Abri la menu xef
Fabricadas trovada en tombas 2 e 4 de Tillya Tepe, con un reconstrui de sua usa par la om e fem en esta tombas

La sacas (latina: sacae; elinica Σάκαι; xines 塞 *Sək) ia es un grupo de nomadas irani ci ia abitada a la stepe eurasian norde e este e a la Basin Tarim.

An si relatada prosima, la sacas pote es distinguida de la scitianes de la stepe pontica e de la masagetes de Mar Aral. Como la scitianes, la sacas ia es derivada de la cultures andronovo e carasuc. Sua lingua ia es un parte de la linguas scitian. Restas arceolojial de la sacas inclui la enteras de Pazyryk, la curgun de Issyk, la fabricadas de la cultur Ordos, e posible Tillya Tepe. Lo ia es sujesteda ce la elite renante de la xiongnu ia es orijinal saca.

En la sentenio 2 aec, multe sacas ia es forsada par la yuezhi de la stepe a Sogdia e Bactria, e alora a la norde-ueste de la sucontinente indian, do los es conoseda como la indo-scitianes. Otra sacas ia invade la Impero Partian, ultima abitante en Sistan, en cuando otras ia migra a la Rena Dian en Yunnan, Xina. En la Basin Tarim e Deserto Taclamacan en Xina norde-ueste, los ia abita en Hotan, Iarcand, Caxgar, e otra locas sur la Via de Seda, cual ia es a veses vasales a potias plu grande, como la dinastias xines de Han e Tang.

Simil a otra popla irani representada sur la relevas de a Apadana a Persepolis, sacas ia es depintada como porte pantalones longa cual covre la parte alta de sua botas. Sur sua spalas, los porta un capa longa con un borda diagonal a la dorso. Un tribu de sacas ia porta xapos alta e puntida.

Poliandria fratal ia es un costum comun entre la saca: fratas ia comparti un sposa, ma la enfantes ia parteni a la frate plu vea. Esta costum pote es trovada an oji en partes de Tibet, Nepal, e India norde.