Base (cimica)
En cimica, on ave tre definis en usa comun de la parola "base": bases de Arrhenius, bases de Brønsted, e bases de Lewis. Tota definis acorda ce bases es sustantias cual reata con asidas, como orijinal proposada par G.-F. Rouelle en la media de la sentenio 18.
En 1884, Svante Arrhenius ia proposa ce un base es un sustantia cual desasosia en solve acuosa per formi iones OH-. Esta iones pote reata con iones H+ de la desasosia de asidas per formi acua en un reata asida-base. Un base es donce un idrosido metal como NaOH o Ca(OH)2. Tal solves acuosa de idrosido es tipal liscosa a la toca e amarga, e los cambia la color de indicadores de pH (per esemplo, cambia la color de paper de pH roja a blu).
En acua, par altera la ecuilibra de autoioni, bases produi solves en cual la ativia de la ion H+ es plu basa ca lo es en acua pur, pd. la acua ave un pH plu alta ca 7,0 a situas normal. Un base disolvable es nomida un alcalin si lo conteni e relasa iones OH- cuantial. Osidos metal, idrosidos, e alcosidos es bases, e bases conjugada de asidas debil es bases debil.
Bases e asidas es regardada como oposantes cimical car la efeto de un asida es aumenta la consentra de idronio (H3O+) en acua, ma bases redui esta consentra. Un reata entre solves acuosa de un asida e un base es nomida neutri, produinte un solve de acua e un sal en cual la sal separa a sua iones composante. Si la solve acuosa es saturada con un disolveda de un sal spesifada, cualce plu de esta sal presipita estra la solve.
En la teoria plu jeneral de asida-base de Brønsted-Lowry (1923), un base es un sustantia cual pote aseta cationes idrojen (H+) - ance conoseda como protones. Esta inclui idrosidos acuosa car OH- reata con H+ per formi acua, tal ce bases de Arrhenius es un sucolie de bases de Brønsted. Ma, on ave ance otra bases de Brønsted cual aseta protones, como solves acuosa de amonia (NH3) o sua derivadas organica (aminas). Esta bases no conteni un ion OH- ma reata con acua, resultante en un aumenta de la consentra de la ion OH-. Ance, alga solves nonacuosa conteni bases de Brønsted cual reata con protones solvada. Per esemplo, en amonia licuida, NH2- es la spesie de ion basica cual aseta protones de NH4+, la spesie asida en esta solve.
G. N. Lewis ia comprende ce acua, amonia e otra bases pote formi un lia con un proton par causa de la duple noncompartida de eletrones cual la bases posese. En la teoria de Lewis, un base es un donor de un duple de eletrones cual pote comparti un duple de eletrones con un asetador de eletrones cual es descriveda como un asida de Lewis. La teoria de Lewis es plu jeneral ca la model de Brønsted car la asida de Lewis no es nesesada un proton, ma pote es un otra molecula (o ion) con un orbital basa vacua cual pote aseta un duple de eletrones. Un esemplo notable es trifluorido de boro (BF3).