Cultur de vasos embutin

La cultur de vasos embutin, comun cortida como TRB (de la deutx Trichterbecherkultur, sirca 4300 a 2800 aec) es un cultur arceolojial de Europa norde-sentral. Lo ia developa como un junta de tecnolojias local neolitica e mesolitica entre la Rio Elbe basa e Rio Vistula media, cual introdui cultiva e pastoria como furnis de comedas a la xasor-coliores (e seramica produores) de la area. Lo ia es presedente par la cultures Lengyel, Rossen, e Ertebolle.

Estra alga colonias a la area interna, como la casa sur palos de Alvastra‎ en Sveria, la vilas ia es locada prosima a los de la cultur Ertebolle a la costa. Lo ia es marcada par casas de vim e arjila per un sola familia, sirca 6 m par 12 m. La economia ia es dominada par la eleva de oveas, boves, porcos, e capras, ma on ave ance xasa e pexa. Un trova, asiniada a la cultur de vasos embutin, es la vaso Bronocice de Polsca, cual mostra la desinia de un caron la plu vea conoseda, posible traed par uros, de cual sua restas ia es trovada con la vaso. Trigo e orzo primitiva ia es cultivada a areas peti cual ia es rapida povrida, la resulta de la moves frecuente a distantias corta. On ave ance mina e la colie de petra focosa, cual ia es intercambiada a locas sin petra, como la areas interna de Scandinavia. La cultur usa cupre de Silesia, spesial dagas e axas.

La casas ia ensirca un tomba monumental, un simbol de coere sosial. Formas de entera ia varia, dependente de la rejion e cambiante tra tempo. Plu comun es entera simple. La enteras la plu vea es composada de monumentos de rocas con salas de lenio en tumulos longa, ma plu tarde fabricada en la forma de tombas de pasaje e dolmenes. Orijinal, la strutures ia es probable covreda con un monton de tera e la entra ia es blocida par un petra. La cultur de vasos embutin marca la apare de la tombas megalitica a la costas de la Mar Baltica e la Mar Norde. La construidas megalitica de Er, Frans, e Portugal es alga plu vea e ia es liada a la cultures plu temprana de acel areas.

A enteras, los sacrifia vasos seramica con comedas, joalas de ambar, e axas de petra focosa. Axas e vasos ia es ance desprende en rietas e lagos prosima a la cultiverias, posible como sacrifias. La popla ia construi ance sentros grande cultal, ensircada par palos, murones de tera, e fosos.

Espertas no acorda sur cual linguas ia es parlada par la popla de esta cultur. La seguores de la teoria de curganes crede ce la popla no ia es la popla indoeuropean, cual los crede ia veni ala de la cultur Iamna a la este, e ce la cultur de vasos cordida ia es introduida par los con la lingua indoeuropean. Otras ia proposa ce la cultur de vasos cordida ia segue la cultur de vasos embutin direta, e un lingua indoeuropean ia es parlada ala plu temprana.