Cambrian
La periodo cambrian es a periodo jeolojial prima de la era paleozoica. Lo ia dura 55.6 milion anios de la fini de la periodo presedente (la ediacaran), 541 milion anios ante aora (aaa) a la comensa de la periodo seguente (la ordovician) 485.4 milion aaa.
La cambrian ia marca un cambia profonda en vive sur tera. Ante la cambrian, la majoria de organismes vivente ia es xef peti, uniselulal, e simple. Los ia deveni plu comun en la miliones anios ante la cambrian, ma lo no es asta la cambrian ce organismes mineralida - pd, fasil fosilida - ia deveni plu comun. La diversi rapida de viventes en la cambrian, conoseda como la esplode cambrian, ia produi la representas prima de tota filos de animales moderna. En esta periodo, metazoa (pd animales) ia evolui de un sola asendente comun: protistas colonial con flajelos, simil a la coanoflajelatos moderna.
An si viventes diversa ia flori en la mares, on pensa ce la tera ia es nuda en compara, con no cosa plu complicada ca un crosta de tera microbial e alga moluscos cual ia emerji per come la pel de microbios. La plu de la continentes ia es probable seca e rocosa de un manca de plantas. Mares basa ia ladi la marjines de la continentes creada en la rompe de la supracontinente Pannotia. La mares ia es relativa calda, e jela ia es asente de la polos per la parte major de la periodo.
Reconstruis sujesta ce un supracontinente global, Pannotia, ia es en la media de rompe temprana en la periodo, con Laurentia (America Norde), Baltica, e Sibir separada de la continente xef de Gonduana e forminte masas isolada de tera. La plu parte de tera continental ia es grupida en la emisfera sude, ma ia es vagante a la norde. Move grande jirante rapida de Gonduana pare aveni en la cambrian temprana.
Con la manca de jela maral - la glasias grande de la "bal de neva" periodo ia fonde ja - la nivel de mares ia es alta, cual ia resulta en areas grande de la continentes deveni inondada en mares basa e calda, ideal per viventes de mar. La niveles de mares ia flutua alga, cual sujesta ce on ia ave "edas de jela", asosiada con pulsas de estende e contrae de la glasia de la polo sude.
An si on ave un varia de plantas macroscopial de mar, fosiles de plantas teran (embriofitos) no es trovada de la cambrian. Ma peles de microbios ia es bon developada en la plaias e planos mareal sirca 500 milion aaa, e microbios ia formi ecosistemes, comparable con la crosta de desertos oji e contribuinte a la formi de solo.
Per plu, vide la scala de edas jeolojial
Gallery
edita-
Trilobitos ia es multe comun en la cambrian -
Anomalocaros ia es un predor maral temprana, entre la artropodos de la periodo -
-
Opabinia ia es un vivente con un strutur strana, probable relatada a artropodos -
Hallucigenia ia es un asendente temprana, e ia es posible un asendente temprana de onicofora ("vermes veludin") -
Cambroraster falcatus ia es un artropodo grande per la eda
