Galia ia es un rejion istorial de Europa ueste en la eda de fero, cual ia es abitada par tribus celta, e cual inclui Frans, Luxemburg, Beljia, la plu parte de Suiz, e partes de Italia norde, Nederland, e Deutxland, covrente sirca 500,000 km2. Galia ia es divideda, seguente Julio Cesar, entre Galia celta, Galia beljica, e Galia acuitania. Arceolojial, la galos ia es la portores de la cultur La Tene, cual estendeda tra tota Galia, e esta a Retia, Norico, Panonia, e Germania sude-ueste en la sentenios 5 a 1 aec.

Un mapa de Galia en la sentenio 1 aec
Un sculta de Vercingetorix, eroe de la celtas contra la romanes

Ante la sperde rapida de la cultur La Tene en la sentenios 5 a 4 aec, la teritorio de Frans este e sude ia partisipa ja en la cultur de campos de vasos de la [[eda de bronze\\ tarda (sirca la sentenios 12 a 8 aec) de cual la cultur Hallstatt (sentenios 7 a 6 aec) de la eda de fero ia developa. Per 500 aec, la cultur Hallstatt ia domina la plu de Frans, estra la Alpes e la norde-ueste estrema.

De esta fondo, en la sentenios 7 e 6 aec, la cultur La Tene ia leva, posible su la influe de la sivilias elinica, fenisian, e etrusca, e sperde a alga sentros longo la Seine, Reno media, e Elbe alta. E per la sentenio 5 aec, la cultur La Tene ia flori tra la teritorio intera de Galia. Esta cultur ia flori ance en Suiz, Italia, Osteraic, Deutxland sude-ueste, Boemia, Moravia, Slovensco e Magiar. Plu norde, on trova la cultur de fero pre-roman de Deutxland norde e Scandinavia.

La jeneral e proconsul roman, Julio Cesar, ia move sua armada en Galia en 58 aec, suposada per aida sua alias galo contra la helveti migrante. Con la aida de clanes galo, el ia pote concista cuasi tota de Galia. An si sua armadas ia es egal a lo de la romanes, la divide interna entre la tribus galo ia garantia un vinse fasil per Cesar, la atenta par la xef Vercingetorix per uni la galos ia ariva tro tarda.

Tan multe como un milion persones (sirca un en sinco de la galos) ia mori, e un otra milion ia es sclavida. 300 clanes ia es vinseda, e 800 sites ia es destruida en la Geras de Galia. Tota abitores de la site Avarico (Bourges moderna) ia es matada. La helveti de Suiz ia ave orijinal sirca 263,000, ma pos la gera, sola 100,000 persones resta, la plu de cual Cesar ia prende como sclavos.

Pos cuando Galia ia es asorbeda como un provinse roman, sua abitantes ia adota gradal aspetas de la cultur roman, cual resulta en la cultur galo-roman. Sitadania ia es donada a tota en 212 ec par la Constitutio Antoniniana. De sentenio 3 a 5, Galia ia es esposada a atacas par la francos, un federa de tribus germanica. La Impero Galica, composada de la provinses de Galia, Britania, e Hispania, ia separa de la Impero Roman de 260 a 273 ec. En ajunta a un cuantia grande de nativas, Galia ia deveni la abitada per alga sitadanes roman de otra areas, e ance tribus germanica e scitian como la alanes.

La controla roman de Galia ia dura per 5 sentenios, asta la stato culin final de Roma, la rena de Soissons, ia cade sur la francos en 486 ec. En cuando la galos celta ia perde sua identias orijinal e sua lingua en anticia tarda, fusante en la cultur galo-roman, Galia ia resta la nom de la teritorio tra la eda medieval temprana, asta lo ia ateni un identia nova como Frans.

Seguente la vinse par la francos a la Batalia de Soissones en 486 ec, Galia (estra Septimania) ia es su la rena de la merovianes, la res prima de Frans. La partes norde de Galia ia developa la cultur merovian, en cuando la partes sude reteni la cultur galo-roman.