Cultur Samara
La cultur Samara ia es un cultur eneolitica cual flori sirca la comensa de la milenio 5 aec, locada en la curva de Samara en la rejion de la Rio Volga alta en Rusia moderna. La cultur es videda como relatada a otra cultures de la stepe ueste, contempora o seguente, como la cultur Hvalinsc, Repin, e Iamna. La abitada orijinal de la proto-indoeuropeanes es frecuente liada a un o plu de esta cultures, a min en la teoria de curganes.
La cultur ia es descovreda par arceolojistes en 1973 prosima a la vila de Sezjeie en Rusia. Locas relatada es Varfolomievca a la Volga (5500 aec), cual ia es un parte de la cultur caspian norde, con sua cultur seguente, la cultur Hvalinsc temprana (4700-3800 aec). La trovas arceolojial pare relatada a los de la cultur Dnepr-Donets 2 (5200-4400 aec). La vale de la Rio Samara conteni locas de cultures seguente, cual es descriveda como "cultures Samara". Alga de esta locas es aora en la prosede de escava.
La vasos es xef de copas en la forma de ovos con bordas a la abrida. Los no pote sta sur un surfas plana, cual sujesta ce un metodo de porta los posible en sestos o arnes, per cual la bordas ta es un punto de suporta usosa. Decora inclui linias, bandas, zigzagas, taliadas, dagis, o petenida. Esta motifes es plu bon comprendeda par vide los de la alta. Los apare como un motif solal, con la boca de la vaso como la sol. Developas plu tarda de esta tema mostra ce los indica vera la sol.
La cultur es marcada par la resta de sacrifia de animales, cual aveni tra la plu de la locas. On no ave evidentes clar de la monta de cavalos, ma on ave enteras de cavalos, la plu vea en la mundo. Tipal, la testa e ungulas de boves, oveas, e cavalos ia es poneda en boles basa supra la entera umana, covreda con ocer. Alga sujesta ce esta es la comensa de la sacrifias de cavalos en esta restas, ma esta interprete no ia es clar suportada. Lo es bon conoseda ce la indoeuropeanes ia sacrifia animales e persones, como multe otra cultures.
Alga de la enteras es covreda con un monumento de petra o un tumulo basa de tera, la prima asendente de la curgan. Plu tarda, la curgan la plu completa developada ia es un colie sur cual la xef morida pote asende a la dio de sielo, ma esce esta tumulos temprana ia ave esta sinifia es dutada.
Ofres per la entera inclui ornas cual depinta cavalos. La enteras ave ance alga restas de cavalos. Lo no pote es serta determinada si esta cavalos ia es domada o savaje, o montada o no. Ma los ia es serta usada como un comeda. La plu controversa es placas de oso de cavalos o testas duplida de boves, cual ia es perforada.
La enteras inclui dagas bon fabricada de petra de foco e oso, poneda a la braso o testa de la mor, e un en la entera de un fio peti. Armas en la enteras de enfantes es comun plu tarda. Otra armas inclui testas de lansas de oso, e testas de flexas de petra de foco. Otra figures e pendentes de oso siselida ia es ance trovada en la enteras.
Bibliografia
edita- Anthony, David W, The Horse The Wheel And Language: How Bronze-Age Riders From the Eurasian Steppes Shaped The Modern World. Princeton University Press, 2007.
- Marija Gimbutas, The Civilization of the Goddess, Harper San Francisco, 1991.
- J. P. Mallory, "Samara Culture", Encyclopedia of Indo-European Culture, Fitzroy Dearborn, 1997.