Cultur Sesclo
La vileta Sesclo en Elas ia dona sua nom a la cultur neolitica la plu vea en Europa, cual ia abita Tesalia e partes de Macedonia Norde. La vila neolitica ia es descovred en la sentenio de 1800 e es la escavas prima fada par la arceolojist elinica, Christos Tsountas. La fratas la plu vea rexercada a Sesclo indica ce la sivilia ia developa tan temprana como sirca 7510 a 6190 aec, conoseda como protosesclo (o presesclo). Los mosta un cultiva avansada e un usa multe temprana de seramica cual es a min egal a los de Asia sude-ueste. Datos otenable indica ance ce la doma de boves ia aveni a Argisa tan temprana como sirca 6300 aec, en la neolitica ante seramica.
La stratos sin seramica a Sesclo conteni ance fratas de oso de boves domada. La aveni simil la plu temprana en Asia sude-ueste ia es a Çatalhöyük (en Turcia de oji, pronunsiada prosima como txatalhoiuc) cual es datida como sirca 5750 aec (ma pote es ance presente plu basa, sirca 6100 aec).
La vila neolitica ia covre un area de sirca 20 ectares en sua periodo la plu alta, a sirca 5000 aec, e es composada de sirca 500 a 800 casas con un cuantia de popla tan grande como 5000 persones.
La poplas de Sesclo ia construi sua viletas sur la lados de colinas prosima a vales fertil, do los ia cultiva trigo e orzo. Los ia manteni manadas de oveas e capras, an ce los ave ance boves, porcos, e canes.
Sua casa ia es peti, con un o du salas, construida de lenio o bricas de fango en la periodo temprana. Tecnicas plu tarde ia deveni plu omojen e tota casas ia es construida de adobe con fundas de petra. La casa prima con du niveles ia es trovada e un urbanisme clar intendeda ia esiste. La stratos basa de protosesclo no ave seramica, ma la popla sesclo pronto developada seramica con glasa multe refinada cual ia es decorada con simboles jeometrial en roja o brun. Tipos nova de seramica ia es ance adotada en la periodo de sesclo plu tarde.