La dinastia Han en 2 ce (brun), con garnisones militar (puntos jala), statos dependente (puntos verde), e statos tribuinte (puntos orania), tan distante como la Basin Tarim

La dinastia Han (xines: 漢朝; pinyin: Hàncháo) ia es ia dinastia imperal du de Xina (206 aec–220 ec), presededa par la dinastia Qin (221–206 BC) e segueda par la periodo de tre renas(220–280 ec). An aora, la etnico la plu grande de Xina refere a se como la "xines de Han", e la scrive xines es refereda como "carateres de Han". Lo ia es fundida par la xef de rebelas Liu Bang, conoseda pos mori como Imperor Gaozu de Han, e interompeda tempora par la dinastia Xin (9-23 ec) de la renor pasada Wang Mang. Esta entre-rena ia separa la dinastia Han en du periodos: la Han Ueste e la Han Este.

Budisme ia entra Xina en la Han Este e ia es notada prima en 65 ec. Liu Ying, un dui-frate de la Imperor Ming (rena 57-75 ec), ia es un de la aderor la plu temrpana. Ance en la rena de Imperor Ming, la prima templo budiste, la Templo de la Cavalo Blanca, ia es construida estra la mur de la capital, Luoyang. Testos budiste importante ia es traduida a xines en la sentenio du ec.

La imperor ia es a la culmina de la sosia de Han. El ia preside supra la governa, ma comparti sua potia con la nobilia e ministros asiniada ci ia veni xef de la clase alta educada. La Impero Han ia es divideda en areas controlada direta par la governa sentral, usante un inova eritada de la Qin nomida comandorias, e un cuantia de renas semi-autonom. Esta renas ia perde gradal tota vestijios de sua autonomia, spesial pos la Rebela de la Sete Statos. De la rena de Imperor Wu (rena 141-87 aec) a pos, la corte xines ia suporta ofisial Confuzisme en educa e politicas de corte, sinteseda con la cosmolojia de eruditas plu tarda como Dong Zhongshu. Esta politica ia dura asta la cade de la dinastia Qing en 1911 ec.

La dinastia Han ia vide un eda de ricia economia e un crese sinifiante de la economia de mone, prima instituida en la dinastia Zhou (1050-256 ec). La monetas produida par la moneta governa sentral en 119 aec ia resta la moneta ofisial de Xina asta la dinastia Tang (618-907 ec). La periodo ia ave alga inovas limitada de instituis. Per finansia sua campanias militar e la coloni de teritorios de la frontera resente vinseda, la governa Han ia nasionali la industrias privata de sal e fero en 117 aec, ma esta monopolios de la governa ia es canselada en la dinastia Han Este. Siensa e tecnolojia en la periodo Han ia inclui avansas sinifiante, incluinte la prosede e fabrica paper, la timon de barcones, la usa de numeros negativa en matematica, la mapas con tereno moldida, la sfera de anelos per astronomia propulsada par idraulica, e un sismograf usante un pendulo inversada cual pote es usada per trova la dirije de tremateras distante.

La Xiongnu, un federa de nomadas de la stepe, ia vinse la Han en 200 aec e ia forsa la Han per sede se como la inferiores per alga desenios, ma continua sua atacas militar a la bordas Han. Imperor Wu ia lansa alga campania militar contra los. La vinse ultima par la Han en esta geras ultima ia forsa la Xiongnu per aseta un state como tribuores de la Han. Esta campanias ia estende la domina de la Han supra la Basin Tarim de Asia sentral, dividente la Xiongnu entre du federas, e aida la institui de un rede vasta de comersia nomida la Via de Sede, cual estende tan distante como la mundo mediteraneo. La teritorios a norde de la bordas de la Han ia es rapida vinseda par la federa nomada de la Xianbei. Imperor Wu ia lansa ance campanias militar susedosa en la sude, ajuntante Nanyue en 111 aec e Dian en 109 aec, e en la penisola de Corea do la Comandorias Xuantu e Leland ia es instituida en 108 aec.

Pos 92 ec, la eunucos ia envolve se en la politicas de corte, e en turbos violente de potias entre la asosias familial de la imperoresas, cual ia causa la cade ultima de la dinastia Han. Autoria imperal ia es ance defiada par sosias relijiosa grande de dauisme, cual provoca la rebela de la Turbanes Jala e la rebela de la Sinco Mesuras de Ris. Seguente la mori de Imperor Ling (rena 168-189 ec), la eunucos ia es masacrada par ofisiores militar, cual ia permete ce membros de la aristocratia per deveni xefes de gera e divide la impero. Cuando Re Cao Pi de Wei, ia usurpa la trono de Imperor Xian, la dinastia Han ia sesa esiste.