Carbono
Carbono es un elemento cimical, con la simbol C. Lo ave un masa atomal de 12 e numero atomal 6. Carbono es un nonmetal e la elemento 4 la plu comun en la sol. La atmosferas de Venus e Marte es composada plu de diosido de carbono. E lo es la elemento 2 la plu comun en la corpo umana, como 23% de la pesa. Sirca 10 milion composadas de carbono es conoseda.
Un campo de cimica, cimica organica, studia carbon e sua composadas. Per esemplo, idrocarbonos es moleculas de carbono e idrojen. Metano, Propano, e multe otra carburantes es idrocarbonos. Un otra usa es en la produi de aser, cual es fero aliada con carbono per crese la forte e dura de sua produidas.
Carbono, idrojen, nitrojen, osijen, en alga otra elementos como sulfur e fosfor, formi la plu de vive a tera. Carbono es un parte de multe composas organica, car lo pote formi lias forte con se mesma e con otra elementos. Cada atom de carbono pote formi cuatro lias covalente singular. Esta lias permete ce carbono formi moleculas longa e cadenin, nomida polimeres, pe plasticas.
En natur, estra carbono en la forma de carbon, carbono es trovada en tre formas nomida alotropos: diamante, grafito, e fulerenos. Grafito, con arjila, es usada en lapises. Lo es multe mol. La atomes carbono en lo crea anelos cual es supra lunlotra e lisca multe fasil. Diamantes es la mineral natural la plu dur. Fulerenos es carbonos en la forma de un futbal internasional. Los es interesante per siensa. Un alotropo artifisia es en la forma de un tubo pico nomida un nanotubo. Los es multe dur e pote es usada per developa armur per soldatos. E los pote es usosa en nanotecnolojia.
La nom carbono deriva de la parola latina carbo, cual sinifia carbon de lenio. Un multe linguas, la parolas per carbono, carbon, e carbon de lenio es la mesma. Carbono en la forma de carbon ia es un carbura importante per multe sentenios. La plu de la carbono a tera es en la forma de carbon. Grafito es trovada en multe areas, tipal deserto, incluinte Srilanca, Madagasicara, e Rusia. Diamante es rara e es prima trovada en Africa. On ave ance carbono en alga meteorites.
Un otra usa de carbono es dati radiocarbonal. Un isotopo de carbono, carbono 14, pote es usada per calcula como vea alga ojetos es, o cuando alga vivente ia mori. Tra cuando alga cosa es a la surfas de la tera e asorbente carbono, la cuantia de carbono 14 no cambia. Cuando alga cosa para asorbe carbono, la cuantia de carbono 14 descrese. Car la semidesintegra (la tempo nesesada per dui de un isotopo radioativa deveni desintegrada) de carbono 14 es 5730 anios, siensistes pote vide tan vea un ojeto es par cuanto carbono 14 resta.