Buruxasci (lingua)
Buruxasci es un lingua isolida cual es parlada par sirca 50 000 persones Buruxo (acc Hunza) en la vales de Pacistan norde.
Lo marca ambos sujeto e ojeto, e la ordina de parolas es jeneral sujeto-ojeto-verbo.
Nomes es divideda entre cuato jeneras: persones mas, persones fema, cosas contable, e cosas noncontable, e la asinia es jeneral lojical. Alga parolas pote es ambos contable e noncontable, cual produi diferes de sinifia. Per esemplo, báalt sinifia "poma" cuando contable, ma "pomo" cuando noncontable. (Nota ce lo es posible ce la parola protoindoeuropean abel ia es emprestada de buruxasci.)
La morfolojia de nomes es composada de la tronco, un prefisa de posese (obligada per alga nomes), e sufisas de cuantia e caso. Cuantias inclui singular, plural, nondefinida, e grupida. Casos inclui asoluta, ergativa/apoiada, jenetiva, e alga locativas, indicante e loca e dirije e pote es composada.
La verbos es marcada per person e cuantia, sinco tempos/aspetas, e ses modos. Plu, los ave tre troncos: pasada, presente, e seguente. La pasada es la form de disionarios e es ance usada per comandas e nomidas; la radis seguente es simil a la partisipio pasada e es usada per coordina. Un verbo pote ave tan multe como cuatro prefisas e ses sufisas.