Can
| Can | ||
| ||
| Un can ("Pastor deutx"). | ||
| Rena: | Animal | |
| Filo: | Cordato | |
| Clase: | Mamifero | |
| Ordina: | Carnivor | |
| Familia: | Canido | |
| Jenera: | Canis | |
| Spesie: | Canis lupus familiaris | |
La can domada (Canis lupus familiaris) es un suspesie de la lupo gris (Canis lupus), un membro de la familia canido de la ordina carnivoro. An si la nom, lo inclui ance la varias savaje. La can es posible la animal prima domada, e es la animal la plu retenida par umanas per labora, xasa, e camerada en la istoria de umanas.
La linia presente de canes ia es domada de lupos gris sirca 15 000 anios ante aora. An si la restas de canes domada ia es trovada en Sibir e Beljia de sirca 33 000 anios ante aora, nun de los linias pare survive la masima glasial plu resente. An si mADN esaminas sujesta un fende evolual entre canes e lupos sirca 100 000 anios ante aora, no esemplos ante 33 000 anios ante aora es clar can domada en morfolojia.
La valua de canes per xasores-coliores antica ia causa ce los deveni cuasi universal tra la cultures de la mundo. Canes servi multe roles per umanas, como aida per xasores e pastores, trae benes, proteje, aida per polisiores e militares, como cameradas, e plu resente aida per persones descapasida. En la mundo ueste, los ia reseta la nometa "la plu bon ami de umana". En otra cultures, los furni ance carne. On estima ce ave sirca 400 milion canes en la mundo (2001).
La plu de linias de canes es no plu ce alga sentos de anios de eda, con formas e conduis elejeda par umanas per roles usosa. Tra esta eleje jenetica, la can ia developa a sentos de razas variosa, e mostra plu varia de forma e condui ca cualce otra mamal teral. Per esemplo, la altia estende de 150 mm de la chihuahua a sirca 76 cm de la lepror eres. Color varia de blanca, tra gris, a negra, e brun pal a brun oscur, en un varia de motifes. La pelos pote es corta o longa, ru o lanin, reta, risa, o lisa. La plu de razas perde periodal alga de se pelo.