Arcaica
La arcaica es un de la cuatro eones jeolojial de la istoria de Tera, aveninte de 4,000 a 2,500 milion anios ante aora (aaa; 4 - 2.5 giga-anios). A la comensa de la eon, la atmosfera e surfas de la planeta ia es ancora multe calda, la resulta de la resta de la acrete de la hadeica, la desintegra de elementos radioativa, e la developa de la cor de metales. En la arcaica, la crosta de la planeta ia fri sufisinte per permete la forma de continentes e la comensa de vive. La nom de la eon es de la parola elinica Αρχή, cual sinifia "comensa, orijina".
La formi de la continentes es ancora un sujeto de debate. Un ipotese es ce la rocas aora en India, Australia ueste, e Africa sude ia formi un continente nomida Ur per sirca 3,100 milion aaa; un otra sujesta ce la rocas de Australia ueste e Africa sude ia formi un continente nomida Vaalbara tan temprana como 3,600 milion aaa. An si la continentes prima ia es formida alora, la roca de esta eon composa sola 7% de la cratones (partes de la crosta multe vea e stable), e ce sola 5 - 40% de la area de continentes oji ia es formida en la arcaica
On ave bon indicas ce vive ia apare prima a la fini de la hadeica o temprana en la arcaica. La sinias la plu temprana per vive es grafito biojenesal en rocas de Gronland, 3.7 bilion aaa. La fosiles la plu vea es composada de stromatolitos, cual es tapetos de microbios formida en acua basa par sianobateria. La plu vea de los ia es trovada en arenito de Australia ueste, 3.48 bilion aaa. Los ia deveni comun tra la arcaica. Sianobateria ia es partal influente en la crea de osijen libre en la atmosfera. En ajunta a bateria, otra formas de procariota, pd arceas, ia es ance identifiada. Ma no fosiles eucariota ia es trovada.
Per detalias, vide la scala de edas jeolojial.