Abri la menu xef
Locas arceolojial atribuida a la ilirianes
La mures de Daorson antica, locada a Ošanjići prosima Stolac en Bosnia e Hersegovina

La ilirianes (elinica antica: (Ἰλλυριοί) ia es un grupo de tribus indo-european ci ia abita parte de la Balcanes ueste en anticia. La teritoria cual la ilirianes ia abita ia deveni conoseda par la autores elinica e roman como Iliria, cual los identifia con la area moderne de Corvatsca, Bosnia e Hersegovina, Slovenia, Montenegro, partes de Serbia, e la parte plu grande de Albania sentral e norde, entre la Mar Adriatica en la ueste, la Rio Drava en la norde, la Rio Morava en la este, e la boca de la Rio Aoos en la sude. La prima nota de la popla ilirian es de la Periplus de Pseudo-Scylax, un testo elinica antica de la media de la sentenio 4 aec, cual descrive pasajes costal en la Mar Mediteraneo.

La tribus ilirian ia regarda se nunca como un popla unida, e no ia ave un nom spesial per se mesma. Vera "ilirian" pare es un nom de un tribu spesifada cual ia es conoseda par la elinicas de la Eda de Bronze. Oji, lo no es clar cual la estende de ilirianes jeneral ia es como un popla, cultur, o lingua. Alga scrivores ia aplica la nom "ilirian" a popla antica ci ia abita Italia: la iapiges, daunis, e mesapis, ci ia es crededa como seguente la costa de la Adriatica a Italia de la Iliria jeografial.

La nom "ilirianes" ia apare final en la arcivo istorial en la sentenio 7 ec, referente a un garnison bizantian de la provinse roman a ante nomida Illyricum. Pos la desintegra de la Impero Roman, la Balcanes ia es invadeda par tribus de gotos e hunes, ci ia forsa la ilirianes orijinal a la areas montanosa. Plu tarde, tribus de parlores de linguas slavica ia migra a sude e ia domina la areas abandonada par la gotos e hunes, ci ia move a ueste (la gotos) o ia reveni a la stepes (la hunes). An si la veria no es conoseda aora, espertas en Albania crede ce sua popla (e la lingua) ia desende de la tribus antica de la montes de iliria.