Bandera de Rusia

Bandera nasional de la Federa de Rusia es un de la simboles ofisial de la pais. La bandera es un retangulo orizonal con proportio 2:3 divideda en tre bandas orizonal de grandia egal: blanca (alta), azul (media), e roja (basa). La desinia presente ia es readotada en anio 1991, e poca alterada par un lege de 1993.

La colores de la bandera no ave alga sinifia ofisial.

La colores no es ofisial normida, ma on usa tipal la esta en situas ofisial: la blanca pur per la blanca, Pantone 286C per la azul, e Pantone 485C per la roja.

La bandera de Rusia es la fonte de la colores panslavica, e es simil a la banderas de Slovensco e Slovenia.

Istoria

Banderas individual usada par rejimentos de la Prinsipado de Moscva e la Rena de Rusia ia es pesos de tela con imajes de santas padronal e figures eraldial de la stato.

La bandera prima en la sensa moderna ia es usada en la barcon de gera Oriol construida per la re de Rusia par spesialistes nederlandes en anio 1668. Istoristes no sabe la desinia de sua bandera, ma la telas encargada per cose lo ia es blanca, azul, e roja.

On sabe ce banderas identica a la moderna ia es usada de pos anios 1690s, cuando la imperor Petro 1 Grande ia fundi la marina de Rusia.

Bandera otra intruida a la mesma tempo ia es un crus azul sur fondo blanca nomida "la bandera de San Andreo". A pos anio 1720 la usa de dos banderas ia es separada: la bandera blanca-azul-roja ia es usada per barcones comersial, e la bandera de San Andreo per militar.

Bandera 3 de la imperor Petro ia combina la bandera de San Andreo e la crus de San Jorjio (santa padronal de Moscva, crus blanca direta sur fondo roja). Esta bandera deveni usada como la bandera de proa.

Bandera personal de la imperor ia es agila-con-dos-testas negra sur la fondo jala, refletada la scermo eradial de Rusia. Banderas simil ia es usada en la armada de la impero.

La banderas ia es ancora persepida sola como cosas maral, e no usada en tera. En anio 1858 baron Karl von Koehne, la eraldiste xef de la impero, ia proposa ce Rusia ave un bandera seguente la tradision eraldial de Deutxland: composada de bandas de mesma colores como la scermo eraldial, cual es per Rusia la negra, la orania (o la jala), e la blanca.

Tra desenios on ia ave un confusa sur cual bandera debe es la simbol nasional xef. En anio 1883 un comanda spesial ia deside ce la bandera blanca-azul-roja es la simbol nasional, e la bandera negra-orania-blanca es la simbol de la dinastia imperal. Final la confusa ia es solveda con un lege en 1896.

En anio 1917 la imperor ia es suvertida, e grupos revolual ia usa banderas roja. Cuando la republica soviet ia es fundida, bandera roja con la nom de la stato ("la Republica Soviet Federal Sosialiste de Rusia") scriveda con leteras ora ia deveni sua simbol.

En 1922 la Rusia Soviet con tres otra republicas ia formi la Uni Soviet. Sua bandera ia es un stela roja con franje ora e un falxeta-e-martel ora sur fondo roja, simbolinte la ideolojia comuniste e la uni de popla laborante.

Pos la Gera Mundal Du la republicas de la Uni Soviet ia adota banderas de desinias nova, simil a la banderas de la Uni, ma con un elemento grafical distinguinte. Rusia ia es la ultima de republicas ci fa lo en anio 1954, e sua elemento elejeda ia es un banda vertical streta azul longo la palo de la bandera.

Cuando la Uni Soviet ia colasa en anio 1991, la bandera nasional blanca-azul-roja ia es reponeda. Orijinal lo ia ave proportio 1:2 (como tota la banderas soviet), ma en 1993 lo ia es alterada a 2:3, n la descrive de la colores ia es poca alterada a parolas plu comun. La banderas imperal de San Andreo e de proa ia es ance reponeda per la rusce marina.

Un de banderas individual de la re (1552).
Un de suposadas banderas de la barcon Oriol (1668).
Bandera de marina comersial a pos 1690s, e nasional (1883-1917).
Bandera de marina militar ("San Andreo", 1720-1918, e a pos 1992).
Bandera de proa (1720-1924, e pos 1992).
Un de la banderas individual de la imperor (1858).
Bandera eraldial (1858-1917).
Un de la banderas de la Rusia Soviet usada pos 1917.
Bandera de la Uni Soviet (1924-1991).
Bandera de la Rusia Soviet (1954-1991)
Bandera adotada en 1991.
Bandera moderna (pos 1993).