Arco
Un arco es un strutur vertical e curvada cual estende de un lado a la otra supra un spasia e comun suporta la pesa supra lo. Voltas es un arco continuante cual formi un teto. Arcos ia aveni tan temprana como la milenio 2 aec en la arciteta de brices en Mesopotamia. Sua usa sistemal ia comensa con la romanes antica, ci ia es la primas ci ia aplica la tecnica a un cuantia grande de strutures.
1. Clave
2. Cuneo
3. Esterna de la arco
4. Bloco suportante
5. Interna de la arco
6. Altia de la arco
7. Largia interna
8. Stribo
Arcos pote ave multe formas, ma tota pote es incluida en cuatro categorias: sirculal, puntida, parabolal, e cadenal.
Arcos sirculal ia es usada comun par la construores de arcos antica de petra pesosa. La romanes antica usa los per estende supra areas grande e abrida. Un grupo de arcos paralel ordinada con lunlotra formi un pasaje covreda nomida un arcada. Un grupo de arcos ordinada en un serie linial formi un otra tipo de arcada, como un acuaduto roman.
Arcos puntida es la plu comun usada par la construores de arciteta gotica. La vantaje de la arco puntida es ce la presa es reduida a la funda. Esta inova ia permete abridas plu alta e plu prosima con lunlotra, tipal de construidas gotica.
La arco parabolal usa la prinsipe ce, cuando un pesa es aplicada aplicada a un arco, la compresa interna cual resulta de la pesa segue la forma de un parabola. La arcos parabolal produi la presa la plu grande a la funda, ma pote estende supra la areas la plu grande. Los es usada comun per desinia pontes.
La arco cadenal pare simil a un parabola. La forma es de un curva formida par un estende laxe de un cadena o un corda, ma invertada. Lo es ideal per un arco libre e con un spesia constante. Lo es usada comun per arcos estetical.