la arabis ia ariva a Africa norde-ueste, e en la anio 711, clamada par la partito visigoto enemin de la re Rodrigo, los ia traversa la Streta de Jibraltar e ia fa un vinse desidente en la batalia de Guadalete. La indica de la superioria ia converti la interveni, inisial limitada, a un forsa vera de potia en Espania, cual ia converti se a un amiria o provinse de la impero arabi nomida Al-Andalus, con capital en la site de Cordoba. La progresa muslim ia es rapida: en 712, los ia concista Toledo, la capital visigoto; la resta de la sites ia sede o ia es concistada, asta cuando en 716 la muslimes ia controla tota la penisola estra la norde.

En Septimania, a la norde-este de la Pirineos, la resiste visigoto ia manteni se asta 719. La progresa muslim contra la rena franco ia es parada par Carlos Martel en la batalia de Poitiers (732). La area norde-ueste de la penisola iberian, poca controlada, ia vide la nase de un nucleo de resiste cristian sentrida en la Montes Cantabrian, un area en cual la poplas nonromanida ia ave no interesa per la muslimes. En la resta de la penisola, la nobiles goto o hispano-roman, ia converti se a islam (muladis como la familia Banu Qasi, cual ia controla la vale de Ebro o ia es fidosa a la autorias muslim an si los ia es cristian (la mozarabis), e ia conserva sua grado economical e sosial e an un grado alta de potia political e teritorial (como Tudmir, cual ia domina un vasta area de la sude-este).

En la anio 718 en Asturias, un nobil nomida Pelayo ia revolta contra la islamistes ma la revolta ia fali e el ia es arestada. En 722 el ia revolta denova, e en la batalia de Covadonga, Pelayo e sua grupo de asturianes ia vinse contra la islamistes. Esta ia es la comensa de la Rena de Asturias e ance de la Reconcista, cual es la refundi de la potia cristian en la penisola de Iberia.

Pos la uni en 1492, Espania ia paia per la viaja de Cristoforo Colombo, cual ia descovre America per la europeanes.

Eda moderna edita

La sposa de Isabel e Fernando (1469) e la vinse de la partito cual ia suporta los en la Gera de Pasa de Rena castilian, ia determina la uni dinastial de la coronas de Castilia e Aragon. La uni teritorial penisolal ia grandi con la Gera de Granada (1492) e la ajunta de Navarra (1512), e ia continua con la crese teritorial tra la norde de Africa e Italia.

La politica sposal de la Monarcas Catolica, ci ia sposi sua fios con la eritores de tota la casas real de Europa ueste (con eseta de Frans), ia lasa un consentra grande de renas per sua neto Carlos 1 de Espania e 5 de Deutxland, cual en ajunta a la grandia enorma teritorial de America resente descovreda (1492), convertida en un impero colonial vera, ia fa ce la Monarcia Espaniol ia deveni la plu potiosa de la mundo. En la mesma anio, on ia comanda la esclui de la iudis, e la Gramatica castilian de Antonio de Nebrija ia apare.

Eda contempora edita

 
2 maio 1808 en Madrid par Goya.

En 1805 en la batalia de Trafalgar, la marina franses-espaniol ia es vinseda par la Rena Unida, sinifiante la fini de la supremia de Espania en la mares e favorente la Rena Unida. Ma Napoleon Bonaparte, imperor de Frans, ia profita de la disputas entre Carlos 4 de Espania e sua fio Fernando e ia comanda la envia de un armada potiosa a Espania en 1808. Sua escusa ia es invade Portugal, aidada par la ministro xef espaniol, Manuel Godoy, a ci el ia promete la trono de un de la partes en cual el ia vole divide Portugal.

La imperor franses ia lasa la trono a sua frate Jose 1, comensante la Gera de Autonomia Espaniol cual ia dura tra sinco anios. En esta tempo on ia scrive la Constitui Espaniol prima, e un de la primas de la mundo, en la Cortes de Cadiz. Lo ia es publicida a 19 marto 1818, la festa de San Jose, e par causa de esta lo es conoseda como "La Pepa" (en espaniol, "Pepe" es un nometa per persones nomida "José"). Pos la defeta de la armada franses, cual ia culmina con la batalia de Vitoria en 1813, Fernando 7 ia reveni a la trono de Espania.

En la rena de Fernando 7 la monarcia espaniol ia esperia un cambia de la governa antica a un stato libriste. Pos sua ariva en Espania, Fernando 7 ia cansela la Constitui de 1812 e ia persegue la libristes constitual, comensante un periodo de asolutisme. Entretempo, la Gera de Autonomia Latina ia continua e, an con la labora de la defendores de la monarcia espaniol, a la fini de la disputa sola la isolas de Cuba e Porto Rica en America ia segue su la governa espaniol.

Pos la Decada Menasante e con la suporta de la politicistes libraliste per la Puni Pragmatica de 1830, Espania ia organiza se denova como un monarcia parlamental. En esta modo, ambos prosedes revoluiste ia gida a la statos nasional nova cual esiste oji. La fini de la rena de Fernando 7 ia marca ance la fini de la asolutisme en la mundo latina.

Organiza teritorial edita

Stato autonom edita

Espania es oji un "stato autonom", un pais formal unida cual funsiona como un federa desentrida de comunias autonom, de cual cada ave niveles diversa de autogoverna.

Oji, Espania es un de la paises european la plu desentrida, car tota sua teritorios maneja local sua sistemes de sania e instrui. Alga de los, como Euscaleria e Navarra, maneja sua finansia publica sin supravide par la governa sentral. Catalunia, la Isolas Canario, Euscadi, e Navara ave sua polisia propre.

Espania es divideda en 17 comunias autonom e du sites autonom.

Munisipas la plu poplada edita

Munisipas la plu poplada de Espania

 
Madrid
 
Barselona
 
Valensia

Munisipa Comuni Autonom Popla Munisipa Comunia Autonom Popla

 
Sevilla
 
Zaragoza
 
Málaga

1 Madrid Comunia Madrid Model:Nts   11 Alicante Comunia Valensian Model:Nts
2 Barselona Catalunia Model:Nts   12 Córdoba Andalusia Model:Nts
3 Valensia Comunia Valensia Model:Nts   13 Valladolid Castilia e Leon Model:Nts
4 Sevilla Andalusia Model:Nts   14 Vigo Galisia Model:Nts
5 Zaragoza Aragon Model:Nts   15 Gijón Asturias Model:Nts
6 Malaga Andalusia Model:Nts   16 Hospitalet de Llobregat Catalunia Model:Nts
7 Murcia Región de Murcia Model:Nts   17 La Coruña Galisia Model:Nts
8 Palma de Maiorca Isolas Baleare Model:Nts   18 Vitoria Euscadi Model:Nts
9 Las Palmas de Gran Canaria Canarias Model:Nts   19 Granada Andalusia Model:Nts
10 Bilbao Euscadi Model:Nts   20 Elche Comunia Valensia Model:Nts
Fuente: Instituto Nacional de Estadística (padrón de habitantes de 2014)[1]

Jeografia edita

 
Un mapa fisical de Espania

Situada en Europa ueste e en Africa norde, lo ocupa la plu de la penisola iberian e, estra esta, du arcipelagos (la isolas Canario en la Mar Atlantica e la isolas Balear en la Mar Mediteraneo), du sites autonom en la norde de Africa (Ceuta e Melilla), la isola Alboran e otra isolas en la costa de Africa (la Isolas Txafarina, la Roca de Vélez de Gomera e la Isolas Alhucema).

Lo es la pais la numero cuatro de la plu grandes de la continente, pos Rusia, Ucraina e Frans e la numero du de la Uni European.

La limitas fisical de Espania es la seguente: a la ueste, Portugal e la Mar Atlantica; la Mar Mediteraneo a la este; la Streta de Jibraltar, la Mar Atlantica e la Mar Mediteraneo a la sude; e la Montes Pirineo, la Golfo de Biscaia e la Mar Cantabrian a la norde.

Politica edita

Espania es un stato sosial e democrata cual ave la monarcia parlamental como sua forma political. La direto de governa parteni a la popla espaniol, de cual la autoria de la stato veni.

La xef de stato es la re de Espania.

En Espania on ave promoves diversa como la catalan, la galego e la euscara cual reclama la autonomia de la pais.

Relatas esterna edita

Espania es un stato-membro de la Uni European de pos 1 janero 1986.

Espania contribui a la finansia de la ONU con 2,52% de sua bujeta anial.

Linguas edita

 
Linguas de Espania.

La lingua ofisial e la plu parlada (par 99% de la popla) es espaniol. Lo es la lingua propre de 89% de espanioles. Lo es parlada par 500 miliones de persones en tota la mundo e es la lingua propre la plu parlada pos putong.

En Espania ance otra linguas es parlada:

Relijio edita

La relijio major de Espania es catolicisme. La Eglesa Catolica es la sola nomida en la Constitui. La relijio du de la plu importantes es protestantisme, con 1 200 000 membros. Islam segue, con 800 000 seguentes, de ci la majoria es migrores de la norde de Africa. Ance la Atestores de Iaue con 100 000 seguentes, la mormones con 20 000 credentes, e la iudis con 15 000 es comunias importante.

Economia edita

Asta la desenio de 1960, la economia espaniol ia es xef suportada par cultiva, ma oji lo emplea sola 5% de la popla ativa. La cultivadas xef es trigo, orzo, mais, patatas, segal, avena, beta, oniones e tomates. La pais ave cultiverias de frutas sitrica e de olivas.

Espania es un de la produores xef de vino.

La mone usada en Espania es la euro, e la banco sentral es la Banca Sentral de Espania, coordinada con la Banca Sentral European.


Esporta a Emporta de
Pais Persento Pais Persento
Model:FRA 16,2 % Model:DEU 10,9 %
Model:DEU 10,6 % Model:FRA 10,6 %
Model:ITA 7,4 % Model:CHN 6,9 %
Model:POR 7,0 % Model:ITA 6,2 %
Model:GBR 6,3 % Model:NED 4,4 %
Model:USA 4,0 % Model:GBR 4,1 %
Model:NED 3,1 % Model:USA 3,8 %
Model:BEL 2,8 % Model:POR 3,5 %
Otra 42,6 % Otra 49,6 %
Continente Persento Continente Persento
Europa 67,2 % Europa 55,4 %
America 10,8 % Asia 19,8 %
Asia 10,5 % America 12,6 %
Africa 6,7 % Africa 10,8 %
Oseania 1,1 % Oseania 0,3 %
Otra 3,8 % Otra 1,1 %
Fonte: Instituida Nasional de Statistica[2][3] (2012)

Musica edita

La cantor la plu popular aora es Pablo Albaran, ci es ance multe popular en Portugal.

Referes edita

  1. Model:Cita web
  2. [1]
  3. [2]