Bon Diva, o Bona Dea en latina, ia es un diva en la relijio roman antica. El ia es asosiada con virjinia e fertilia de femes roman, sani, e la proteje de la stato e popla de Roma. Seguente fontes en leteratur roman, el ia veni de Magna Graecia ("Elas grande") a alga tempo en la Republica media, e ia es donada sua propre culto de stato sur la Colina Aventino.

Un sculta de un Virjin Vestal

Sua rituos ia permete la usa de vino forte e sacrifia de sangue per femes, cosas cual ia es en otra casos proibida per los en tradision roman. Omes ia es proibida de sua misterios e posese de la nom vera de la bon diva. Car autores mas ia ave conose minima de sua rituos e atribuis, divina sur sua identia ia es comun, incluinte suposas ce el es un aspeta de Terra, Ops, Cibele, o Ceres, o un forma latina de la diva elinica Damia (pd, Demeter). Plu comun, el ia es identifiada como la sposa, sore, o fia de la dio Fauno, donce coresponde como la diva de natur Fauna, ci ia pote predise la destina de femes.

La diva ia ave du festas anial. Un festa ia es conduida a sua templo Aventino a 1 maio (cual lia el a la diva Maia, ci ia ave la mesma dia). La otra ia es ospitada par la sposa de la ministro la plu alta de Roma per un grupo invitada de damas de la elite e sua atendores fema. Esta festa ia deveni un cosa importante scandalosa en 62 aec, cuando la politicor Publio Clodio Pulcher ia es litigada per sua intrui a la rituos, suposada intendente a la sedui de la sposa de Julio Cesar, ci Cesar ia divorsa plu tarda car "la sposa de Cesar debe es ultra suspeta". La rituos ia resta un sujeto de curiosia e divina mas, e relijiosa e lasiva.

La culto de Bon Diva en la site de Roma ia es conduida par la Virjines Vestal, e sua cultos en la provinses par damas-pretesas. Scultas survivente mostra la Bon Diva como un dama roman calma con un corno de abunda e un serpente. Dedicas personal a el ia es atestada entre tota clases, spesial la plebes, omes e femes librida, e sclavias. Prosima un tri de sua dedicas es de omes, alga de ci es posible legal envolveda en la culto.