Preistoria de la popla PIE (Teoria Balcan)
Esta article descrive la preistoria de la popla PIE de la vista de la Teoria Balcan. (Per discutes sur la preistoria de la popla PIE (Teoria Curgan) o la preistoria de la popla PIE (Teoria Anatolian), per favore vade ala.)
La poplas "pre-PIE" (pre-proto-indo-european) ia parla un varia de dialetos, prima en la refujia de la Balcanes. Pos la fini de la eda glasial, los ia estende se a la norde, ueste, e este, probable seguente la animales migrante. La cuantia de popla ia es poca e sperdeda tra la taiga, e la cultures ia es xasores-coliores de la tipos de la paleolitica.
A la mesma tempo, popla de la area de Frans sude e Espania norde (pd la Montes Pirineo) estende se ance, per la plu parte a Frans norde, Beljia, e Britan. Lo es posible ce los ia parla un colie de linguas relatada a un asendente distante de Euscara.
E en la este, en Rusia, xef a ueste de la Urales, la popla ci ta deveni la asendentes de la parlores de la linguas uralica ia estende a la norde, ueste, e este, a Scandinavia, la area de la Mar Baltica, Rusia norde, Bielarus, e ance a Sibir ueste, Cazacstan, e Ucraina este.
Colonistes de Anatolia ia porta la tecnolojia de cultiva a la area cual es aora Elas, do los fundi la cultures Cultur Sesclo, Cultur Dimini, etc, sirca 7000 aec. Los ia es probable relatada a la popla de la Mar Ejeo, ci ta deveni la minoanes de Criti. Otra colonistes ia ariva ance, de un loca en la Levante, a la costa de Iliria (aora Xciperia), e posible a la partes sude de Italia, portante un otra cultur cultivante, la cultur de vasos cardian.
De la cultivores en Elas norde-este, la xasores-coliores pre-PIE en Balgaria e partes de Romania (longo la Danubio basa) ia aprende la siensa de cultiva e ia comensa crese rapida como la "cultur prima de la neolitica temperada". Parlante alga de la dialetos pre-PIE, los ta deveni la fundores de popla parlante PIE "nova", la asendente plu direta de la linguas indo-european moderna.
La cultur de esta popla PIE ia estende a ueste e este. En la ueste, lo ia segue la Danubio a la rejion cual es aora Magiar e ultra lo a Txesco, Slovensco, Osteraic e Deutxland, un area cual es ja abitada par sua relatas distante de xasores-coliores.
La popla cual ia migra a la este ia segue la costa norde de la Mar Negra, traversa la stepes de Ucraina, e move longo la Rios Dnistr, Bug, Dnepr, e Donets. Los ance ia asorbe sua relatas xasor-colior ja en la Ucraina e ia aprende un otra stilo de vive de los.
Car la cultivores de la Balcanes ia parla un colie de dialetos de PIE cual ia es adotada par la xasores-coliores ja en la areas a cual la cultivores migra, la "suprastrato" no es tro distante de la "sustrato", cual esplica la asentia de indicas forte de sustratos non-PIE en multe de la desendentes de PIE. Cuando los ia estende a areas ja abitada par la popla atlantica, uralica, e (plu tarde) otras, influes de sustratos deveni plu clar.
En la Balcanes, do la cultures orijinal de PIE - la Starcevo-Koros-Cris en la ueste de 7000 aec e la Karanovo a la este de 6000 aec - ia domina, otra grupos e cultures ia developa. Plu tarda, cultures como la Vinča-Turdas (5700 a 4500 aec) en lo cual es aora Serbia, e la Hamangia (5200 a 4500 aec) longo la costa balcan de la Mar Negra, ia developa.
Plu tarda, cuatro etnicos - la dacianes a la norde, la tracianes a la este, la ilirianes a la ueste, e la proto-elinicas a la sude (Macedonia e Elas norde) - ia continua crese. Pos 2000 aec, la elinicas ia entra Elas sude e ia prende controla de la penisola intera, la costa ueste de Anatolia, e la isolas de la Ejean, deslocante o asorbente la poplas ejean, incluinte la minoanes, e ia adota ance alga de sua cultures.
La ueste
edita
La cultures danubian en Magiar e Deutxland sude - la asendentes de la proto-celto-italicas - ia developa un cultur cultivante, la LBK (la cultur de vasos de bandas), sirca 5500 aec. Esta cultur ia es ance adotada par la proto-balto-slavicas a la este e la proto-germanicas a la norde (vide plu a su).
Un ramo de PIE ueste en Txecia ia viaja par la Oder e Elbe a Deutxland norde e Danmarc, do los encontra sua cusines distante de la cultures Ellerbek, Ertebolle, e Swifterbant. Esta cusines ia asorbe ja la popla uralica ci ia abita la rejion tan temprana, cual es posible la razona per alga de la stranias trovada en la ramo germanica de PIE.
Tra tempo, cada area en la cultur LBK ia developa sua cualias unica. En la norde, la proto-germanicas ia developa la cultur TRB (la cultur de vasos embutin) sirca 4300. La proto-celto-italicas a la sude ia developa la cultures Baden e Wartberg sirca 3600 aec. La proto-balto-slavicas ia developa la cultur de amforas globin sirca 3400 aec. Lo ia estende tan distante como la cultur Fatianovo-Balanovo (3200 a 2300 aec), un cultur composada de un misca de popla uralica e indo-european.
Comersia ativa (e la cultur LBK cual los ia comparti plu temprana) ia condui la tre grupos a developa denova un cultur comun, la cultur de vasos cordida, cual ia domina la area de sirca 2800 a 2350 aec. A la mesma tempo, un cultur nova - la cultur de vasos campanin, probable la resulta de intercambia con la areas de la Atlantica - ia comensa influe forte la proto-celto-italicas. Esta alora ia deveni un segue de cultures: la Unetice (2300 aec), la cultur de tumulos (1600 aec), e la cultur de campos de vasos (1300 aec), cual ia es portada a ueste (do lo ta asorbe multe de la poplas atlantica) e ia porta la dialectos de proto-celtica con lo.
La proto-italicas ia usa un dialeto de la proto-celto-italica parlada en la area de Slovenia moderne. Los ia migra a Italia norde sirca 1600, asorbente la plu de la popla nativa, estra la plu potiosa e influente, la etruscas.
La este
editaEn Europa este, la popla PIE ia move a este longo la costa norde de la Mar Negra. La popla pre-PIE de la cultures xasor-colior ia developa la cultur Dnepr-Donets longo la rios Dnepr e Donets, e la cultur Sredny Stog plu este, ambos sirca 5000 aec. Los ta developa un economia transumante pos aprende la tecnicas de doma de bestias.
Un de la dialetos este de PIE ia sperde supra la rios de Moldova e Ucraina este (la Dnistr, la Bug, e la Dnepr) e ultra a la Pripet e la Vistula en Bielarus e Polsca. Esta popla ia es la asendentes de la popla de la linguas balto-slavica. Los ci ia abita longo la Mar Baltica ia deveni la balticas; los plu sude e este ia deveni la slavicas. Lo pare ce la balticas ia ave alga contata con la germanicas, e ce los ia intercambia alga cualias de sua cultures e linguas. La balto-slavicas ia es ance influeda multe par la cultures proto-indo-iranian a sua este.
La cultur la plu forte ia es la cultur Cucuteni-Tripilia, cual ia developa plu la tradisiones de cultiva de la Balcanes, e ia continua ance la stilo de vive cuasi-urban, comensante sirca 5200. Un intercambia biladal ia developa en la area: La Cucutenis ia dona la tecnolojia de cultiva a la popla de Dnepr-Donets e Sredny-Stog, e acel popla ia dona la economia de bestias domada e posible la usa de cavalos, cual los ia adota de la popla non-PIE (ugrica o posible turcica) an plu este, Botai e Tersek.
La stepes ia coraji plu migra. En cuando la popla de Ucraina norde ia move plu norde e deveni la proto-balto-slavicas, un grupo relatada ia move a este longo la borda entre stepe e foresta (ja abitada par la xasores-coliores uralica) e ia ateni la montes Altai ueste, do los ia deveni (posible) la proto-tocarianes de la cultur Afanasevo (3300 a 2500 aec). Plu tarde, alga de esta popla ia migra a la vilas sirca la basin de Tarim, longo la Via de Seda.
Un grupo sofisticada ia coloni la area de la Rio Cuban a la norde-este de la Mar Negra do, miscante con la cultures caucasian cual ia abita ja la area, los ia crese e deveni la cultur Maicop (3700 a 3000 aec). La popla ia prende vantaje de sua loca entre la stepes, la Caucasos, e la cultures avansada a la sude de la Caucasos, e ia deveni un sosia rica e potiosa. Sirca 1650 aec, un parte de esta popla ia invade Anatolia, do los ta deveni la hititas e sua relatas.
La popla ci ia resta en la stepes a norde de la Mar Negra ia deveni la proto-indo-iranianes, ci ia fundi la cultur Iamna, sirca 3300 a 2600 aec, e ia engoli la otra cultures de la rejion. Sua desendentes ta inclui la cultures Poltavca, Andronovo, e Srubna. Plu tarde, los ta deveni la agregas de popla conoseda como la scitianes, la sacas, la sarmatianes, e la cimerianes. Los ta coloni India norde sirca 1500 aec, e Persia sirca 800 aec.
Pos 3000 aec, la cultures forte de vasos cordida e Yamna ia partisipa en comersia estendosa (e probable gera, ance) e ia influe lunlotra sinifiante. Studias de ADN ia sujeste ce multe move ia aveni, xef de este a ueste. La balto-slavicas e la indo-iranianes ia partisipa ance en la "sprachbund" (comunia linguistica) cual ia resulta en la cambias "satem" en sua dialetos de PIE, en cuando la otra dialetos ia resta "centum".
La Teoria Balcan ia es orijinal introduida par Igor Diakonov en 1985. Colin Renfrew ia ajunta la Balcanes a sua Teoria Anatolian como la loca orijinal de la popla PIE, estra la anatolianes. E otras ia sujeste ce areas prosima a la Balcanes ta es plu probable ca la stepes o Anatolia.
Referes
editaD’iakonov, I.M. (1985). On the original home of the speakers of Indo-European. Journal of Indo-European Studies 13: 92-174.
Kristinsson, Axel (2012). Indo-European Expansion Cycles. Journal of Indo-European Studies 40: 365-433.
Renfrew, Colin (1987/1989) Archaeology and Language: The Puzzle of Indo-European Origins. Harmondsworth: Penguin Books.
Renfrew, Colin (1999) Time depth, convergence theory, and innovation in Proto- Indo-European: ‘Old Europe’ as a PIE linguistic area. Journal of Indo-European Studies 27: 257-293.