Ordovician

La ordovician es un periodo jeolojial, periodo du de la era paleozoica. Lo estende de 41.6 milion anios de la fini de la periodo cambrian 485.4 milion anios ante aora (aaa), a la comensa de la periodo silurian 443.8 milion aaa.

Viventes ia continua flori en la ordovician como lo flori en la periodo cambrian, an si a la fini de la periodo ia es marcada par la estinguis ordovician-silurian. Nonvertebratos - moluscos e artropodos - ia domina la mares. La aveni de biodiversi grande de la ordovician ia crese multe la diversia de viventes. Ma vive no ia comensa diversi asta alora sur tera.

Jeolojia

En la ordovician, la continentes sude ia es colieda en Gonduana. Gonduana ia comensa la periodo en latitudes ecuatoral e, cuando la periodo ia progresa, ia vaga a la polo sude. Temprana en la ordovician, la continentes Laurentia, Sibir, e Baltica ia es ancora continentes separada (de la rompe de la supracontinente Panotia, plu temprana).

La orojenia taconica, un episodio major de la crea de montanias, ia comensa en la periodo cambria, e continua en la ordovician. En la ordovician temprana e media, la clima ia es temperada, ma a la comensa de la ordovician tarda, de 460 a 450 milion aaa, volcanos longo la borda de la mar Iapeto ia descome cuantias enorme de diosido de carbon, un gas invernalial, en la atmosfera, cual cambia la planeta a multe calda.

La arcos de isolas volcanal ia ultima colide con Laurentia per forma la montes Apalatxian. Per la fini de la ordovician, la emetes volcanal ia para. Per acel tempo, Gonduana ia prosimi la polo sude e ia es glasida..

A la comensa, la niveles de mares ia es alta, ma en cuando Gonduana ia move a sude, jela ia cumula como glasias e la niveles de mares ia cade. Orijinal, la letos de mar basa ia crese diversia, ma la glasi ia resulta en estinguis grande en cuando la mares ia drena e la plano continental ia deveni tera seca.

La aveni meteoral de la ordovician es un pluve de meteores cual ia aveni en la media de la periodo, sirca 467.5 milion aaa, la resulta de la rompe de la corpo de la un asteroide. Sirca 100 veses tal multe meteorites ia colpa la Tera cada anio en la ordovician, comparada con oji. Ma lo no ia es asosiada con cualce aveni major de estingui.

Viventes

Plantas teran ia evolui probable de alge verde, e ia apare prima como formas peti e nonvascular semblante epaticas de oji. Entre la fungos prima a tera ia es posible la glomerales, cual ave un rol importante en fasili la coloni de tera par plantas tra simbiose micorizonal, cual fa ce nurintes mineral es otenable par selulas de plantas.

Moluscos, cual ia apare en la cambrian o an plu temprana, ia deveni comun e variosa, spesia bivalvos, gastropodos, e sefalopodos simil a la nautilos moderna. Braciopodos articulada, spesial, ia repone multe la trilobitos en comunias de la plano continental. Animales maral aora estinguida nomida graptolitos ia flori en la mares. Alga sitoidos e crinoidos nova ia apare.

On ia suposa longa ce la vertebratos prima (pexes primitiva) ia apare en la ordovician, ma descovres resente en Xina ia revela ce los ia orijina probable en la cambrian temprana. La pexes prima con mandibulas ia apare en la ordovician tarda.

La ordovician ia fini con un serie de avenis de estingui cual, combinada, composa la aveni du de grandia de la sinco avenis major de estingui en la istoria de Tera, en la persento de jenera cual ia deveni estinguida. La sola aveni plu grande ia es la aveni permian-triasica.

La estinguis ia aveni sirca 447 - 444 milion aaa, e marca la borda entre la ordovician e la periodo seguente, la silurian. A acel tempo, tota organismes complicada e multiselulal ia abita la mar, e sirca 49% de la jeneras ia desapare. Braciopodos e briozones ia es multe reduida, con multe familias de trilobitos, conodontos, e graptolitos.

La teoria la plu asetada es ce esta avenis ia es la resultas de la comensa de un ambiente multe fria, segueda par un eda glasial, cual ia para la situa longa e stable invernerial de la ordovician.

Per plu, vide la scala de edas jeolojial

Galeria

• 
  Nautiloides como la ortoseras ia es un de la predores la plu grande en la ordovician
• 
  Un crinoide de la presente
• 
  Fosiles de graptolitos de la ordovician
• 
  Fosiles de braciopodos
• 
  Fosiles de sefalopodos
• 
  Un gastropodo moderna
• 
  Un briozon moderna
• 
  Un fosil de un stela-de-mar (de la periodo jurasica)
• 
  Un fosil de un scorpion-de-mar
• 
  Un model de un conodonto
• 
  Desinia de pexes primitiva (ostracodermo)
• 
  Un briofito (epatica) de la presente
• 
  Un depinta de la vista estra la mares en la ordovician