Protoindoeuropean

La lingua protoindoeuropean (PIE) es la reconstrui de la asendente suposada de la linguas indoeuropean. La loca de la parlores orijinal no es serta conoseda, ma la teoristes sujesta ce la area de Ucraina e Cazacstan moderna es la plu probable (la teoria curgan). Otra teorias inclui ce la popla ia abita la area de la rio Danubio, la montanias Balcan (la teoria balcan), o Anatolia (la teoria anatolian). La teoristes crede ce la protoindoeuropeanes ia comensa estende entre la milenio 7 aec e la milenio 5 aec. Un otra teoria – la teoria de continua paleolitica – sujesta ce la protoindoeuropeanes ia abita multe de Europa an ante la milenio 10 aec.

La istoria de la reconstrui ia comensa cuando la linguiste engles William Jones ia oserva ce sanscrito sembla elinica antica e latina, ce los ia ave cisa un radis comun, e ce otra linguas como goto, la linguas celta, e parsi ia es posible relatada a los ance. La descrive de PIE ia es cuasi intera completida en la comensa de la sentenio 20. La descovre de la linguas anatolian e tocarian ia causa alga ajuntas e cambias de la descrive.

PIE ia es reconstruida par la metodo de compara de linguas recordada, como sanscrito, parsi antica, elinica antica, latina, goto, norsce vea, eres vea, lietuvisce, e slavica vea de eglesa. Par compara parolas simil en esta linguas, e par descovre regulas de cambia cual pote esplica la varias, linguistes ia pote divina la forma posible de la parola orijinal. An si alga linguistes sujesta ce tota linguas es ultima relatada e derivada de un lingua protoumana, la sola otra grupo de linguas cual ave alga indica de relata a PIE es la familia de linguas uralica (pe, suomi, esti, magiar e enets).

Pronunsia

La consonantes esplodente: p, b, b^h, t, d, d^h, k, g, gh, k', g', g'^h, k^w, g^w, g^wh.

La ^h indica la ajunta de un espira plu forte; la ' indica un palatali de la sona; la ^w indica un ajunta labial.

La consonantes resonante: m, n, s, r, l, y, w.

Estas pote es ance usada como cuasi-vocales cuando los no es a lado de un otra consonante.

La consonantes larinjal: h₁, h₂, h₃.

Estas ia es introduida a PIE cuando on ia descovre la usa de los en la linguas anatolian. No otra familia de linguas indoeuropean ia reteni los. On divina ce los ia es pronunsiada como sonas velal, uvulal, o glotal. La linguiste Jens Rasmussen ia sujesta [h] como en engles, [x] como ch deutx o scotes, e [ɣw] como nederlandes g ma con un bilabial, per h₁, h₂, e h₃ en acel ordina.

La rol de la larinjales la plu importante, per linguistes ci studia PIE, es cuando los presede o segue un vocal, los pote cambia los en un modo notable sola en la linguas desendente. En la desendentes de PIE, un vocal a lado de un h₁ tende deveni [e], h₂ [a], e h₃ [o], corte cuando la larnijal presede la vocal, e longa cuando lo segue la vocal.

La vocales: e, e:, o, o:, e posible a, a:. La sonas de i, i: e u, u: ia esiste como varias de y e w.

La du puntos indica plu estende, ance indicada par un macron ( ¯ ) supra la vocal. La resonantes e la larinjales pote es usada como vocales, en formas corta e estendeda.

Diftongos: ei, eu, e:i, e:u, oi, ou, o:i, o:u (e posible ai, au, a:i, a:u).

Morfolojia

PIE ia es un lingua infletada: la relatas gramatical ia es indicada par morfemes de infleta, la plu comun par sufisas, ajuntada a la radises. La plu de radises en PIE ia es de un silaba con la forma CVC(C). Esta forma ia es comun cambiada par ablaut (vide a su). Probable, radises cual pare comensa con un vocal ia comensa orijinal con un de la larinjales.

Ablaut es la varia de vocales de un radis per indica cambias de infleta o de rol gramatical. Per esemplo, en engles on ave la varias "sing", "sang", "sung", en cual la cambias indica la presente, la pasada, e la partisipio pasiva. PIE ia ave du grupos de ablaut – la un per varias de e, e la otra per varias de o. La varias la plu comun es entre normal, estendeda, e Ø (zero vocal), e aplica e a la radis e a la sufisa. Cuando la vocal deveni Ø, un resonante o larinjal prosima deveni un cuasi-vocal.

Nomes en PIE ia ave oto o nove casos: nominativa (sujeto), acusativa (ojeto), jenitiva (posese), dativa, strumental, ablativa, locativa, vocativa, e cisa alativa. Los ia ave tre sesos: mas, fema e neutra. Los ia es poneda en un de du tipos de declina: temal e atemal. La radis de nomes temal ia es formida con la sufisa liante -o- (ma -e- en la vocativa) e la radis no reseta ablaut. La radis de nomes atemal ia es plu antica, e es clasida en cuatro clases, seguente la formas de ablaut cual los reseta.

Esemplos:

	Singular		Dual		Plural
	Animada	Neutra	Animada	Neutra	Animada	Neutra
Nominativa	-s, -Ø	-m, -Ø	-h₁(e)	-ih₁	-es	-h₂, -Ø
Accusativa	-m	-m, -Ø	-ih₁	-ih₁	-ns	-h₂, -Ø
Vocativa	-Ø	-m, -Ø	-h₁(e)	-ih₁	-es	-h₂, -Ø
Posese	-(o)s		-h₁e		-om
Dativa	-(e)i		-me		-mus
Strumental	-(e)h₁		-bʰih₁		-bʰi
Ablativa	-(o)s		-ios		-ios
Locativa	-i, -Ø		-h₁ou		-su

Pronomes:

		Pronomes personal (Beekes)
		Person 1		Person 2
		Singular	Plural	Singular	Plural
nominativa		h₁eǵ (oH/Hom)	uei	tuH	iuH
acusativa	asentuada	h₁mé	nsmé	tué	usmé
	enclitica	h₁me	nōs	te	uōs
Posese	asentuada	h₁méne	ns(er)o-	teue	ius(er)o-
	enclitica	h₁moi	nos	toi	uos
dativa	stressed	h₁méǵʰio	nsmei	tébʰio	usmei
	enclitica	h₁moi	ns	toi	us?
Strumental		h₁moí	nsmi?	toí	usmi?
Ablativa		h₁med	nsmed	tued	usmed
Locativa		h₁moí	nsmi	toí	usmi

Per favore, note como per person 1 singular, on pote vide esemplos sujestente "ego" e "me", e per person 1 plural, on pote vide esemplos sujestente "nos" o "we" de engles; en person 2 singular, vide sujestes de "tu", e per la plural, sujestes de "vos" o "you" de engles.

Pronomes de mostra (ance usada per pronomes de person 3) es fundida sur la radises so- (esta, acel), cual deveni to- per la plu de varias, e h₁e- (la, la presedente). La pronom refletante per person 3 es s(w)e (se). La radis de la pronom de relata es (H)yo- (ci, cual). La pronom de demanda, ance usada como la pronom nondefinida, ave la radis k^we- o k^wi-, con k^wo- per la forma ajetival. Final, la pronom per "un otra" o "la otra" es alyo.

Verbos en PIE es complicada e inclui ance la sistem de ablaut, con un distingui entre verbos temal e nontemal, como la nomes. La aspeta es la plu importante, e inclui la stativa (verbos cual indica un state), la aspeta nonperfeta (verbos cual indica atas continuante, abitual o repeteda), e la aspeta perfeta (verbos cual indica un ata completida o atas videda como un segue integrada). Verbos ave ance (a minima) cuatro modos (indicante, comanda, sujuntiva, e esperante), du voses (ativa e mediopasiva), tre persones e tre cuantias (singular, dual e plural). Plu, la verbos de PIE ave sufisas per crea partisipios (un per cada combina de tempo e modo) e nomes verbal.

Esemplo:

		Sihler (1995)
		Radis atemal	Radis temal
Singular	Person 1	-mi	-oh₂
	Person 2	-si	-esi
	Person 3	-ti	-eti/-ei
Dual	Person 1	-wos	-owos
	Person 2	-th₁es	-eth₁es
	Person 3	-tes	-etes
Plural	Person 1	-mos	-omos
	Person 2	-te	-ete
	Person 3	-nti	-onti

Numeros:

• 1 - Hoi-no-, Hoi-wo-, Hoi-k^wo-; sem-
• 2 - d(u)wo-
• 3 - trei-, tri-
• 4 - k^wetwor-, k^wetur-
• 5 - penk^we
• 6 - s(w)ek's
• 7 - septm
• 8 - ok'to:, ok'tou; o h₃ek'to, h₃ek'tou
• 9 - (h₁)newn
• 10 - dek'm(t)
• 100 - k'mtom

Paroletas inclui averbos, posposadas, negantes, juntas e esclamas. La averbos e la posposadas ave la mesma forma. Parolas cual en elefen e otra linguas european moderna es averbos derivada de ajetivos es, en PIE, formas de nomes. Per esemplo, meg'h₂ ("en un modo grande") es un nom singular en la rol nominativa-acusativa.

Averbos/posposadas:

• apo - de (vide elenica apo, engles of, off)
• de, do - a (vide engles to)
• epi, opi - asta (vide elinica epi)
• h₁ad - a, asta (vide latina ad, engles at)
• h₁en - en (vide latina in, elinica en, engles in)
• h₁en-ter - en, interna (vide latina inter)
• h₂en, h₂eno - sur (vide engles on)
• h₂euo - de, a via, a sur
• h₂n-b^hi, h₂m-b^hi - sirca (vide elinica amphi)
• kata, kmta - a sur (vide elinica kata)
• kom - con (vide latina cum)
• nd^h-er - su (vide engles under)
• ni - a su, su
• nu - aora (vide latina nunc, engles now)
• pe - con
• per(i) - sirca, tra (vide elinica peri, latina per)
• per, pero, pro - ante, a ante (vide latina per, pro)
• r - per (enclitica)
• uper - supra (vide elinica hyper, latina super, engles over)
• up, upo - su (vide elinica hypo, latina sub)

Negantes:

• ne - no (vide latina ne, engles no)
• n- - non (prefisa; vide elinica an-, latina in-, engles un-)
• ma - no (usada per comandas)

Esclamas:

• wai! - ai! (vide latina vae, engles woe)
• o:!, eh₃! - o! (vide latina o, engles oh)