Hunes
La hunes ia es un popla nomada ci ia abita Asia sentral, la Caucasos, e Europa este, entre la sentenios 4 e 6 ec. Seguente tradision european, los ia es prima reportada como abitante este de la Rio Volga, en un area cual ia es parte de Scitia a la tempo. La ariva de la hunes ia es asosiada con la migra a ueste de un popla indo-european, la alanes. Per 370 ec, la hunes ia ariva a la Volga, e per 430 ec los ia fundi un domina vasta (si corte vivente) en Europa, vinsente la gotos e multe otra popla germanica cual ia vive estra la bordas de la Impero Roman, e causante multe otras a fuji a teritoria roman. La hunes, spesial su sua re Atila ia ataca multe veses a la Impero Roman Este.
En 451, la hunes ia invade la provinse Galia de la Impero Roman ueste, do los ia combata un armada combinada de romanes e visigotos a la Batalia de la Campos Catalaunican, e en 452 los ia invade Italia. Pos la mori de Atila en 453, la hunes ia sesa es un menasa major a la romanes e ia perde multe de sua impero seguente la Batalia de Nedao. Desendentes de la hunes, o susedentes con nomes simil, es recordada par popla visina a la sude, este, e uesta como ocupiante partes de Europa este e Asia sentral de sirca sentenio 4 a 6 ec. Varias de la nom hun es recordada en la Caucasos asta la sentenio 8 temprana.
En la sentenio 18, la siensiste Joseph de Guignes ia deveni la prima per proposa un lia entre la hunes e la popla xiongnu, ci ia es visinas norde de Xina en la sentenio 3 aec. An si multe eforta ia es dirijeda a la idea, lo resta controversial.
Poca es conoseda sur la cultur hun e multe poca restas arceolojial ia es serta asosiada con los. Lo es crededa como usante calderones de bronze e como usante desformi artifisal de la cranio. No descrive esiste de sua relijio a la eda de Atila, ma praticas como divina es atestada, e la esiste de xamanes es probable. Lo es conoseda ce la hunes ia ave sua lingua propre, ma sola tre parolas e nomes personal ia atesta lo.
Economial, los es conoseda como pratica un forma de pastoria nomada. En cuando sua contata con la mundo roman ia crese, sua economia ia deveni plu liada con Roma, tra tribui, atacas, e comersia. Los no ia pare ave un governa unida cuando los ia entra Europa, ma ia developa xefias tribal unida en la curso de la geras con la romanes. La hunes ia rena supra multe poplas ci parla linguas variosa e alga de ci ia manteni sua propre renores. Sua tecnica militar major ia es arcia montada.
La hunes ia stimula posible la Migras Grande, un fator cual ia contribui a la colasa de la Impero Roman ueste. La memoria de la hunes ia continua en la vives de santas cristian variosa, en cual la hunes ia jua roles de enemis, e ance en lejendes eroin germanica, en cual la hunes pote es enemis o alias de carateres major. En Magiar, un lejende ia developa ce la magiares, spesial la etnico szakely, ia desende de la hunes. Ma studias moderne no suporta un lia forte entre la magiares e la hunes.
-
Un calderon hun, sentenio 5 -
Braseleta hun, sentenio 5 -
Fibula hun, sentenio 4
