Osijen licuida

Osijen es un elemento cimical con la simbol O, e es la elemento tre la plu comun en la universo, pos idrojen e elio. Cuando solitar, du atomes de osijen tipal lia con lunlotra per deveni diosijen (O2), un gas sin color, sabor, o odor. Lo es blu pal como un licuida o solida. Diosijen composa sirca 20.8% de la atmosfera de tera. Osijen es un parte de grupo calcojen a la table de elementos, e sua numero atomal es 8. Lo es un nonmetal multe reatante. Lo ance formi osidos con multe otra elementos. Osidos composa cuasi dui de la crosta de tera.

La plu de viventes sur tera aspira la gas per usa en respira. Multe moleculas organica en viventes ave osijen en los, como protenas, asidass nucleal, carboidratos, e grases. Osijen es un parte de acua, combinada con du atomes de idrojen per composa H2O, cual tota viventes conoseda nesesa per vive. Plantas fabrica diosijen par fotosintese, usante la lus de la sol per separa osijen de acua e diosido de carbono. Ozon (O3 es a la surfas de la atmosfera en la strato de ozon. Esta strato asorbe radia ultravioleta, cual redui la radia cual ateni la surfas de la planeta. Osijen es usada per produi aser, plasticas, stofas, propulsante per rocetas, e per osisolda.

Osijen ia es isolida par Michael Sendivogius, en Polsca ante 1604. Lo es comun crededa ce la elemento ia es descovreda par Carl wilhelm Scheele, en Sveria en 1773, o par Joseph Priestly, en England en 1774. Priestly es comun crededa como la descovror major car sua labora ia es publicida prima, an si el ia nomi lo "aira desflojistida", e no ia vide lo como un elemento cimical. Antoine Lavoisier ia nomi lo osijen en 1777 e ia es la person prima ci ia dise ce lo ia es un elemento cimical. El ia es ance coreta cuando el ia nota ce lo aida combusta.

IstoriaEdita

Un de la esperimentes conoseda plu temprana sur como combusta nesesa aira es fada par la elinica Filo de Bizantio en la sentenio 3 aec. El ia scrive en sua obra Pneumatica ce la inversa de un contenador supra un candela ardente e pone acua sirca esta contenador sinifia ce alga acua ia entra la contenador. Filo ia pensa ce esta ia es car la aira ia es cambiada a la elemento clasica foco. Esta no ia es coreta, natural. Plu tarda, Leonardo da Vinci ia razona coreta ce aira ia es consumada cuando combusta aveni, cual ia forsa la acua en la contenador.

En la sentenio 17 tarda, Robert Boyle ia trova ce aira es nesesada per combusta. La cimiciste engles John Mayow ia ajunta a esta par mostra ce foco ia nesesa sola un parte de aira, cual no es nomida osijen (en la forma de diosijen) En un de sua esperimentas, el ia trova ce pone un candela en un contenador cluida ia causa la acua per leva per repone un des-cuatri de la volum de aira en la contenador, ante ce la candela sesa arde. De esta, el ia conclui ce osijen es usada per combusta e respira.

Ante Lavoisier, la plu de siensistes ia crede en flojisto, incluinte Robert Hooke, Ole Borch, Mikhail Lomonosov, e Pierre Bayen, tota ci ia esperimenta en la crea de osijen. Nun ia crede ce lo ia es un elemento cimical. La idea de flojisto ia es creada par J. J. Becher en 1667, e George Ernst Stahl ia ajunta a lo en 1731. La teoria de flojisto ia dise ce tota materias combustable ia es fada de du partes: un parte, flojisto, ia es produida cuando un materia combustable ia es ardeda. Materias multe combustable cual resta sola un poca cuantia de materia pos arde, como lenio o carbon, ia es suposada como composada de flojisto. Cosas cual corode, como fero, ia es suposada como conteni sola un cuantia peti. Aira no ia es un parte de esta teoria.

La alcimiciste, filosofiste, e mediciste polsce, Michael Sendivogius, ia parla de un materia en aira cual en ia nomi la "comeda de vive", pd osijen. Entre 1598 e 1604, acel materia es la mesma como lo cual es produida cuando la nitrato de potasio descomposa par calda. La farmasiste svensce, Carl Wilhelm Scheele, ia produi osijen par calda osido de mercurio e alga nitratos en 1771. Scheele nomi la gas "aira de foco", car lo ia es la sola gas cual permete combusta. El ia publica sua descovre en 1777.

A 1 agosto 1774, un esperimenta par la eglesor brites Joseph Priestly ia foca lus de sol sur osido de mercurio en un tubo de vitro. Esta produi un gas el ia nomi "aira desflojisti". El ance ia trova ce candelas ia arde plu briliante en la gas, e ce muses ia vive plu longa cuando los respira lo. Cuando el mesma ia respira lo, e ia dise ce lo senti como aira normal, ma ce sua pulmones ia senti plu bon a pos. Sua descovres ia es publicida en 1775.

La cimiciste Lavoisier ia fa la esperimentas major prima sur osido e ia dona la esplica coreta prima sur como combusta opera. El ia usa esta e otra esperimentas per mostra ce la teoria de flojisto no es coreta. El ia ance atenta mostra ce la materia descovreda par Priestley e Scheele ia es un elemento cimical.

En un esperimenta, Lavoisier ia trova ce on no ave un crese en masa cuando stanio e aira ia es caldida en un contenador cluida. El ia ance trovada ce aira ia entre rapida cuando la contenador ia es abrida. Pos esta, el ia trova ce la stanio ia crese en masa par la mesma cuantia como la aira cual ia entre. El ia publica sua descovres en 1777. El ia scrive ce aira ia es composada de du gases. Un de los es nomi "aira de vive" (osijen) cual es nesesada per combusta e respira. La otra el nomi azote, cual sinifia "sin vive" en elinica, e cual nos nomi oji nitrojen. El ia nomi plu tarda la gas prima "osijen", de la elinica per "produida de asidas", cual no es coreta, ma la nom resta a oji.

La teoria de atomes de John Dalton ia dise ce tota elementos ave un atom, e atomes en composadas ia es tipal solitar. Per esemplo, el pensa erante ce acua (H2O) ia ave la formula de simple HO. En 1805, Joseph Louis Gay-Lussac e Alexander von Humbolt ia mostra ce acua es composada de du atomes de idrojen e un de osijen.

Per la sentenio 19 tarda, siensistes ia trova ce aira pote es cambiada a un licuida, e la composadas en lo pote es isolida par compresa e fria lo. La cimiciste e fisiciste suiz Raoul Pictet ia descovre osijen licuida par vapori diosido de sulfur per cambia diosido de carbon a un licuida. Esta ia es alora ance vaporida per fria la osijen gas per cambia lo a un licuida. El ia telegrafi la Academia de Siensas Franses a 22 desembre 1877 per informa los de sua descovre.

CualiasEdita

Osijen ave tre alotropos (tipos) de osijen sur tera. Diosijen (O2) es la parte du de la atmosfera de tera, pos dinitrojen (N2). Car lo ave un enerjia grande, O2 es usada par vives complicada como animales. Ozon (O3) es multe reatante e danas la pulmones cuando respirada.

Ozon es fabricada en la atmosfera alta cuando O2 combina con pur osijen cual es fabricada cuando O2 es fendeda par radia ultravioleta. Ozon asorbe multe radia en acel parte de la spetro eletromagnetal, e donce la strato de ozon proteje tera de radia. Tetraosijen (O4) ia es descovreda en 2001. Lo esiste sola en situas estrema cuando un cuantia grande de presa es poneda a O2.

Osijen disolve plu fasil en acua ca nitrojen. Cuando on ave un cuantia egal de aira e acua, on ave 1 molecula de O2 per cada 2 moleculas de N2. Esta difere de aira, en cual on ave 1 molecula de osijen a 4 moleculas de nitrojen. Ance, osijen disolve plu fasil en acua dulse ca en acua maral, e acua fria ca acua calda. Ambos como un licuida e un solida, O2 es diafana con un color de azul pal.

On ave tre isotopos stable de osijen en natur: 16O, 17O, e 18O, distinguida par la cuantia de neutrones a la 16 protones. Sirca 99.7% de osijen es de la 16O isotopo.

Sirca 0.9% de la masa de la sol es osijen. Sirca 49.2% de la crosta de tera e osijen, como un parte de composadas osido como diosido de silicon. Lo es ance la parte major de la mares de tera, como 88.8% de la masa. Osijen es la parte 2 la plu comun de la atmosfera, composante 20.8% de sua masa e 23.1% de sua volum. Tera es strana cuando comparada con otra planetas, regardante la cuantia grande de osijen. Per esemplo, Marte ave 0.1% par volum, e la resta de la planetas an min.

La cuantia alta de osijen sur tera es la resulta de la sicle de osijen. Esta es controlada xef par fotosintese, cual crea osijen de diosido de carbono, acua, e la enerjia de la sol. Respira par viventes alora estra la osijen de la atmosfera e cambia los denova a diosido de carbon e acua. Esta aveni a la mesma rapidia, donce la cuantia de osijen e diosido de carbon no cambia.

Usas e perilesEdita

Osijen es un parte multe importante de respira, e donce lo es multe usosa en medica. Lo es usada xef per crese la cuantia de osijen en la sangue de un person per aida respira. Esta pote aida la person en deveni sana plu rapida. Terapia par osijen es usada per trata emfisema, pneumonia, alga problemes de la cor, e cualce maladia cual causa un person per ave difisiles en respira.

O2 su presa basa es usada en la vestes per viaja en spasio, ambie la corpo con la gas. Pur osijen es usada ma a un presa multe basa. Si la presa es plu alta, lo ta deveni venenosa. Lo pote causa convulsas e otra problemes. Nosivia comensa tipo cuando presas leva a plu ca 50 cilopascales, egal a sirca 50% osijen en la aira a presa normal. Bebes prematur ia es poneda en caxas con un cuantia alta de O2, ma lo ia es descovreda ce alga bebes ia deveni sieca de la osijen.

Cuantia consentrada de O2 pur pote causa foco rapida. Cuando osijen consentrada e combustables es poneda prosima a lunlotra, un inisia peti pote causa un foco grande. La ecipo de la mision spasial de Apollo 1 ia es matada par un foco como la resulta de osijen consentrada cual ia es usada en la aira de la veculo. Si osijen licuida es versada sur composas organica, como lenio, lo pote esplode.