Dinastia Qin

La dinastia Qin (xines: 秦朝, Qíncháo) ia es la dinastia prima de Xina imperal, durante de 221 a 206 aec. Nomida per sua loca corin en la stato de Qin, la dinastia ia es fundida par Qin Shi Huangdi, la imperor prima. La fortia de la stato Qin ia es multe creseda par la reformis legaliste de Shang Yang en la sentenio 4 aec, en la periodo de statos gerante. En la sentenio 3 aec, la stato Qin ia prosede en un seria de concistas rapida, en cual lo ia concista prima la dinastia Zhou, ja debil, e ia concista ultima la otra 6 de la 7 statos gerante. La 15 anios de la dinastia Qin ia es la plu corta en la istoria de Xina, composada de sola du imperores, ma lo ia inisia un sistem imperal cual ia dura de 221 aec, con alga interompes e ajustas, asta 1912 ec.

Qin Shi Huangdi, imperor prima de la dinastia Qin, de un depinta de la sentenio 18

Un mapa de la statos gerante, sirca 260 aec

Un mapa de la comandorias de la Impero Qin, 221 - 226 aec

Un grupo de la gerores de la armada teracota, sentenio 3 aec

La Qin ia atenta crea un stato unida par un potia political strutural e sentrida e un militar suportada par un economia stable. La governa sentral ia move per suverti aristocratas e otra posesores de areas de tera per gania controla direta de la campaniores, ci ia composa la majoria grande de persones e labora. Esta ia permete projetas grande cual envolve 300,000 campaniores e prisonidas, como la lia de mures longo la borda norde, cual ia deveni ultima la Mur Grande de Xina.

La Qin ia introdui reformis como un sistem de mones, pesas, mesuras, e sistem de scrive normida, con la gol de uni la stato e promove comersia. Plu, sua militar usa la armas, veculos, e taticas la plu resente, an si la governa ia es burocrata estrema. La confuzistes de la Han ia depinta la dinastia Qin legaliste como un tirania estrema, notable par sita un purga conoseda como "la arde de la libros" e la entera de eruditas, an si espertas moderna disputa la veria de esta reportas.

Istoria

En la periodo de statos gerante ante la dinastia Qin, la statos major cual ia luta per domina ia es Yan, Zhao, Qi, [[Chu], [Han]], Wei, e Qin. La renores de esta statos ia vide se como res, e no como alga de la titulos de nobiles plu basa cual los ia teni a ante. Ma nun ia leva se per crede ce el ia ave la "autoria de sielo", como la res de Zhou ia declara, e no ce el ia ave la direto per ofre sacrifias. Los ia resta acel a la renores Zhou.

Cuando la concistas ia es completa en 221 aec, Re Zheng, ci ia aseta la trono de la stato Qin cuando el ia ave no plu ca 13 anios, ia deveni la renor de Xina. La domina de la 6 statos ia es fada par la Re Zheng ci ia usa convinse e stratejia efetosa. El ia solidi sua rol como la renor solitar con la renunsia de sua ministro prima, Lu Buwei. La statos fada par la imperor ia es encargada a ofisiales dedicada a la taxe, en loca de pone un carga sur la persones de la familia real. El ia combina alora la titulos de la tre renores plu temprana e la imperores sinco a sua nom nova: Shi Huangdi, pd "la Imperor Prima" - un titulo el ia inventa. La imperor nova alora ia comanda ce tota armas no poseseda par la Qin ia debe es confiscada e fondeda. La metal cual ia resulta ia es sufisinte per construi 12 figures grande a la capital nova de la Qin a Xianyang.

En la periodo de statos gerante, la 100 scolas de pensa ia es composada de multe filosofias diferente como proposada par la eruditas xines. Ma en 221 aec, la imperor prima ia concista tota de la statos e governada con un filosofia solitar: legalisme. A min un filosofia ia es eliminada, Moisme. La razona no es sabeda, ma lo es posible ce legalisme e moisme ia es tro simil per es tolerada par la imperor.

Confuzisme ia es ance importante en la periodo de statos gerante, como ance en la plu parte de la dinastia Zhou. Esta filosofia ia ave la "canon confuziste" de leteratur, nomida la ses clasicas: la Odes, Documentos, Rituos, Musica, Arcivos de primavera e autono, e Cambias, cual es la leteratur xines de la eda.

Ma en la dinastia Qin, confuzisme, con tota otra filosofias nonlegaliste, como dauisme, ia es supresada par la imperor prima. La imperores temprana de la dinastia Han ia fa la mesma. Legalisme ia denunsia la sistem feudal e ia coraji punis sever, spesial cuando la imperor ia es desobedida. La diretos de individuas ia es desvaluada cuando los no acorda con la desiras de la governa o la renor, e mercatores e eruditas ia es videda como nonproduosa, e donce desprendable.

La imperor prima ia developa desinias per forti sua borda norde, per proteje contra invades par la nomadas. La resulta ia es la construi de cual deveni la Mur Grande de Xina, cual ia es construida par lia e forti la mures fabricada par la seniores feudal, e cual va es estendeda e reconstruida multe veses par dinastias plu tarda, ance en responde a menasas de la norde. Un otra projeta construida en la rena de Qin Shi Huang ia es la armada de teracota, cual ia es intendeda per proteje la imperor pos sua mori. La armada de teracota ia no atrae atende car lo ia es locada sutera, e no ia es descovreda asta 1974.

Cuando la imperor prima ia mori en 210 aec, du de sua conselores ia pone un eritor sur la trono en un atenta per influe e controla la dinastia. Acel conselores ia scaramuxa entre se, cual resulta en sua moris e la mori de la imperor du de Qin. Revolui par la popla ia comensa, e la impero ia cade pronto a la jeneral de Chu, Xiang Yu, ci ia es proclamada la re egemonial de Chu ueste, e Liu Bang, ci plu tarda ia funda la dinastia Han. An con sua rena corta, la dinastia ia influe multe la futur de Xina, spesial de la Han, e sua nom es posible la orijina de la nom european de Xina.