Asida
Un asida es un molecula o ion capas de o dona un proton (pd. un ion de idrojen, H+), conoseda como un asida de Brønsted-Lowry, o formi un lia covalente con un duple de eletrones, conoseda como un asida de Lewis.
La categoria prima de asidas es la donores de protones, o asidas de Brønsted-Lowry. En la caso spesial de solves acuosa, donores de protones formi idronio H3O+ e es conoseda como asidas de Arrhenius. Brønsted e Lowry ia jenerali la teoria de Arrhenius per inclui solves nonacuosa. Un asida de Brønsted o Arrhenius conteni usual un atom de idrojen liada a un strutur cimical cual es ancora enerjial favorable pos la perde de H+.
Asidas acuosa de Arrhenius ave cualias tipal cual furni un descrive pratical de un asida. Asidas formi solves acuosa con un sabor asida, pote cambia la turnasol blu a roja, e reata con bases e alga metales (como calsio) per formi sales. La parola asida deriva de la latina acidus, cual sinifia "asida". Un solve acuosa de un asida ave un pH min ca sete e on refere a lo nonformal ance como "asida" (como en "disolveda en asida"), ma la defini streta refere sola a la disolveda. Un pH plu basa indica un asidia plu alta, e donce un consentra plu alta de iones positiva de idrojen en la solve.
Asidas acuosa comun inclui asida idroclorica (un solve de clorido de idrojen trovada en asida gastral cual ativi enzimas de dijesta), asetica (vinagra es un solve acuosa diluida de esta licuida), asida sulfurica (usada en pilas de auto), e asida sitrica (trovada en frutas sitrica). Como esta esemplos mostra, asidas (en la sensa nonformal) pote es solves o sustantias pur, e pote deriva de asidas (en la sensa streta) cual es solidas, licuidas o gases. Asidas forte e alga asidas debil consentrada es corodente, ma on ave esetas como carboranes e asida borica.
La categoria du de asidas es la asidas de Lewis, cual formi un lia covalente con un duple de eletrones. Un esemplo es trifluorido de boro (BF3), de cual sua atom de boro ave un orbital vacua cual pote formi un lia covalente par comparti un duple solitar de eletrones sur un atom en un bas, per esemplo la atom de nitrojen en amonia (NH3). Lewis ia considera esta como un jenerali de la defini de Brønsted, tal ce un asida es un spesie cimical cual aseta duples de eletrones o direta o par relasa protones (H+) en la solve, cual aseta alora duples de eletrones. Clorido de idrojen, asetica, e la plu de otra asidas de Brønsted-Lowry no pote formi un lia covalente con un duple de eletrones e donce no es asidas de Lewis. Reversada, multe asidas de Lewis no es asidas de Arrhenius o Brønsted-Lowry. En la terminolojia moderna, un asida es un asida de Brønsted par implica e no un asida de Lewis, car cimicistes refere cuasi sempre a un asida de Lewis como tal.