Xiongnu
La xiongnu (xines: 匈奴) ia es federa de tribus de popla nomada ci, seguente scrives xines, ia abita la stepe eurasian este de la sentenio 3 aec a la sentenio prima ec tarda. La arcivos xines ia reporta ce Modu Chanyu, la xef suprema pos 209 aec, ia funda la Impero Xiongnu.
Pos cuando sua tribus oposante, la yuezhi, ia migra a Asia sentral en la sentenio 2 aec, la xiongnu ia deveni un potia dominante a la stepes de Asia sentral norde-este, sentrida en la area conoseda plu tarda como Mongol. La xiongnu ia es ativa ance en areas aora parte de Sibir, Mongol Interna, Gansu, e Xinjiang. Sua relatas con la dinastias xines visina a la sude-este ia es complicada, con periodos repeteda de desacorda e conspira, alternante con intercambia de tribui, comersia, e tratas par sposi (heqin).
En la periodo de 16 Renas, los ia es ance conoseda como un de la 5 barbares ci ave un parte en un rebela contra la domina de la xines, la Rebela de la Sinco Barbares.
Atentas a identifia la xiongnu con grupos plu tarda de la stepe eurasian ueste ia resta controversa. Scitianes e sarmatianes ia es simultan a la ueste. La identia de la cor etnical de la xiongnu ia es un sujeto de ipoteses variosa, car sola poca parolas, xef titulos e nomes personal, ia es conservada en la arcivos xines. La nom xiongnu es posible un conaseda con lo de la hunas, an si esta es disputada. Otra lias - tota ance controversa - proposada par eruditas inclui iranian, mongol, turcica, uralica, ieniseian, tibeto-burman, o multe-etnical.
En 209, tre anios ante la funda de Han Xina, la xiongnu ia deveni un federa su un han nova, Modu Chanyu. Esta unia ia cambia los a un stato plu potiosa par permete la asembla de armadas plu grande e la capasia de plu con coordina stratejial. La xiongnu ia adotada multe de la tecnicas per cultiva, como la usa de sclavos per labora pesosa, porta vestes de seda como la xines, e abita en casas simil a los de la xines.
Pos la developa de unia interna, Modu Changyu ia estende sua impero a tota lados. A a norde, el vinse alga poplas nomada incluinte la dinglinges de Sibir sude. El ia destrui la potia de la popla donghu de Mongol este e Mandju, e la Yuezhi en Gansu, do la fio de Modu Changyu ia fabrica un tas de la cranio de la re yuezhi. Modu ia reocupa tota la rejiones cual ia es prendeda a ante par la jeneral Meng Tian de la Qin.
Su la xefia de Modu, la xiongnu ia menasa la dinastia Han, cuasi causante Imperor Gaozu, la imperor prima de la Han, per perde sua trono en 200 aec. Per cuando Modu ia mori en 174 aec, la xiongnu ia forsa la yuezhi de Gansu, matante la re de la yuezhi, e afirma sua domina de la rejiones ueste.
Gera grande ia comensa en autono de 129 aec, cuando 40,000 cavalores xines ia ataca surprendente la xiongnu a la mercatos a la borda. En 127 aec, la jeneral de la Han, Wei Qing, ia reprende Ordos. En 121 aec, la xiongnu ia sufri un plu defeta cuando Huo Qubing ia condui un armada de cavalores a la ueste de Longxi e, en ses dias, ia luta tra sinco renas de la xiongnu. La rena de la xiongnu hunye ia debe sede con sua 40,000 soldatos. En 119 aec, ambos Huo e Wei, cada con 50,000 cavalores e 100,000 infantriores, e, par avansa par vias diferente, ia forsa la han e sua corte xiongnu per fuji a norde de la Deserto Gobi.
En 104 e 102 aec, la Han ia gania la Gera de Cavalos de Sielo contra la rena de dayuan. Par catura multe cavalos de Ferghana, los pote vinse la xiongnu e alora controla la rejion de Ordos e la coredor de Gansu a Lop Nor. Los ia pote separa la xiongnu de la popla qiang a la sude, e ia gania asede direta a la rejiones ueste. Car la controla instituida par la xines sur la xiongnu, la xiongnu ia deveni nonstable e no ia es plu un menasa a la dinastia Han.
Ban Chao, jeneral protejente de la dinastia Han, ia move con un armada de 70,000 soldatos en un campania contra la restas de la xiongnu ci ia es menasante la via de comersia aora conoseda como la Via de Seda. La rejion ia deveni plu stable. En 53 aec, la xef de la xiongnu, Huhanye, ia desideda ce sua popla ta benefica si los comensa relata a la Han como un tribuor. En 24 ec, la xiongnu ia deveni denova plu organizada, e ia move a via de la sistem de tribui a Xina, spesial car la disturbas de la dinastia Xin. En la sentenio prima ec, la xiongnu ia divide entre la xiongnu norde e la xiongnu sude.
La federa de la xiongnu ia dura per un tempo longa per un impero de la stepe. La razona per atacas sur Xina ia es no sola per benes ma per forsa la xines per paia tribui periodal. La potia de la renor xiongnu ia depende de sua controla de la tribui xines cual el ia usa per recompensa sua suportores. La imperos de la Han e la xiongnu ia leva a la mesma periodo car la state de la xiongnu dependeda de tribui de la xines. Ma un debilia major de la xiongnu ia es sua costum de susede a lado: Si la fio de un renor es tro joven per prende comanda, la potia pasa a la frate de la renor, un sistem simil a lo de la celtas. Esta opera en la prima jenera, ma pote fini en gera interna en la jenera du. La ves prima cuando esta ia aveni, en 60 aec, la partito plu debil (la xiongnu norde) ia adota un stratejia de move a sude e sede a Xina e alora usa la recursos xines per defeta la xiongnu norde e reinstitui la impero. La ves du cuando esta ia aveni, sirca 47 ec, la stratejia ia fali. La renor sude no ia es capas de defeta la renor norde, e la xiongnu resta divideda.