Preistoria de la popla PIE (Teoria Curgan)

La Teoria Curgan de la preistoria de la popla PIE (proto-indo-european) es la teoria la plu asetada par spesialistes per identifia la rejion orijinal de la popla ci ia parla prima la lingua cual ia deveni la linguas indo-european. La teoria ia es prima developada en la desenio de 1950 par Marija Gimbutas, un arceolojiste lietuvisce-american. La parola "curgan" es derivada de la rusce курга́н, cual es ultima derivada de un terma turces antica per un tumulo o monton de entera. Gimbutas ia usa esta terma per refere a la cultur de la popla de la stepe norde de la Mar Negra, spesial de la cultur Iamna.

Gimbutas ia defini la cultur de la curgan en 1956 como un "terma vasta" cual pote inclui Sredny Stog, Iamna e la cultur de vasos cordida (estendeda tra la milenios cuatro e tre). El ia sujesta cuatro pasos de developa de la cultur, e plu tarda tre "ondas" de migra.

Periodos

4500 – 4000 aec: PIE temprana. Sredny Stog, Dnepr-Donets, e Samara; doma de la cavalo (onda un).

4000–3500: La cultur Iamna, la prototipo de cultures usante curganes, emerji sur la stepe, e la cultur Maicop aveni en la Caucasos norde.

3500 – 3000 aec: PIE media. La cultur Iamna es a sua culmina, e es la model per un sosia clasica de la PIE, con dios de petra, con un economia de eleva bestias en vilas permane, protejeda par fortreses a colinas, e ance dependente de cultiva e pexa longo rios. Contata de esta cultur con la cultures neolitica de Europa ia resulta en la "cultures curganida", pd la cultur de amforas globin e la cultur Baden (onda du). La cultur Maicop ia mostra la evidentes prima de la comensa de la Eda de Bronze, e armas e otra fabricadas de bronze ia es introduida a la popla iamna. Esta es ance la tempo probable de la cambia satem de PIE este.

3000 – 2500 aec: PIE tarda. La cultur Iamna estende tra tota de la stepe norde de la Mar Negra (onda tre). La cultur de vasos cordida estende de la Rio Reno a la Rio Volga, como la fase tarda de la unia de la cultur indo-european. Alora, la area "curganida" vasta comensa desintegra a la linguas e cultures variosa e autonom, ancora en contata laxe cual permete la sperde de tecnolojia e prestas temprana entre la grupos, estra per la ramos linguas anatolian e linguas tocarian, cual ia es ja isolida de la restas.